17
1Kandi Iburamu obwakabaka ahikize emyaka kyenda mu mwenda, MUKAMA yabonekera Iburamu namugambira ati Ninyowe Ruhanga Wobusobozi bwona; genderaga omu maiso gange, ohiki’rege. 2Nanyowe ndiragana ekiragano kyange nyowe naiwe, kandi ndikukanyisa muno. 3Iburamu yagwa hansi ajumaire: Ruhanga yabaza nauwe nagamba ati 4Nyowe dora, ekiragano kyange kiri naiwe, kandi oliba ise amahanga maingi. 5Kunu tokyayetwaga ibara lyawe Iburamu baitu ibara lyawe lirabaga Iburahimu, baitu nkufoire ise amahanga maingi. 6Kandi ndikusagisa muno, kandi ndi kufora amahanga, nabakama baliruga omuliwe. 7Kandi ndigumya ekiragano kyange nyowe naiwe, noruzaro rawe hanyuma yawe okuhikya obusinge bwabu bwona, okuba ekiragano ekitalihwaho, okuba Ruhanga namberiwoli na hali oruzaro rwawe hanyuma yawe. 8Kandi ndikuha iwe noruzaro rwawe hanyuma yawe ensi eyiwagonyamuga, ensi yona eya Kanani, okugirya obusinge bwona; nanyowe ndaikaraga Ruhanga wawe. 9Ruhanga yagambira Iburahimu ati Naiwe orakwataga ekiragano kyange, iwe noruzaro rwawe hanyuma yawe omu businge bwabu bwona. 10Kinu nikyo kiragano kyange, ekimurakwataga, hali nyowe nainywe noruzaro rwawe hanyuma yawe; omusaija wena omulinywe arasarwaga. 11Kandi murasarwaga omubiri gwekisusu kyanyu; kandi karabaga akokuro’raho akekiragano hagati yange nainywe. 12Anyakuhikize ebiro munana arasarwaga omulinywe, omusaija wena omu businge bwanyu bwona, ogu arazalirwaga omu nju, kandi nogu omunyaihanga wena oubaraguzaga nebintu, atali womu ruzaro rwawe. 13Ogu arazarwaga omu nju yawe, nogu aragurwa nebintu byawekibahikire okusarwaga: nekiragano kyange kiraikaraga omu mubiri gwanyu okuba ekiragano ekitalihwaho. 14Kandi nomusaija atali musale, atarasazirwe omu mubiri ogwekisusukye, obwomezi obu buraihwaga omu bantu bowabu; acwire ekiraganokyange.
15Kandi Ruhanga akagambira Iburahimu ati Na Sarai mukazi wawe otalimweta ibaralye Sarai, baitu ibaralye lirabaga Sara. 16Kandi ndimuha omugisa, kandi ndikuha omwana omuluwe: ego, ndimuha omugisa, nauwe aliba nyina amahanga; abakama bamahanga baliruga omuluwe. 17Iburahimu nubwo yagwire hansi ajumaire, yaseka, yagamba omu mutimagwe ati Omwana aliza’rwa ogu ahikize emyaka kikumi? Na Sara ahikize emyaka kyenda alizara? 18Iburahimu yagambira Ruhanga ati kuba Isameri abaire ali omwomezi omu maiso gawe! 19Ruhanga yagamba ati Nangwa, baitu Sara mukazi wawe alikuza’ra omwana: naiwe olimuruka ibaralye Isaka: kandi ndigumya ekiragano kyange nauwe okuba ekiragano ekitalihwaho hali oruzarorwe hanyumaye. 20Kandi ebya Isameri nkuhulire; dora, muhaire omugisa kandi ndimukayisa kandi ndimusagisa muno; alizara abakuru ikumi nababiri, kandi ndimufora ihanga erikoto. 21Baitu ekiragano kyange ndikigumya hali Isaka, Sara owalikuza’ra omu kasumi ako akatairweho omu mwaka ogurukugenda okuija. 22Yareka okubaza nauwe, kandi Ruhanga yatemba naruga hali Iburahimu. 23Kandi Iburahimu yatwara Isameri omwanawe, na bona abazalirwe omu njuye, na bona abaguzirwe ebintubye, omusaija wena omu bantu bomu nju ya Iburahimu, yabasara omu mubiri ogwekisusu kyabu ha kiro eki, nka Ruhanga okuyamugambire. 24Iburahimu akaba ahikize emyaka kyenda mu mwenda obuyasazirwe omu mubibiri ogwekisusukye. 25Na Isameri omwanawe akaba ahikize emyaka ikumi nesatu obuyasazirwe omu biri gwekisusukye. 26Ha kiro kimu Iburahimu akasarwa, na Isameri omwanawe. 27Nabasaija bona abomu njuye, abo abazalirwe omu nju, nabo abaguzirwe nebintu hali omunyaihanga, bakasarwa hamu nauwe.