Swahili Bible2

30

1KANDI Musa akagambira emitwe yenganda ezabana ba Isareri nagamba ati Kinu nikyo kigambo MUKAMA ekiyaragire.

2Omusaija obwalima nayeraga okweraga hali MUKAMA, rundi narahira ekirahiro okweboha wenka nekigambo, atalisisa ekigambokye; alikora byona nkokubyarugire omu kanwake. 3Kandi nomukazi obwaliba nayeraga okweraga hali MUKAMA, nayeboha wenka nekigambo, akiri omu nju ya ise, omu butobwe; 4na ise nahu’ra okweragakwe, nekigambo ekiyayebohere nakyo wenka, ise naculera namberali: nubwo okweraga kwe kwona kuligumaho, nebigambo byona ebiyayebohere nabyo wenka birigumaho. 5Baitu ise obwaliba nayanga ha kiro eki ekyalihu’ramu, okweragakwe kwona, rundi ebigambobye ebiyaebohere nabyo wenka tikirigumaho na kake: kandi MUKAMA alimuganyira, baitu ise ayangire. 6Kandi obwaliba anyina iba, nokweragakwe kumuloho, rundi ebigambo ebiyayangurize na kanwake. ebiyayebohere nabyo wenka: 7iba nakihu’ra, naculera’mu: nubwo okweragagwe kuligumaho, nebigambobye ebiyayebohere nabyo wenka birigumaho. 8Baitu iba obwaliba nayanga ha kiro ekyalikihu’ramu; nubwo alidibya okweragakwe okumuloho, nebigambo ebiyayanguhirize nakanwake, ebiyayebohere wenka: kandi MUKAMA alimuganyira. 9Baitu okweraga okwomufakati,rundi okwogu abingirwe iba, ebigambo byona ebiyayebohere nabyo wenka birigumaho namberali. 10Kandi obwaliba ayeragire omu nju ya iba, rundi ayebohere wenka nekigambo hamu nekirahiro, 11kandi iba akihulire, kandi aculire namberali, kunu tayangire; nubwo okweragakwe kwona kuligumaho, nebigambo byona ebyayebohere nabyo wenka birigumaho. 12Baitu iba obwaliba abisisire, kandi ebidibize ha kiro ekiyabihuliriremu; nubwo ekigambo kyona ekyokweragakwe ekyarugire omu kanwaka, rundi ekyekirahirokye, tikirigumaho; iba abidibize; kandi MUKAMA alimuganyira. 13Okweraga kwona, rundi ekirahiro kyona ekyamani ekyokubonabonesa obwomezi, iba nasobora okukidibya. 14Baitu iba obwaliba nacule’ra kimu namberali okukyabukya, buli agumize okweragakwe kwona, rundi ebigambobye byona ebimuloho: abigumize, baitu akaculera namberali ha kiro ekiyabihuliriremu. 15Baitu obwaliba nabisisa, kandi nabidibya hanyuma yokubilihu’ra; nubwo alibaho okutahiki’ra kwa mukaziwe. 16Ebi nibyo biragiro, MUKAMA ebiyaragire Musa ebyomusaija nomukaziwe, ebya ise nomuharawe, omu butobwe ali omu nju ya ise.