22
1Kadi kyahika hanyuma yebi, Ruhanga akalega Iburahimu, yamugambira ati Iburahimu, yagamba ati Dora nyowe. 2Yagamba ati Twara hati omwana wawe omu wenka, owogoza, nuwe Isaka, ogende omu nsi ya Moliya;kandi omuhereyo okuba ekihongwa ekyokeze ha rumu ha nsozi orundikugambira. 3Iburahimu yaimukya nyenkya omu rukyakya, yatandika enkainaye, yatwara babiri ha basigazibe hamu nauwe, na Isaka omwanawe, yayasa enku ezekihongwa ekyokeze, yaimuka yagenda omu kiikaro Ruhanga ekiyamugambireho. 4Ha kiro kyakasatu Iburahimu yaimukya amaisoge yaleba ekiikaro kiri hara. 5Iburahimu yagambira abasigazibe ati inywe muikale hanu nenkaina, nanyowe nomwojo turagenda oku; turaramya taragaruka namberemuli. 6Iburahimu yatwara enku ezikihongwa ekyokeze, yazitweka Isaka omwanawe, yakwata omuhyo nomu’ro omungaroze; bagenda bombi ahamu. 7Isaka yagambira Iburahimu ise ati Tata: Yagamba ati Dara nyowe, mwana wange. yagamba ati Dora omu’ro nenku mbinu: baitu eraha entama eyekihongwa ekyokeze? 8Iburahimu yagamba ati Ruhanga arayebonera entama eyekihongwa ekyokeze, mwana wange: nukwo bagenda hamu bombi. 9Kandi bahika omu kiikaro Ruhanga ekiyamugambireho; Iburahimu yayombeka oku ekyoto, yahingika enku, yaboha Isaka omwanawe, yamugaramya ha kyoto ha nku. 10Iburahimu yago’ra omukonogwe, yakwata omuhyo okusara omwanawe. 11Maraika wa MUKAMA yamwami’ra nayema omu iguru, nagamba ati Iburahimu, Iburahimu, yagamba ati Dara nyowe. 12Yagamba ati Otata mukono gwawe ha mwojo; kunu otamukora kigambo: baitu hati bunu manyire notina Ruhanga, baitu tonyimire omwana wawe, omwo ana wawe omu wenka. 13Iburahimu yaimukya amaisoge narora, kandi dora, enyumaye entama empaya ekwasirwe omu kisaka amahembe gayo: Iburahimu yagenda yatwara empaya, yagihayo okuba ekihongwa ekyokeze omu kiikaro kyomwanawe. 14Iburahimu yaruka ekiikaro eki Yahwe alibona: nkokukigambwa na hati ngu Ha rusozi rwa MUKAMA kiribonwa. 15Maraika wa MUKAMA yayeta Iburahimu omurundi ogwakabiri nayema omu iguru nagamba ati 16Nyerahirire nyenka, nukwo agambire MUKAMA, baitu okozire ekigambo kinu, kandi tonyimire omwana wawe; omwana wawe omu wenka: 17nti okuha ndakuhaga omugisa, nokwongera ndakwongerahoga abaijukuru bawe nkenyunyuzi ezomu iguru, kandi nkomusenyi oguli ha musa gwenyanja, kandi noruzaro rwawe alitunga irembo eryabanyanzigwa be; 18kandi omu baijukuru bawe amahanga gona agomu nsi numwo galiherwa omugisa; baitu ohulire iraka lyange. 19Nubwo Iburahimu yagaruka hali abasigazibe, baimuka bagenda hamu Beeriseba; Iburahimu yaikara Beeriseba. 20Kandi kyahika hanyuma yebi bagambira Iburahimu ngu Dora, Mirika nauwe akaza’ra abana mugenzi wawe Nahora; 21Uzi omuzigaijowe, na Buzi mugenziwe, na Kemueri ise 22Aramu; na Kesedi na Hazo na Piridasi na Yidurafu na Besueri. 23Besueri akazara Rebeka: abo munana Mirika akabaza’ra Nahora mugenzi wa Iburahimu. 24Kandi nomuzanawe ibaralye nuwe Reuma nauwe akazara Teba, na Gahamu na Tahasi na Maaka.