3
1KANDI enjoka ekaberi engobya okukira ebisoro byona obyomu kisaka MUKAMA Ruhanga ebiyakozire kandi ekagambira omukazi eti nukwo Ruhanga yagambire ati mutarilya ha miti yona eyomurugonjo 2Omukazi yagambira enjoka ati ebyana ebyemiti eyomu lugonjo etusobora okubiryaho: 3baitu ha byana ebyomu muti oguri hagati omurugonjo, Ruhanga akagamba ati mutari gulyaho, nobukwakuba okugukoraho mutafa. 4Enjoka yagambira omukazi eti okufa timulifa: 5baitu Ruhanga amanyire ha kiro kirimugulyaho amaiso ganyu nuho garigukira, nanyowe muriba nka Ruhanga okumanya ebirungi nebibi 6Kandi omukazi obuyabwine omuti guli murungi okulyaho kandi gusemerire amiso, kandi omuti nugwo gwombwa okuheisa amagezi, yanoga ha byana byagwo, yalya; kandi yaha na musaija we hamu nauwe, yalya. 7Kandi amaiso gabo bombi gaiguka, bateraniza amababi gemitoma nibeko’ra ebyokwesweke’ra. 8Kandi bakahu’ra iraka lya MUKAMA Ruhanga nagendera omu rugonjo omumabeho agalwebagyo: omusaija na mukazi we bayesereka amaiso ga MUKAMA Ruhanga omu rugonjo. 9MUKAMA Ruhanga yayeta omusaija yamugambira ati ori nkaha? 10Yagamba ati mpurire iraka lyawe omurugonjo, natina baitu mbaire ndi kwonka nayesereka. 11Yagamba ati noha akugambire ori kwonka? Olire ha muti ogunakuragire okutagulyaho? 12Omusaija yagamba ati omukazi owuwampire okuikara na nyowe nuwe ampaire ha muti, nalya. 13Mukama Ruhanga yagambira omukazi ati kiki kunu kyokozere? Omukazi yagamba ati enjoka niyo embihabihire, nalya. 14MUKAMA Ruhanga yagambira enjoka ati baitu okozire kinu, ocenerwe iwe okukira ebisoro bwona, nokukira enyamaiswa zona ezomu kisaka: oragendesaga enda, kandi olalyaga ecucu ebiro byona ebyobwomezi bwawe: 15nanyowe ndatahoga okuhigana ahagati yawe nomukazi, kandi hagati yoruzaro rwawe noruzarorwe: alikuhutaza omutwe gwawe, naiwe orimuhutaza ekikongoijokye. 16Yagambira omukazi ati okwengera ndayongerahoga obujune bwawe nokubanenda kwonka: omubujune nimwo orazaraga abana nokwegomba kwawe kuraikaraga hari baro, nauwe arakulemaga. 17Kandi yagambira Adamu ati baitu ohurire iraka lyomukazi wawe, walya ha muti ogunakulagire ningamba nti atarigulyaho: itaka rikyenerwe habwawe; nimwo orihaga ebyokulya omu kutalibana ebiro byona byobwomezi bwawe: 18Lirakuza’raga amahwa namatojo naiwe oralyaga ebimera omu kisaka; 19omu mpita ezomu maiso gawe nimwo orariraga ebyokulya, okuhikya obwoligarukamu omu itaka: baitu omu numwo waihirwe: baitu oricucu, kandi omucucu nimwo origaruka 20Omusaija yaruka mukaziwe ibaralye Hawa; baitu niwo nyinabo bona abomezi. 21Kandi MUKAMA Ruhanga akarora Adamu na mukaziwe ebyokujwara ebyomiguta, yabajweka.
22MUKAMA Ruhanga yagamba ati dora omuntu afokere nkomu haritwe okumanyaga ebirungi nebibi: nahati atago’ra omukonogwe okunoga na ha muti ogwobwomezi okulya, aleke okwomera ebiro ne biro 23nikyo MUKAMA Ruhanga yamubingire omurugonjo Adeni, alimege ensi nambere yaihirwe. 24Nukwo yabingamu omuntu; yatamu bakerubi rubaju lyorugonjo Adeni orwoburigaizoba na busitama erukumulukya, erukuhindahinduka okurindaga omuhanda gwomuti gwobwomezi.