1
1KANDI kikahika omu biro bya Ahasuero (nuwe Ahasuero ogu ayalemere ensi okuruga Indiya, nokuhikya Esyopiya, amasaza kikumi mwabiri mu musanju): 2omu biro ebi, omukama Ahasuero obwakaba aikalire ha kitebe kyobukamabwe, ekikaba kiri omu Susana ekikali, 3omu mwaka gwobusingebwe ogwakasatu, akacumbira obugenyi abakurube bona nabairube; obusobozi bwa Peresi na Mediya, abanyoro nabakuru bamasaza bali omu maisoge: 4yayoleka obuguda obwobukamabwe obwekitinisa, nekitinisa ekyobukurubwe oburungi ebiro bingi, ebiro kikumi mu kinana. 5Kandi ebiro ebi obubyahinguireho, omukama yacumbira obugenyi abantu bona abakaba baloho omu Susani ekikali, abakuru nabato, ebiro musanju, omu zigati eyekibanja kya karuzika yomukama; 6hakaba haroho ebikingyo ebye ngoye ezirukwera, nezekijubwa, neza bu’ru, zibohererwe nemiguha yekitani ememire nengoye ezirukugajuka ha mpeta zefeza, nenyomyo zamabale: ebitabu bikaba biri byezabu nefeza, hamabale agalire agarukutukura, nagarukwera, negengere nagarukuiragura. 7Babaherereza ebyokunywa omu bintu byezabu (ebintu bikaba biri byemiringo nyingi, ebindi nebindi), namarwa gomukama maingi muno, nkokugaba kwomukama okukukaba kuli. 8Kandi okunywa kukaba kuli kwekiragiro; busaho kuhambiriza: baitu nukwo omukama yaragire ati abambukya bona abenjuye, bakole nkomuntu wena okuyagondeze. 9Na vasiti omugo akacumbira obugenyi abakazi omu nju yomukama akaberi yomukama Ahasuero. 10Ha kiro kya musanju, omutima gwomukama obugwasemerirwe habwamarwa, yaragira Mehumani, Bizisa, Harabona, Bigusa, na Abagusa, Zesa, na Karakasi, abakonwa musanju abaherezaga omu maiso ga Ahasuero omukama, 11balete Vasiti omugo omu maiso gomukama nekondo yomukama okwoleka abantu nabakuru oburungibwe: baitu akabali omurungi okurora. 12Baitu omugo Vasiti yayanga okuija habwekiragiro kyomukama omu mukono gwabakonwa: nikyo omukama yabihirirwe muno, ekinigakye kyayaka omuluwe. 13Nubwo omukama yagambira abasaija bamagezi abayetegerize ebiro (baitu nizo engeso zomukama hali bona abamanyire ebiragiro nebyobulyo; 14na Karasena, Sesara, Adimasa, Tarasisi, Meresi, Marasina, na Memukani, abakuru musanju aba Peresi na Mediya, abaroraga amaiso gomukama, kandi abaika’raga ha ntebe ezokubanza omu bukama, nibo bamukuratire): 15yabagambira ati Tulikora tuta Vasiti omugo nkebiragiro obubiri, baitu takozire nkomukama Ahasuero okwaragire habwabakonwa? 16Memukani yagarukamu omu maiso gomukama nabakuru ati Vasiti omugo tasisire omukama wenka, baitu nabakuru bona, kandi nabantu bona abali omu masaza gona agomukama Ahasuero. 17Baitu ekigambo kinu ekyomugo kiriranganwa hali abakazi bona, okuswaza abaibabo omu maiso gabu, obukiriranganwa ngu Omukama Ahasuero akaragira Vasiti omugo aletwe omu maisoge, baitu ataije. 18Kandi ha kiro kinu abago bona aba Peresi naba Mediya abahulire engeso yomugo, baligambira bati abakuru bona abomukama. Nukwo halibaho okugaya kwingi nokubihirwa. 19Obukiraba nikisimwa omukama, ekiragiro ekyomukama kiruge namberali, kihandikwe omu biragiro Byabaperesi Nabamedi, kitahinduka ngu Vasiti aleke okuija obundi omu maiso gomukama Ahasuero; kandi omukama omukazi ondi arukumukira oburungi. 20Kandi ekiragiro kyomukama ekyalikora obukiridumirwa obukamabwe bwona (baitu bukuru), bakazi bona balita ekitinisa ha baibabo, abakuru nabato. 21Ekigambo kyasimwa omukama nabakuru; omukama yakora, nkekigambo kya Memukani okukikaba kiri: 22baitu yatweka abaruha omu masaza gona agomukama, omu isaza lyona nkokuhandika kwalyo okukikaba kuli, nihanga lyona nkorulimi rwalyo okurukaba ruli, ngu Omusaija wena alemege omu njuye wenka, kandi ekidume nkorulimi rwabantu bowabu okurukaba ruli.