18
1KANDI MUKAMA akamubonekera hali emihomozi ya Mamire, obwakaba aikalire omu mulyango gwehema omuihangwe; 2yaimukya amaisoge narora, kandi dora, abasaija basatu bemerire omu maisoge kandi obuyababoine, yaruga omu mulyango gwehema nairuka okubatangi’ra nainama hansi, 3nagamba ati Mukama wange obundaba mpairwe omugisa hati bunu omu maiso gawe, otaruga hali omuiru wawe nkwesengerize: 4balete hati bunu otuizi munabe omu bigere, muhumule hansi yomuti: 5nanyowe ndaleta akagati, musemererwe nemitima yanyu; hanyuma muragenda, baitu nikyo muizire hali omuiru wanyu. Bagamba ngu Kora oti nkokwogambire. 6Iburahimu yayanguha nataha omu hema hali Sara, nagamba ati Tekaniza bwango endengo isatu ezensano, ogigoye ocumbe emigati. 7Iburahimu yairukira hali igana,yataba’ra enyana erukworoba esemire, yagiha omuiru; yayanguha yagicumba. 8Yatwara amagita namata nenyana eyiyacumbire, yabita omu maiso gabu; kandi yayeme’ra ha rubaju hansi yomuti, balya. 9Bamugambira ngu alinkaha Sara mukazi wawe? Dora, ali mu hema. 10Yagamba ati mazimakwo ndikugarukira akasumi obukaliija: kandi dora, Sara mukazi wawe alizara omwana omwojo. Kandi Sara yahu’ra ali omu mulyango gwehema, ekabari enyumaye. 11Kandi Iburahimu na Sara bakaba bakuzire, bahinguraine obukuru; kandi Sara akaba takiri omu ngeso zabakazi okuziri. 12Sara yaseka, omundaye nagamba ati nyowe obumazire okukikura ndisemererwa, MUKAMA wange nauwe agurusire? 13MUKAMA yagambira Iburahimu ati kiki ekimusekeze sara nagamba ati okuzara ndizara ndi mukaikuru? 14Haroho ekirukulema MUKAMA? Ha kasumi akatairweho ndikugarukira, akasumi obukalihika, kandi Sara alizara omwana omwojo. 15Sara nubwo yahakana nagamba ati Tinsekere; baitu akatina. Yagamba ati Nangwa; baitu osekere.
16Kandi abasija bakaimuka okuruga oku, nibarole’ra Sodomu: kandi Iburahimu yagenda nabo okubasendekereza. 17MUKAMA yagamba ati Ndasereka Iburahimu ekindikukora? baitu mananukwo 18Iburahimu alifoka ihanga erikoto eryamani, kandi amahanga gona agahansi galiherwa omugisa omuluwe? 19Baitu nikyo namumanyire, aragire abanabe nenjuye hanyumaye, bakwatege, omuhanda gwa MUKAMA, okukoraga ebyokuhiki’ra nebyobulyo; nukwo MUKAMA alete hali Iburahimu ebiyamugambireho. 20MUKAMA yagamba ati Baitu oku’ra kwa Sodomu na Gomora kwingi, kandi okusisa kwabu kwamahano; 21nikyo ndasirimukira hati ndole obubaraba bakolire kimu nkoku’ra kwayo okukuli, okwahikire hali nyowe; kandi obukiraba kitalikyo, ndamanya. 22Abasaija baruga oku nibagenda Sodomu, baitu Iburahimu akaba akyayemereire omumaiso ga MUKAMA. 23Iburahimu yai’ra haihi yagamba ati olihwerekereza abahikirire hamu nababi? 24rundi omu rubuga haliba harumu abahikirire amakumi atano: olihwerekereza okutaganyira ekiikaro habwabahikirire atano abarumu? 25Mahano okukora oti:, okuita abahikirire hamu na babi, kandi abahikirire okuingana nababi; mahano okukora oti: Omucwi wemisango yensi zona talikora ebyokuhiki’ra? 26MUKAMA yagamba ati Obundarora omu Sodomu abahikirire atano omunda yorubuga, nubwo ndaganyira ekikaro kyona habwabu. 27Iburahimu yagarukamu nagamba ati Dora ‘nu, nyowe nyerengere okubaza na Mukama, nobundi cucu kwonka niju: 28rundi ha bahikirire atano haliburaho batano: olihwerekereza orubuga rwona habwokuburaho batano? yagamba ati Tinduhwerekereza obundasagayo ana nabatano. 29Yagaruka okubaza nauwe nagamba ati Rundi harazokayo ana. Yagamba ati Tinkikole habwabu ana. 30Yagamba ati Nyesengerize Mukama atabihirwa, nanyowe kangambe rundi harazokayo asatu. yagamba ati Tinkikole obundasangayo asatu. 31Yagamba ati dora ‘nu nyowe nyerengere okubaza na Mukama: rundi harazokayo abiri. Yagamba ati Tinduhwerekereze habwabo abiri. 32Yagamba ati nyesengerize Mukama atabihirwa, nyowe kangambe omurundi gunu gumu gwonka: rundi harazokayo ikumi. Yagamba ati Tindihwerekereze habwabo ikumi. 33MUKAMA yayegendera obuyamazire okubaza na Iburahimu. Iburahimu yagarukayo omu kiikarokye.