23
1KANDI Sara akahikya emyaka kikumi mwabiri mu musanju: egi niyo myaka Sara eyiyahikize. 2Sara akafera Kiryasi-araba (niyo Heburoni) omu nsi ya Kanani: Iburahimu yaija okugaraga’ra Sara noku’ra habwe. 3Iburahimu yaimuka naruga ha mutumbigwe, yagambira abana ba Hesi ati 4Nyowe ndi musuhuki kandi omugonyi namberemuli: mumpe ekiikaro ekyokuzikamuga okuba obutaka omu nsi yanyu, nzike omutumbi gwange okutagurorahoga. 5Abana ba Hesi bagarukamu Iburahimu nibamgambira ngu otuhu’re MUKAMA wange: 6iwe oli omunyoro mukuru omulitwe: zika omutumbi gwawe omu bituro byaitu nambere orakasima; busaho omulitwe arakwima ekiturokye okutazika omutumbi gwawe. 7Iburahimu yaimuka yainamira abantu abomu nsi, nibo bana ba Hesi. 8Yabaza nabo nagamba ati obumuraba nimusima nyowe nzike omutumbi gwange okutagurorahoga, mumpu’re munyesengerereze Eferoni omwana wa Zohara, 9ampe obuingira obwa Makepera, obwanyinabwo, obuli ha mutano gwomusirigwe; abunguze omuhendo gwabwo oguhikire ahagati omulinywe okuba obutaka obwekituro. 10Kandi Eferoni akaba aikalire hagati yabana ba Hesi: Eferoni Omuhiti yagarukamu Iburahimu, abana ba Hesi nibahu’ra, bo bona abatahire omu irembo lyorubuga, 11nagamba ati Nangwa Mukama wange, ompu’re: omusiri ngukuhaire, nobuingira obugurumu mbukuhaire; omu maiso gabana babantu bange mbukuhaire; zika omutumbi gwawe. 12Iburahimu yainama omu maiso gabantu abomu nsi. 13Yagambira Eferoni abantu abomu nsi nibahu’ra nagamba ati obworasima, nkwesengerize ompu’re: ndamara omuhendo ogwomusiri; ikiriza ogutwale, nanyowe ndazikamu omutumbi gwange. 14Eferoni yagarukamu Iburahimu namugambira ati Mukama wange ompu’re: 15akasiri omuhendo gwako esekeri ezefeza bikumi bina, kintu ki hali nyowe naiwe? nukwo zika omutumbi gwawe. 16Iburahimu yahu’ra Eferoni: Iburahimu yalengera Eferoni efeza ezakaba agambire, abana ba Hesi nibahu’ra esekeri ezefeza bikumi bina, nkefeza eya bukyabukya eyomuguzi okwekaberi. 17Nukwo omusiri gwa Eferoni ogukaba guli Makepera, erolerire Mamire, omusiri nobuingira bwamu, nemiti yona ekaberi omu musiri, ekaba eli omu mutano gwagwo gwona okwehinguliriza, 18bikagumibwa hali Iburahimu okuba obutakabwe omu maiso gabana ba Hesi, omu maiso ga bona abatahire omu irembo lyorubugarwe. 19Hanyuma yebi Iburahimu yazika Sara mukaziwe omu buingira obwomu musiri ogwa Makepera erolerire Mamire (niyo Heburoni), omu nsi ya Kanani. 20Nomusiri nobuingira oburumu bikagumibwa abana ba Hesi hali Iburahimu okuba obutakabwe obwekituro.