90
BUK ME AŊWEN
(Jabuli 90–106)
Obaŋa kede dano
Man kwac a Muca ame obedo dano Obaŋa.
1Yin gire i ka-larrewa, Ama Rwot,
cakere con i con.
2Ame mom ru oketo kiddi,
onwoŋo yin giri doŋ Obaŋa,
kun lobo kede wi podo luŋ pwod mom,
onwoŋo yin giri doŋ itye.
3Iloko dano doko apua,
kun ikobo ni, “Dok giri iyi apua wun itino a dano.”
490.4: 2 Pet. 3.8Mwaka tutumia rom aroma i nino aworo baŋi,
onyo romo aroma i caa acel keken me dyewor.
5Ijwero dano oko, kun imiogi orwenyo calo lek,
kun calo lum ame lot odiko.
6Odiko lot te doŋo,
otyeno ner, te two oko,
7Akemoni ojwerowa otyekowa oko,
wan cunyi odiowa meicel.
8Balwa luŋ tye i nyimi,
anaka balwa luŋ ame ŋattoro mom ŋeo,
gin luŋ tye kannaler i nyimi.
9Kare me kwowa iŋolo ogik acecek pi akemoni,
kwowa rwenyo calo lwio.
10Kare me kwowa gik ka i mwakki pyerabiro nono,
aco ka tekowa pwod tye te tuno pyeraboro nono,
akadi bed amannono,
mwakkinono luŋ bedo me can keken,
dok daŋ mom ru tum, eka wan ote rwenyo oko.
11Ŋa kara ame niaŋ teko me akemoni?
Ŋa kara ame niaŋ waŋ cunyi ame mio twero bedo kede lworo kakare?
12Pwonywa kwano kare me kwowa,
me obed i cuny ame ryek.
13Lok cunyi, Ama Rwot! Tim omironi kica!
Myero onen can pi kare arom mene ba?
14Kwe cunywa oyot ba i mar meri a mom lokere,
me ower i yomcuny pi kare me kwowa luŋ.
15Miwa obed i yomcuny ame rom aroma i can ame oneno,
a rom aroma i mwakki ame obedo kede peko.
16Miwa wan omironi onen teko me ticci,
me ikwaewa nen kwogoni.
17Rwot Obaŋa myero mi berrere obed i komwa;
omok ticwa luŋ ame wan otio,
omok ticcoro luŋ ame wan otio.