31
1NKARAGANA ekiragano namaiso gange;
Ninsobora nta okurole’ra omuisiki?
2Baitu omugabo gwa Ruhanga oguruga haiguru kiki,
Nobugwetwa Bwowobusobozi bwona ali haiguru muno?
3Tinugwo muhito hali abatahikirire,
Nobujune hali abakozi bokutahiki’ra?
4Tarukurora emihanda yange,
Nabara omuhendo entambu zange zona?
5Obundaba nagendaga omu butarumu,
Nekigere kyange kyarahukira obugobya;
6( Leka ndengwe omu minzani etarukubiha,
Ruhanga amanye amazima gange;)
7Obukiraba ekigere kyange kihungukire omu muhanda,
Nomutima gwange gugenzire okukuratira amaiso gange nyenka,
Rundi akamogo kona kakwatire ha ngaro zange:
8Leka nsige, ondi alye;
Ego, amagoba agemisiri yange gamenywemu.
9Rundi omutima gwange obuguraba gwohibwe omukazi,
Nanyowe nyeserekere ha ruigi rwomutahi wange:
10Leka mukazi wange asere ondi oburo,
Kandi abandi bainame haliwe.
11Baitu eki kyakubaire ekibi ekikoto muno;
Ego, kyakubaire ekyokusisa ekyokubonabonesebwa abacwi bemisango:
12Baitu nugwo mu’ro ogurukokya okuhikya Abadoni,
Gwakumazireho ensagi zange zona.
13Obundaba nagayire obulyo bwomuiru wange rundi obwomuzana wange,
Obubahakaine nanyowe;
14Ndikora ki Ruhanga obwaliimuka?
Kandi obwalinyizira ndimugarukamu nga?
15Ogu ayankozire omu nda tinuwe yakozire oli?
Ayatukolire omu nda tali omu?
16Obundaba natangire abanaku hali eki ekibagondeze,
Rundi obunajwahize amaiso gomufakati;
17Rundi obunayerire nyenka akokulya kange,
Kunu nfuzi takalireho;
18( Nangwa, baitu okuruga omu buto bwange akaku’ra nanyowe nka ise,
Kandi nkabandi omwebembezi womufakati okuruga omu nda ya mau:)
19Obundaba naboine omuntu wean babura habwokutaga ebyokujwara,
Rundi omunaku atanyina ekyokwesweka;
20Rundi ebiberobye obubiraba bitansimire,
Araba atatagasire habwebyoya byentama zange;
21Obundaba naimukize omukono gwange okurwana nenfuzi,
Habwokurora okukonyerwa kwange omu irembo:
22Leka ibega lyange liruge omu nkwa,
Nomukono gwange guhendeke okuruga ha rugamba.
23Baitu akabi akarukuruga hali Ruhanga kantinisaga,
Kandi habwobukurubwe ntasobole okukora kigambo.
24Obundaba nafoire ezabu okunihira kwange,
Ningambira ezabu enungi nti
Niwe bwesige bwange;
25Obundaba nasemerirwe itungo lyange okuba lingi,
Nomukono gwange habwokutunga bingi;
26Obundaba naboine izoba obulyajwire,
Rundi okwezi nukugendera omu kwangasana;
27Kandi omutima gwange gwayohibwe omu nsita,
Nakanwa kange kanywegire engaro zange:
28Nakyo kyakubaire ekyokutahiki’ra ekisemerirwe okubonabonesebwa abacwi bemisango:
Baitu nakwehakaine Ruhanga anyakuli haiguru muno.
29Obundaba nasemerirwe habwokuhwereke’ra kwogu ayanobere,
Rundi obundaba nayenyumize nyenka akabi obukamuboine;
30( Ego, ntaikirize akanwa kange okusisa Ninsaba obwomezibwe nomukyeno;)
31Abantu abomu hema yange obubaraba bataragambire ngu
Noha asobora okuzora omuntu ataraigusire enyamaye?
32Omusuhuki atagonye omu muhanda;
Baitu nkakingu’ra omugenzi enyigi zange;
33Obundaba naswekere okusisa kwange nka Adamu,
Ninsereka okutahiki’ra kwange omu kifuha kyange;
34Habwokutina ekitebe kingi,
Nokugaya okwenganda okwankangire,
Nokuculera naculera, ntarukuturuka omu mulyango
35Ai bambi, kuba nyina omuntu owokumpu’ra!
( Dora, hanu haroho emanyikirizo yange, leka Owobusobozi bwona angarukemu;)
Kuba nyina ebigambo ebyokunyege’ra bihandikirwe omunyanzigwa wange!
36Mazimakwo mba nibihimba ha ibega lyange;
Mba nibihoha hali nyowe nkekondo.
37Mba nimutebeza omuhendo gwentambu zange;
Nkomukuru nukwo mba nimuhika haihi.
38Ensi yange obweraba nenyege’ra,
Emyaransi yayo ne’ra hamu;
39Obundaba nalire ebyana byayo hatali rupiya,
Rundi naihireho bakama bayo obwomezi bwabu:
40Amatojo gamere omu kiikaro kyengano,
Nemberya omu kiikaro kyoburo.
Ebigambo bya Yobu bigarukire hanu.