21
1Kandi MUKAMA akaizira Sara nkokuyagambire, kandi MUKAMA yakora Sara nkokuyabalize. 2Sara yaba nenda, yaza’ra Iburahimu omwana omwojo omu bugurusibwe, omu kasumi ako akatairweho. Ruhanga akayamugambireho. 3Iburahimu yaruka omwanawe ayamuzalirwe Sara ouyamuzalire, ibaralye Isaka. 4Iburahimu yasara omwanawe Isaka akaba ahikize ebiro munana, nka Ruhanga okuyamuragire. 5Iburahimu akaba ahikize emyaka kikumi, omwanawe Isaka obuyamuzalirwe. 6Kandi Sara yagamba ati Ruhanga ansekesaze; wena arahu’raga arasekaga nanyowe. 7Yagamba ati Noha yakugambire Iburahimu ati Sara alyonkya abana? baitu muzalire omwana omwojo omu bugurusibwe.
8Omwana yakura yacuka: Iburahimu yacumba obugenyi bwingi ha kiro Isaka ekiyacukiremu. 9Kandi Sara akarora omwana wa Hagara omumisiri, ouyazalire Iburahimu, naseka. 10Nikyo yagambirire Iburahimu ati Binga omuzana onu nomwanawe: baitu omwana womuzana onu taliba mugwetwa hamu nomwana wange Isaka. 11Ekigambo eki kyalemera muno omu maiso ga Iburahimu habwomwanawe. 12Ruhanga yagambira Iburahimu ati kireke okuremera omu maiso gawe habwomwojo na habwomuzana wawe; omu byona Sara ebyakugambira ohu’re irakalye; Baitu omu Isaka abaijukuru bawe numwo barayeterwaga. 13Kandi nomwana womuzana nauwe ndimufora ihanga, baitu ruzaro rwawe. 14Iburahimu yaimuka nyenkya omu rukyakya, yatwara ebyokulya nendyanga yamaizi, yabiha Hagara nabita ha mabegage nomwana, yamwohereza: yarugayo, yagendagenda omu irungu lya Beeri-seba. 15Kandi amaizi gomu ndyanga gakaba gahoiremu, yanaga omwana hansi yekijumba. 16Nauwe yagenda yaikara hansi namurole’ra hara, nkomwanya gwengobe nambere egwa: baitu yagamba ati Ndeke okurora omwana nafa. Yiaka’ra omurolerire yaimukya irakalye na’ra. 17Ruhanga yahu’ra iraka lyomwojo; maraika wa Ruhanga yayeta Hagara nayema omu iguru, yamugambira ati Obaire ki Hagara? otatina; baitu Ruhanga ahulire iraka lyomwojo namberali. 18Imuka, oimukye omwojo omukwate omu mukono gwawe; baitu ndimufora ihanga eringi. 19Ruhanga yaigura amaisoge yarora iziba lyamaizi; yagenda yaijuza endyanga yamaizi yanywisa omwojo. 20Ruhanga akaikara nomwojo, yakura; yaikaraga omu irungu, yafoka omurasi wengobe. 21Kandi akaikara omu irungu lya Parani; nyina yamuswere’ra omukazi womu nsi ya Misiri. 22Kandi kyahika omu biro ebi Abimereki na Fikoli engabwa yihelye bakagambira Iburahimu ngu Ruhanga ali hamu naiwe 23omu byona ebyorukukora: ni kyo ondahirire Ruhanga hati bunu hanu ngu Tombihabihege nyowe, nobwakuba omwana wange; nobwakuba omuijukuru wange: baitu nkembebazi ezinakugirire okuziri nukwo arangi’ra nyowe, nensi nambere waikare. 24Iburahimu yagamba ati Ndarahira. 25Kandi Iburahimu yahana Abimereki habwiziba lyamaizi abairu ba Abimereki eribamuuihireho namani. 26Abimereki yagamba ati Timanyire ogu ayakozire ekigambo kinu: kandi otangambire, kandi tinkakihu’raga, rundi hati honka. 27Iburahimu yatwara entama nente, yabiha Abimereki; kandi bakaragana ekiragano abo babiri. 28Kandi Iburahimu yata ebyana byentama erusi musanju ebyomu igana ha wabyo byonka. 29Abimereki yagambira Iburahimu ati Ebyana byentama binu erusi musanju ebyotaire hawabyo byonka amakuru ki? 30Yagamba ati Ebyana byentama binu erusi musanju orabihabwa omu mukono gwange, okuba kaiso namberendi ngu Ninyowe nalimire iziba linu. 31Nikyo yayetire ekiikaro eki Beeri-seba, baitu nuho barahire bombi. 32Nukwo bati bakaragana ekiragano Beeri-seba: Abimereki yaimuka na Fikoli engabwa yiherye, bagarukayo omu nsi Yabafirisiti. 33Iburahimu yasimba omuti omu Beeri-seba, nuho yakungire ibara lya MUKAMA, Ruhanga atahwaho. 34Iburahimu akagonya omu nsi Yabafiristi ebiro bingi.