28
1Isaka yayeta Yakobo yamusabira omugisa, yamutere’ra namugambira ati Otaliswera omukazi omu bahara ba Babakanani. 2Imuka, ogende Padanaramu, hali enju ya Besueri ise nyoko, oyeswe’re mukazi oku omu bahara ba Labani nyokorumi. 3Kandi Ruhanga Wobusobozi bwona akuhege omugisa, akukanyisege, akwongerehoga, nukwo ofoke ekitebe ekyamahanga; 4kandi akuhe omugisa gwa Iburahimu, iwe nabaijukuru bawe hamu naiwe nukwo ogwetwe ensi eyiwagonyamuga, Ruhanga eyiyahaire Iburahimu. 5Isaka yaraga Yakobo: yagenda Padanaramu hali Labani, omwana wa Besueri Omwaramu, munyanya Rebeka, nyina Yakobo na Esau. 6Kandi Esau akarora Isaka asabire Yakobo omugisa, kandi amutumire okugenda Padanaramu, okweswe’rayo mukazi; kandi obuyamusabire omugisa amutererire nagamba ati Otaliswera mukazi mu bahara ba Kanani; 7kandi nka Yakobo okuyahulire ise na nyina, kandi agenzire Padanaramu: 8kandi Esau yarora abahara ba Kanani batarukuseme’ra Isaka ise; 9Esau yagenda hali Isameri yaswera okwongera ha bakazi abakaba anyinabo, Maharasi omuhara wa Isameri, omwana wa Iburahimu, munyanya Nebayosi, okuba mukaziwe.
10Kandi Yakobo akaruga Beeri-seba, yagenda hali Harani. 11Yahika omu kiikaro, yagonyaho okukiisa obuire baitu izoba rikaba riguire; yatwara erimu ha mabale agomu kiikaro eki, yalyesagura hansi yomutwegwe, yabyama omu kiikaro eki okugwijagira. 12Yarota ekiroto, kandi dora, amatembero gasimbirwe ha itaka, nensonga yago ehikire omu iguru; kandi dora, bamaraika ba Ruhanga nibatemba kandi nibasirimuka haligo. 13Kandi dora, MUKAMA ayemerire haiguru yago, nagamba ati Ninyowe MUKAMA Ruhanga wa Iburahimu ‘so kandi Ruhanga wa Isaka: ensi eyobyamireho, ndigikuha iwe nabaijukuru bawe; 14kandi baijukuru bawe baliba nkecucu eya hansi, kandi olihika bugwaizoba, na buragaizoba, nobukizi obwemoso, nobwobulyo: kandi omuliwe nomubaijukuru bawe enganda zona ezomu nsi numwo ziriherwa omugisa. 15Kandi dora, nyowe ndi hamu naiwe, kandi ndakulindaga horagendaga hona, kandi ndikuga’ra omu nsi enu; baitu tindikuleka, okuhikya obundimara okukora ebinkugambire. 16Yakobo yasisimuka omu turotwe, yagamba ati Mananukwo MUKAMA ali omu kiikaro kinu; nanyowe mbaire ntamanyire. 17Kandi yatina, nagamba ati Ekiikaro kinu kyokutinwa! ekiikaro kinu niyo eju ya Ruhanga mali mali, kandi nugwo mulyango gwiguru. 18Yakobo yaimuka nyenkya omu rukyakya, yakwata ibale eriyayesaguire hansi yomutwegwe, yalisimba okuba nkenyomyo, yalisesaho amagita ha nsonga yalyo. 19Kandi yaruka ekiikaro eki ibara lyakyo Beseri: baitu ibara lyorubuga likaba liri Luzi okubanza. 20Yakobo yayeraga okweraga, nagamba ati Ruhanga obwaraikaraga hamu nanyowe, kandi obwarandindiraga omu muhanda gunu ogundukugendamu, kandi obwarampaga omugati gwokulya nengoye ezokujwara,
21Nokugaruka ningaruka omu nju ya isenyowe nobusinge, nubwo MUKAMA aliba Ruhanga wange, 22nibale linu erinsimbire okuba nkenyomyo: liriba enju ya Ruhanga kandi ya byona ebyorampaga mananukwo tindireka okukuha ekicweka kya ikumi.