25
1KANDI MUKAMA akagambira Musa omu rusozi Sinai ati 2Gambira abana ba Isareri, obagambire oti Obumulikataha omu nsi eyindukubaha, nubwo ensi eryerinda sabiti hali MUKAMA. 3Emyaka mukaga orasigaga omussiri gwawe, kandi emyaka mukaga orasa’raga orugonjo rwawe orwemizabibu, kandi orahunikaga ebyana byamu; 4baitu omu mwaka gwa musanju halibaho sabiti eyokuhumura okwatairweho habwiitaka, sabiti hali MUKAMA; otalisiga omusiri gwawe, nobukwakuba okusa’ra orugonjo rwawe orwemizabibu. 5Eki ekirukumera kwonka omu magesa gawe otalikigesa, nemizabibu eyomuzabibu gwawe ogutasalirwe otaliginoga: guliba omwaka ogwokuhumura okwatairweho habwensi. 6Kandi sabiti eyensi eriba habwebyokulya nambere muli, habwawe, kandi habwomuiru wawe, kandi habwomuzana wawe, kandi habomuhereza wawe agulirirwe, kandi habwomunyaihanga wawe arukugonya naiwe; 7kandi habwente zawe, kandi habweisoro ebiri omu nsi yawe, ensagi zamu ziriba ebyokulya.
8Kandi olibara namberoli sabiti eyemyaka musanju, emyaka musanju emirundi musanju; kandi haliba namberoli ebiro ebyesabiti musanju ezemyaka, niyo myaka ana mu mwenda. 9Nubwo oliturukya ikondere erikoto ha kiro kya ikumi ekyokwezi kwa musanju; ha kiro ekyokulihi’ra muliturukya ikondere okuhikya ensi yanyu yona. 10Kandi mulyeza omwaka gwamakumi atano, mulidumira obugabe omu nsi yona abantu bona abamu: guliba nambere muli ogwa yubile; kandi muligarukayo omuntu wena hali obutakabwe, kandi muligarukayo omuntu wena hali aborugandarwe. 11Omwaka ogu ogwamakumi atano guliba yubile namberemuli: mutalisiga, nobubwakuba okugesa eki ekirukumera kyonka omugwo, nobukwakuba okunoga emizabibu ha mizabibu etasalirwe omugwo. 12Baitu guliba gwa yubile; guliba nambereuli ogurukwera,. Mulirya ensagi zamu omu musiri. 13Omu mwaka ogu ogwa yubile muligarukayo omuntu wena omu butakabwe. 14Kandi obwoliba noguza ekintu mutahi wawe, rundi nogura omu Mukono gwa mutahi wawe, mutaligobezangana; 15nkomuhendo ogwemyaka erukuhondera yubile okuguli, oligura hali omutahi wawe, kandi nkomuhendo ogwemyaka yebi ebigeserwe okuguli, nukwo alikuguza iwe. 16Nobwingi obwemyaka okubuli olikanyisa omuhendo gwabyo, kandi nkobuke obwemyaka okubuli olihehya omuhendo gwabyo; habwomuhendo gwebi ebigeswa ebyakuguza. 17Kandi mutaligobezangana; baitu olitina Ruhanga wawe; baitu nyowe ndi MUKAMA Ruhanga wanyu. 18Nikyo murako’raga ebinataireho, kandi murayerindaga ebyobulyo byange okubikora; kandi muraikaraga omu nsi nobusinge. 19Kandi ensi erayanaga ebyana byayo, kandi muraigutaga, muraikaraga omu nobusinge. 20Kandi obumuliba nimugamba ngu Tulirya ki omu mwaka gwa musanju? Dora, titulisaga, nobukwakuba okuhunika ensagi zaitu: 21nubwo ndibaragi’raga omugisa, kandi gulizara ebyana habwemyaka esatu. 22Kandi mulisiga omu mwaka gwa munana, nimulya ha byana ebyahuirwe ira; okuhikya omwaka gwa munana ebyana byagwo obubirikahunikwa, mulirya ebyayahuirwe. 23Kandi ensi terigurwa okuhikya ebiro byona; baitu ensi yange: baitu inywe muli basuhuki kandi abagonyi namberendi. 24Kandi omu nsi yona eyobutaka bwanyu muraikirizaga ensi okucungurwa.
25Mugenzi wawe obwaliba ainaire, kandi naruga ha butakabwe, oworuganda amuli haihi aliija, alicungura eki megenziwe ekyaguzire. 26Kandi omuntuobwaliburwa owokumucungura, kandi obwaliba atungire muno kandi anyina ebyokucungura; 27abale emyaka eyokugura kwayo, aga’re ebisagireho hali omusaija auyakiguluze; kandi aligaruka omubatakabwe. 28Baitu obwatalisobora okukicungura wenka eki ekiyaguzire kiriikara omu Mukono gwogu ayakitwaire, okuhikya omwaka gwa yubile; kandi omu mwaka gwa yubile kirirugayo, kandi uwe aligaruka omu butakabwe.
29Kandi omuntu obwaligura enju omu rubuga oruroho muhuruzi, alisobora okugicungura omwaka gumu gutakahikire ekaba okugurwa; okumara omwaka gumu oguhikire aliba nobusobozi okugicungura. 30Kandi obwetalicungurwa omwaka gumu gutakahikire, enju enyakuli omu rubuga oruroh muhuruzi erigumibwa hali ogo ayagiguzire ebiro byona okuhikya abaijukurube: terirugayo omu mwaka gwa yubile. 31Baitu enju ezomu bika ebitaloho muhuruzi ziribarwa hamu nemisiri eyomunsi kwonka: nizisobora okucungurwa, kandi zirirugayo omu mwaka gwe yubile. 32Baitu embuga eza Abalevi, enju ezomu mbuga ezobutaka bwabu, Abalevi, nibasobora okuzicungura obusumi bwona. 33Baitu omu hali Abalevi obwalicungura, enju eguzirwe, norubuga orwobutakabwe birirugayo omu mwaka gwa yubile: baitu enju ezomu mbuga Zabalevi nubwo butaka bwabu omu bana ba Isareri. 34Baitu obutaka obwamalisizo agembuga zabu butaligurwa: baitu nubwo butaka bwabu okuhikya ebiro byona.
35Kandi mugenzi wawe obwaliba ainaire, kandi omukonogwe nugulemwa namberoli; iwe olimukonyera: nkomusuhuki kandi nkomugonyi nukwo aliikara naiwe. 36Otalimusagisamu ensagi nobulyakuba itungo; baitu olitina Ruhanga wawe: mugenzi wawe aikalege naiwe. 37Otalimuha erupiya zawe habwensangi, nobubyakuba ebyokulya bwawe habwitungo. 38Nyowe ndi MUKAMA Ruhanga wanyu, ayabaihire ensi ya Kanani, okuba Ruhanga wanyu.
39Kandi mugenzi wawe obwaliba ainaire namberoli, nayegura wenka namberoli, otalimukoza omulimo nkomuiru rubale: 40nkayakukolereza empera kandi nkomugonyi araikaraga naiwe, alikuko’ra okuhikya omwaka gwa yubile: 41nubwo aliruga namberoli, uwe nabanabe hamu nauwe, kandi aligaruka hali bene babu kandi hali obutaka bwabaisenkuru nuho aligaruka. 42Baitu bali bairu bange; abanaihire omu nsi ya Misiri: tibaligurwa nkabairu rubale, 43Otallimulemesa amani, baitu olitina Ruhanga wawe. 44Kandi ebyabairu bawe rubale, nabazana bawe, abolitunga ha mahanga ababehinguririza inywe nuho muligura abairu rubale nabazana. 45Kandi ebyana babanyaihanga abagonya omulinywe, haliho muliruga, kandi ha baijukuru babu abali nainywe ababaliba bazalire omu nsi yowanyu: kandi baliba itungo lyanyu. 46Kandi mulibafora abugwetwa habwabana banyu enyuma yanyu, okutungaga nkitungo; nuyo muliiha abairu banyu abana ba Isareri mutalibalemesa omutahiwe.
47Kandi omunyaihanga rundi anyakogonya naiwe obwaliba atungire muno, kandi mugenzi wawe obwaliba ainaire namberali, nayegura wenka hali omunyaihanga, rundi anyakugonya naiwe, rundi hali oruganda orwomunyaihanga: 48obwalimara okugurwa alisobora okucungurwa: omu hali bagenzibe nasobora okumucungura: 49rundi isento, rundi omwana wa isento nasobora okumucungura, rundi oworuganda wena amuli haihi owomu bene babu, nasobora okumucungura wenka. 50Kandi alibara nogu ayamugumize okuruga ha mwaka oguyayeguliremu okuhikya omwaka ogwa yubile: kandi omuhendo ogwokugurakwe guliba nkomuhendo ogwemyaka okuguli; nkakacu komukozi anyakulorereza empera okukali nukwo aliikara ati hamu nauwe. 51Obuhalisigaraho emyaka mingi, nkegi okweri nukwo aliga’ra omuhendo ogwokucungurwakwe omu bintu ebyamuguzire. 52Kandi obuhalisigaraho emyaka mike okuhikya ha mwaka gwa yubile, nukwo alibara nauwe: nkemyakaye okweri nukwo aliga’ra omuhendo ogwokucungurwakwe. 53Nkanyakukolereza empera omwaka nomwaka nukwo aliba ati hamu nauwe: atalimulemesa amani omu maiso gawe. 54Kandi obwatalicungurwa habwebigambo ebi, alirugayo omu mwaka gwa yubile, uwe nabanabe hamu nauwe. 55Baitu abana ba Isareri baliba bairu abahaihire omu nsi ya Misiri: nyowe ndi MUKAMA Ruhanga wanyu.