Swahili Bible2

18

1KANDI MUKAMA akagambira Aroni ati Iwe na batabani bawe nenju ya ‘so hamu naiwe murabahoga okutahiki’ra okwa harukwera: iwe na batabani bawe hamu naiwe murabahoga okutahiki’ra okwobunyakatagara bwanyu. 2Nabagenzi bawe abomu ruganda rwa Levi, oruganda rwa ‘so, abairize haihi hamu naiwe, bateranizibwe naiwe, bakuherezege: baitu iwe na batabani bawe hamu naiwe baraikaraga omu maiso gehema yobwakaiso. 3Kandi barakwataga ebiragiro byawe nibiragiro Byehema: kimu kyonka batalii’ra haihi na bintu ebya harukwera nobuhokuba ha kyoto batafa, nobubakuba bo nobubakuba inywe. 4Kandi baliteranizibwa naiwe bakwetege ebiragiro ebyehema yokutangatanganiramu, habwomulimo gwona ogwehema: kandi atali wowanyu atalibai’ra haihi. 5Kandi murakwataga ebiragiro ebya harukwera, nebiragiro ebyekyoto: haleke okubaho ekiniga obundi ha bana ba Isareri. 6Nanyowe dora, nyowe nyihire abagenzi banyu Abalevi omu bana ba Isareri: bali kisembo namberemuli, ekihairweyo hali MUKAMA, bakolege okuhereza okwehema yokutangatanganiramu. 7Naiwe na batabani bawe hamu naiwe muralindaga obunyakatagara bwanyu habwebintu byona ebyekyoto, kandi habweki ekiri omunda yenyigamo; kandi muraherezaga: mbahaire obunyakatagara okuba okuhereza okwekisembo: kandi atali wowanyu alii’ra haihi aliitwa.

8Kandi MUKAMA yagambira Aroni ati Nanyowe dora, nkuragirire ebihongwa byange ebihimbwa, ebintu byona ebirukwezebwa, ebyabana ba Isareri, niwe mbihaire habwokuseswaho amagita, na batabani bawe, okuba nkibanja ebiro byona. 9Kinu kirabaga kyawe ha bintu ebirukukira okwera, ebiihwa ha mu’ro: ebisembo byabu byona, nukwo kugamba ngu ebihongwa byabu byona ebyebyokulya, nebihongwa byabu byona byekibi, nebihongwa byabu byona ebyomusango ebibaletaga namberendi, nibyo birabaga ebirukwera namberiwoli na batabani bawe. 10Nkebintu ebirukukira okwera okubiri, nukwo orabiryahoga: omusaija wena arabiryahoga; kirabaga ekirukwera, namberoli. 11Na kinu kyawe; ekihongwa ekihimbwa ekyomu kisembo kyabu, ebihongwa byona ebihimbwa ebyabana ba Isareri, mbihaire iwe, na batabani bawe nabahara bawe hamu naiwe okuba nkibanja ebiro byona: omuntu wena owomu nju yawe asemire nuwe arabiryahoga. 12Amagita gona agarukukira oburungi, nemizabibu yona erukukira oburungi, nengano, emiganuro yebi ebibahayo hali MUKAMA, niwe mbihaire ebi. 13Ebyana ebirukubanza okwenga hali ebi ebiri omu nsi yowabu, ebibaleta hali MUKAMA, birabaga byawe; omuntu wena owomu nju yawe anyakusemire nuwe arabiryahoga. 14Ekintu kyona ekinyakusororwa omu Isareri kiriba kyawe. 15Ekintu kyona ekizigaijo, ha byona ebinyina omubiri ebibahona hali MUKAMA, abantu nebisoro birabaga byawe: kyonka omuzigaijo wabantu mazimakwo olimucunguza, nomuzigaijo ogwebisoro, ebitasemire olibicunguza. 16Kandi ebyokucungurwa hali ebi ebihikize okwezi kumu orabicunguzaga nkokworaramuraga habwefeza eza sekeri itano, nka sekeri eya harukwera okweri (egi neyingana gera amakumi abiri). 17Baitu omuzigaijo gwente, rundi omuzigaijo gwentama, rundi omuzigaijo gwembuzi, otaligukicungura: niyo erukwera, olimisa esagama yayo ha kyoto, kandi olyokya ebisajwa byayo okuba ekihongwa ekikorwa nomu’ro okuba ekisorokoko ekirungi hali MUKAMA. 18Kandi enyama yayo erabaga yawe, nkembanda eyokuhungyahungya, nekirumbu ekyobulyo okubiri, nukwo erabaga yawe. 19Ebihongwa byona ebihimbwa ebyomu bintu ebirukwera, abana ba Isareri ebibahonga hali MUKAMA, mbihaire iwe, kandi na batabani bawe nabahara bawe hamu naiwe, okuba nkibanja ebiro byona: nikyo kiragano kyekisura ebiro byona omu maiso ga MUKAMA namberewoli noruzaro rwawe hamu naiwe. 20Kandi MUKAMA yagambira Aroni ati Iwe otaliba nobugwetwa omu nsi yabu, kunu otalitunga omugabo gwona omulibo; ninyowe mugabo gwawe nubugwetwa bwawe omu bana ba Isareri.

21Kandi abana ba Levi mbahaire ebicweka bya ikumi byona okuba obugwetwa, okubasasura okuhereza kwabu okubakora, okuhereza okwehema yokutangatanganiramu. 22Kandi okuruga hati bunu abana ba Isareri batalii’ra haihi ehema yokutangatanganiramu,baleke okubaho ekibi nibafa. 23Baitu Abalevi nibo baraherezaga omulimo ogwehema yokutangatanganiramu, kandi barabahoga okutahiki’ra kwabu: kirabaga ekiragiro ebiro byona okuhikya obusinge bwanyu, kandi omu bana ba Isareri tibalitunga obugwetwa. 24Baitu ebicweka ebya ikumi ebyana ba Isareri ebibahonga okuba ekihongwa ekihimbwa hali MUKAMA, mbihaire Abalevi okuba obugwetwa: nikyo mbagambire nti omu bana ba Isareri tibalitunga obugwetwa.

25Kandi MUKAMA yagambira 26Musa ati Kandi oligambira Abalevi oti Obumuraihaga ha bana ba Isareri ebickweka ebya ikumi ebimbahaire okubaihaho okuba obugwetwa bwanyu, nubwo murahongaga ekihongwa ekihimbwa omubyo habwa MUKAMA, ekicweka kya ikumi ekyekicweka kya ikumi. 27Kandi ekihongwa kyanyu ekihimbwa kirababa’rwahoga nkengano eyomu rubuga rwokuhu’raho kandi nkebiijuraomu ndebe ya marwa. 28Nukwo nainywe murahayoga hali MUKAMA ekihongwa ekihimbwa omu bicweka bya ikumi byanyu byona, ebimuhabwa hali abana ba Isareri; kandi nikyo muraheraga MUKAMA ekihongwa ekihimbwa hali Aroni nyakatagara. 29Omu bisembo byanyu byona murahongaga ekihongwa kyona ekihimbwa ekya MUKAMA, omwebi ebirukukira oburungi, ekicweka kyakyo ekirukwezebwa. 30Nikyo oragambira oti Obumurakiihamuga ekirukukira oburungi okukihimba, nubwo kiraba’rwaga Abalevi nkensagi ezaha rubuga orwokuhu’raho, kandi nkensagi ezomu ndeba yamarwa. 31Kandi murakiriraga omu kiikaro kyona, inywe nabenju zanyu: baitu niyo empera yanyu habwokuhereza kwanyu omu hema yokutangatanganiramu. 32Kandi timulibaho ekibi habwakyo, obumulikamara okuihamu ekirukukira oburungi okukihimba: kandi mutabajumisa ebintu ebirukwera ebyabana ba Isareri, mutafa.