33
Wer me pako Obaŋa ame oketowa dok gwokowa
1Lel wunu i Rwot, wun jo a kitewu atira!
Pake wunu, wun jo ame winyo koppere!
2Pak wunu Rwot i naŋa opuk,
wer wunu wer me pake i naŋa a tollere tye apar twal.
3Pake wunu i wer anyen,
go wunu naŋa me pake i diro meicel,
kun iwero wunu i dwon aloŋo.
4Pien kop a Rwot okobo tye kakare,
dok en agen meicel i ticcere luŋ,
5Rwot maro kite atira kede ŋolo kop atira,
mar a Rwot a mom lokere tye adwoŋ meicel i lobo,
6Kop a Rwot en omio lobo okette,
jami iye luŋ weo mere en omio obedo tye.
7En ocoko pii i nam luŋ karacel bala pii i yi cupa,
okano nam atut oko calo gin okemo ot kano jami.
8Jo me wi lobo luŋ myero wor Rwot,
myero jo luŋ ame bedo i wi podo bed i lworo i nyime.
9Pien en okobo ka kop, lobo te kette,
en ociko acika keken, jami luŋ te bedo tye.
10Rwot balo yik a rok apapat oko,
en mio tam a jo ocele mom cobere,
11Cite gin ame Rwot oyiko perakino waŋ i waŋ,
gin ame en otimo i ciŋe bedo me kare luŋ,
12Rok ame Obaŋa en a Rwotgi, tye i winyo,
jo ame en oyero me bedo jo mere ikome.
13Rwot neno piny i polo, en neno jo luŋ aluŋa,
14En noloro piny i wi kom me loccere,
neno jo luŋ ame bedo i wi lobo.
15Rwot gire en ame oketo cuny jo luŋ,
en neno ginnoro luŋ ame gin tio.
16Abaka mom larre pi lwak mony ame en tye kede,
acirikale mom larre pi twon teko mere adwoŋ.
17Aguragura me lweny mom obedo gi-agena i lweny,
mom romo laro dano kadi acel, pi twon teko mere adwoŋ wok-ki.
18Nen ba, wan Rwot gire mom rwenyo i kom jo ame wore,
jo ame tye kede gen pi marrere a mom lokere,
19me elar tipogi oko i to,
dok egwokgi obed kwo i kare me kec.
20Tipowa tye ka kuro Rwot,
en obedo akonywa kede kwot me geŋo komwa.
21Wan giwa, cunywa yom pire,
pien wan otye i gen i kom nyiŋe acil.
22Ama Rwot, mi marri a mom lokere bed i komwa,
pien wan otye kede gen piri yin keken.