24
1IBURAHIMU akaba akuzire ahwisire muno: MUKAMA akaba ahaire Iburahimu omugisa omu bigambo byona. 2Kandi Iburahimu akagambira omuiruwe omukuru wenjuye, ayalemaga byona ebyakabanyinabyo ati Nkwesengerize, ta omukono gwawe hansi yekibero kyange: 3nanyowe ndakurahiza MUKAMA, Ruhanga owiguru kandi Ruhanga owensi otaliswere’ra omwana wange omukazi aliruga omu bahara ba Bakanani, abanyikaramu: 4Baitu oligenda omu nsi yowaitu kandi hali bene baitu nuho oliswere’ra omwana wange Isaka omukazi. 5Omuiruwe yamugambira ati rundi omukazi taliikiriza okuija nanyowe okuhika omu nsi enu: kirimpiki’ra okuga’rayo omwana wawe omu nsi eyiwarugiremu? 6Iburahimu yamugambira ati otaliga’rayo omwana wange na kake. 7MUKAMA Ruhanga owiguru, ayanyihire omu nju ya isenyowe nomu nsi hanazairwe, kandi ayagambire nanyowe, nandahi’ra nagamba ati Abaijukuru bawe Nibaha ensi enu: ogu alituma maraikawe okukwebembera, naiwe oliswere’ra omwana wange omukazi aliruga oku. 8Omukazi obwaliba atarukuikiriza okuija naiwe, nukwo toliba nomusango habwokurahira kwange kunu; kimu kyonka otaliga’rayo omwana wange 9Omuiru yata omukono gwe hansi yekibero kya Iburahimu mukamawe namurahi’ra omu kigambo eki. 10Kandi omuiru yatwara engamira ikumi, omu ngamira eza mukamawe, yagenda; akabanyina ebintu byona ebirungi ebya mukamawe omu mukonogwe: yaimuka, yagenda Mesopotamiya omu rubuga rwa Nahora. 11Kandi yainamisa engamira aheru yorubuga hali iziba lyamaizi obuire nubuira, akasumi kahikire abakazi habaturukira okureta amaizi. 12Yagamba ati Ai MUKAMA Ruhanga wa mukama wange Iburahimu, ompe nkwesengerize omugisa hati ogi’re embabazi Mukama wange Iburahimu. 13Dora nyemerire ha nsoro yamaizi; nabahara babasaija bomu rubuga nibaturuka okuleta amaizi: 14nukwo kibe kiti omuisiki oundagambira nti Tahasi ensoha yawe nkwesengerize, nywe; nauwe aragamba ati Nywa, nanyowe ndayesera nengamira zawe; abe ogu ouwataireho habwomuiru wawe Isaka; kandi nuho ndamanyira ogirire embabazi mukama wange. 15Kandi kyahika obwakaba nakigamba, dora, Rebeka yaturuka, nuwogu ayazalirwe Besueri, omwana wa Mirika mukazi wa Nahora, mugenzi wa Iburahimu, anyina omunagagwe ha ibega. 16Kandi omuisiki akabali murungi muno okurora, omuisiki omuto kandi akaba atamanyire musaija: yasirimuka ha nsoro. yaijuza omunagagwe yagarukayo. 17Omuiru yairuka okumuitirana nagamba ati Onywise, nkwesengerize otuizi omu munaga gwawe. 18Yagamba ati Nywa, mukama wange: yayanguha, yata omunaga ha mukono gwe yamunywisa. 19Obuyamazire okumunywisa yagamba ati Ndatahi’ra nengamira zawe nazo zinywe okuhikya obuzirakakuka. 20Yayanguha yasesa omunagagwe omu kyesegenyi, yairuka nagaruka ha iziba okutaha yatahira engamiraze zona. 21Omusaija yamugumyaho amaiso; aculire okumanya MUKAMA obwaraba amuhaire omugisa omu muhandagwe, rundi tamuhaire. 22Kandi kyahika engamira obuzakukire, omusaija yakwata empeta eyezabu, obulemezi bwayo kicweka kya sekeri, nebikomo bibiri obyokuba ha mikonoye, obulemezi byabyo sekeri ikumi ezezabu; 23nagamba ati Iwe oli mwana woha? ngambira nkwesengerize. Haroho omwanya omu nju ya so turalemu? 24Yamugambira ati Nyowe ndi muhara wa Besueri, omwana wa Mirika ouyazaire Nahora. 25Kandi yamugambira ati Tunyina obunyansi kandi nebyokulya ebirazimara. kandi nomwanya ogwokuraramu. 26Omusaija yainama, naramya MUKAMA 27Yagamba ati mukama akugizibwe, Ruhanga wa MUKAMA wange Iburahimu, ataleka okuganyirakwe namazimage, hali Mukama wange nyowe MUKAMA anyebembire omu muhanda hali enju ya baganzi ba mukama wange. 28Omuisiki yairuka, yagambira abomu nju ya nyina nkebigambo ebi okubiri. 29Kandi Rebeka akabanyina wanyina ibaralye nuwe Labani: na Labani yaturuka nairuka hali omusaija, hali ensoro yamaizi. 30Kandi kyahika obuyaboine empeta nebikomo ha mikono ya wanyina, kandi obuyahulire ebigambo bya Rebeka owanyina, nagamba ati; nukwo omusaija angambire ati;yaija hali omusaija; kandi dora, akaba ayemerire ha mbaju zengambira ahali ensoro, yamaizi. 31Yagamba ati Taha iwe MUKAMA owaha omugisa; kiki ekikwemerize aheru? Baitu ntekanize enju, nekiikaro kyengamira. 32Omusaija yataha omu nju, yasumu’ra engamira, yaha obunyansi nebyokulya ebyengamira, namaizi agokunabisa ebigerebye, nebigere byabasaija abakaba bali nauwe. 33Kandi bata ebyokulya omu maisoge alye; baitu yagamba ati Tindye, ntakagambire ebinatumirwe. Yagamba ati Gamba. 34Yagamba ati Nyowe ndi muiru wa Iburahimu. 35MUKAMA akaha mukama wange omugisa mwingi; kandi afokere mukuru: kandi akamuha embuzi nente, nefeza nezabu, nabairu nabazana, nengamira nenkaina. 36Na Sara mukazi wa mukama wange akaza’ra mukama wange omwana omwojo obwakaba akaikuire: kandi ogu amuhaire byona ebyanyinabyo. 37Na mukama wange akandahiza nagamba ati Otaliswere’ra omwana wange omukazi aliruga omu bahara Babakanani abanyikaize omu nsi yabu: 38baitu oligenda hali enju ya isenyowe na hali bene baitu nuho oliswere’ra omwana wange omukazi. 39Nagambira mukama wange nti Rundi omukazi taliikiriza okuija nanyowe. 40Yangambira ati MUKAMA oungendera omu maisoge, nuwe alituma maraikawe hamu naiwe, alikuha omugisa omu muhanda gwawe; naiwe oliswere’ra omwana wange omukazi aliruga omu bene baitu, nomu nju ya isenyowe:
41Nubwo otaliba nomusango habwokurahira kwange Obwolitaha omu bene baitu; nabo obubatalimukuha iwe toliba nomusango ahabwokurahira kwange. 42Kandi mpikire hati hali ensoro yamaizi nagamba nti Ai MUKAMA, Ruhanga wa mukama wange Iburahimu, obworaha omugisa hati orugendo rwange orundukugenda: 43dora, nyemerire hali ensoro yamaizi; nukwo kibe kiti, omuisiki araturuka okuleta, oundagambira nti ompe, nkwesengerize, otuizi omu munaga gwawe, nywe, 44nauwe arangambira ati Nywa iwe, kandi ndatahira engamira zawe; ogu abe omukazi MUKAMA ouyaragirire omwana wa mukama wange., 45Kandi obumbaire ninkigamba omu mutima gwange, dora, Rebeka yaturuka anyina omunaga ha ibega; yasirumuka ha nsoro yataha: namugambira nti Leka nywe, nkwesengerize. 46Yayanguha, yaiha omunagagwe ha ibega, nagamba ati Nywa, kandi ndayesera nengamira zawe: nanywa nauwe yayesera nengamira. 47Namukaguza ningamba nti Iwe oli mwana woha? Yagamba ati omwana wa Besueri mutabani wa Nahora, Mirika ouyamuzalire:namujweka empeta ha mikonoye nebikomo ha mikonoye. 48Nainama nindamya MUKAMA, ninsima MUKAMA Ruhanga wa mukama wange Iburahimu, ayanterekerize omu muhanda gwo nyini okuswere’ra omwanawe omuhara wa mugenzi wa mukama wange. 49Na hati obumuraikiriza okuko’ra mukama wange ebyembabazi nebyamazima, mungambire, kandi obumuraba mutarukuikiriza mungambire; nukwo mpinduke ha mukono gwobulyo rundi ogwemoso. 50Labani na Besueri nubwo bagarukamu nibagamba ngu Ekigambo eki kirugire hali MUKAMA; titusobora okukugambira ebibi nobubyakuba ebirungi. 51Dora, Rebeka ali omu maiso gawe, mutwale ogende, abe mukazi womwana wa mukama wawe, nka MUKAMA okwagambire. 52Kandi kyahika, omuiru wa Iburahimu obuyahulire ebigambo byabu, yainamira MUKAMA hansi. 53Kandi omuiru yaleta ebikwato ebyefeza, nebyezabu, nebyokujwara, yabiha Rebeka; kandi yaha munyanya na nyina ebintu ebyomuhendo mwingi. 54Kandi balya banywa, uwe nabasaija abakaba anyinabo, barara bakiisa obuire, baimuka nyenkya, yagamba ati Mundagire, ngende hali mukama wange. 55Kandi munyanya na nyina bagamba ngu Leka omuisiki amale naitwe ebiro bike, ikumi rundi okukiraho; hanyuma agende. 56Yabagambira ati Mutanyikazaho, baitu MUKAMA ahaire omugisa orugendo rwange; mundagire ngende hali mukama wange. 57Bagamba ngu Turayeta omuisiki, tumukaguze omu kanwake. 58Bayeta Rebeka nibamugambira ngu Oragenda nomusaija onu? 59Yagamba ati Ndagenda. Baraga Rebeka munyanyabo, nomuleziwe, nomuiru wa Iburahimu, nabasaijabe. 60Basabira Rebeka omugisa, nibamugambira ngu munyanya itwe, obe nyina abantu obukumi enkumi, na baijukuru bawe batungege irembo lyabo ababanoba. 61Kandi Rebeka akaimuka nabazanabe, batemba ha ngamira, nibagenda nomusaija: omuiru yatwara Rebeka yayegedera. 62Kandi Isaka akaija arugire omu muhanda gwa Beeri-rahai-roi; baitu akaba naikara omu nsi yobukizi Bwobulyo. 63Isaka yaturuka okucumitiriza omu musiri akairirizi: yaimukya amaisoge yarora, kandi dora engamira niziija. 64Kandi Rebeka yaimukya amaisoge, obuyaboine Isaka yaruga ha ngamira. 65Yagambira omuiru ati Musaija ki ogu arukugenda omu musiri okututangatangana? Omuiru yagamba ati Nuwe mukama wange: Nubwo yakwata orugoyerwe orusweka ha maiso yayesweke’ra. 66Omuiru yagambira Isaka byona ebiyakozire. 67Isaka yamuleta omu hema ya nyina Sara, yaswera Rebeka, yaba mukaziwe; yamugonza: Isaka yahumuzibwa habwokufa kwa nyina.