Swahili Bible2

32

1LERO abana ba Reubeni nabana ba Gadi bakaba banyina ente nyingi muno: obubaboine ensi ya Yazere, nensi ya Gireadi, dora, ensi ekaberi ensi yente; 2abana ba Gadi nabana ba Reubeni baija bagambira Musa na Eryeza nyakatagara nabakuru 3abekitebe ngu Atarosi, na Diboni, na Yazere na Nimura na Hesiboni na Ereale na Sebamu, 4na Nebo na Beoni, ensi MUKAMA eyiyatemere omu maiso gekitebe kya Isareri, ebaire ensi yente, kandi abairu bawe banyina ente. 5Bagamba ngu Obuturaba tuboine embabazi omu maiso gawe, ensi enu ehabwe abairu bawe okuba obutaka; otatwambura Yorudani. 6Musa yagambira abana ba Gadi nabana ba Reubeni ati Bene banyu baligenda okurwana, nainywe muliikara hanu? 7Kandi nimuntuntuliza ki omutima gwabana ba Isareri, baleke okwambuka okutaha omu nsi MUKAMA eyiyabahaire? 8Nukwo baisenkuru inywe bakozire bati obunabatumire okuruga Kadesi-baranea okurora ensi. 9Baitu obubatembere omu kihanga kya Esikoli, bararora ensi, batuntuza omutima gwabana ba Isareri, baleke okutaha omu nsi MUKAMA eyiyabahaire. 10Ekiniga kya MUKAMA kyayaka ha kiro eki, yarahira 11ati Mazimakwo busaho ha bantu abo abarugireyo omu Misiri abahikize emyaka amakumi abiri nokukiraho, abalirora ensi eyinarahirire Iburahimu, na Isaka, na Yakobo; baitu batankurati’re kimu: 12rundi Kalebu mutabani wa Yafune Omukenizi, na Yosuha mutabani wa Nuni: baitu bakakurati’ra kimu MUKAMA. 13Kandi ekiniga kya MUKAMA kyayakira Isareri, yabahambaza ahandi nahandi omu irungu emyaka amakumi ana, abantu abakozire kubi omu maiso ga MUKAMA, obubamazirweho. 14Kandi dora, inywe muimukire omu kiikaro kyabaisenkuru inywe, abaijukuru babantu ababi, okweyongera okukanyisa ekiniga ekya MUKAMA hali Isareri. 15Baitu obumuhinduka okumuragaho, aligaruka okubasiga omu irungu; kandi mulihwerekereza abantu banu bona. 16Bai’ra haihi namberali hanu amasibiko habwembuzi zaitu, nembuga habwabana abato baitu: 17baitu itwenka tulikwata ebyokurwanisa okwebembera abana ba Isareri, okuhikya obutulibatahya omu kiikaro kyabu: nabana abato baitu baliikara omu mbuga eziroho muhuruzi habwabantu bomu nsi. 18Tituligaruka omu nju zaitu, okuhikya abana ba Isareri obubaligwetwa omuntu wena obugwetwabwe. 19Baitu itwe tituligwetwa hamu nabo enseri ya Yorudani nokweyongerayo; baitu obugwetwa bwaitu butugwerire ensi ya kunu yea Yorudani eburagaizoba. 20Musa yagambira ati Obumulikora ekigambo eki; obumulikwata ebyokureanisa, mugende okurwana omu maiso ga MUKAMA, 21Kandi omuntu wena omulinywe anyina ebyokurwanisa obwalyambuka Yorudani omu maiso ga MUKAMA, okuhikya obwalibingamu abanyanzigwabe omu maisoge, 22nensi erisingurwa omu maiso ga MUKAMA: hanyuma muligaruka, kunu timuliba nomusango omu maiso ga MUKAMA na hali Isareri; nensi enu eriba namberemuli obutaka omu maiso ga MUKAMA. 23Baitu obumutalikora muti dora, buli musisire MUKAMA: kandi mumanyire kimu ngu ekibi kyanyu kiribahiga. 24Mwombeke embuga habwabana abato banyu, namasibiko habwentama zanyu; kandi mukole eki ekirugire omu kanwa kanyu. 25Abana ba Gadi nabana ba Reubeni gabambira Musa ngu Abairu bawe balikora nka mukama wange okwaragire. 26Abana abato baitu, nente zaitu zona, biriikara oku omu mbuga za Gireadi: 27baitu abairu bawe balyambuka, omuntu wena akwasire ebyokurwanisa, omu maiso ga MUKAMA okurwana, nka mukama wange okwagambire.

28Nukwo Musa yabaragi’ra Eryeza nyakatagara, na Yosuha mutabani wa Nuni, nemitwe eyenju zabaisebo abenganda zabanaba ba Isareri. 29Musa yabagambira ati Abana ba Gadi nabana ba Ruebeni obubalyambuka Yorudani hamu nainywe, abasaiija bona abanyina ebyokurwanisa, omu maiso ga MUKAMA, nensi obwerisingurwa omu maiso ganyu: nubwo mulibaha ensi ya Gireadi okuba obutaka: 30baitu obubalyanga okwambuka hamu nainywe bakwasire ebyokurwanisa, baliba nobutaka hamu nainywe omu nsi ya Kanani. 31Abana ba Gadi nabana ba Reubeni bagarukamu nibagamba ngu Nka MUKAMA okwagambire abairu bawe, nukwo tulikora tuti. 32Tulyambuka tukwasire ebyokulwanisa omu maiso ga MUKAMA, omu nsi ya Kanani, nobutaka obwobugwetwa bwaitu burabaga naitwe enseri ya Yorudani. 33Musa yabaha, abana ba Gadi, nabana ba Reubeni, nekicweka kyoruganda ekya Manase mutabani wa Yusufu, obukama bwa Sihoni omukama Wabamoli, nobukama bwa Ogi omukama wa Basani, ensi nkembuga zayo okuziri hamu nemitano, embuga ezomunsi eyahe’raine. 34Nabana ba Gadi bakombeka Diboni, na Atarosi, na Aroere: 35Na Atirosi- sofani, 36na Yazere, na Yogibeha; na Besi-nimura, na Besi-harani: embuga eziroho muuruzi, namasibiko agentama. 37Nabana ba Reubeni bakombeka Hesiboni, na Ereale, na Kiryasaimu; 38na Nebo, na Baali-meoni; (bahindura amabara gazo,) na Sibuna: baruka embuga ezibayombekere amabara agandi. 39Nabana ba Makiri mutabani wa Manase akagenda Gireadi, yaginyaga, yagyaka Abamoli abakaba barumu. 40Kandi Musa yaha Gireadi Makiri mutabani wa Manase; yaikaramu. 41Kandi Yairi mutabani wa Manase yagenda yanyaga embuga zayo, yazeta Havosi-yairi. 42Kandi Noba yagenda yanyaga Kenasi, nembuga zayo, yagyeta Noba, nkibaralye wenka okuliri.