Swahili Bible2

15

1KANDI MUKAMA akagambira 2Musa ati Baza na bana ba Isareri obagambire oti Obumulitaha omu nsi eyimuraikaramuga, 3eyindukubaha, nimuhonga ekihongwa ekikorwa nomu’ro hali MUKAMA, ekihongwa ekyokeze rundi ekyonzira, okuhikiriza okweraga, rundi okuba ekihongwa ekyokugonza, rundi omu bugenyi bwanyu obwatairweho, okukora ekisorokoko ekirungi hali MUKAMA, rundi ente, rundi embuzi: 4nubwo ogu alihonga ekisembokye, alihongera MUKAMA ekihongwa ekyebyokulya ekyekicweka kya ikumi ekya efa emu eyensano enungi etugirwe nekicweka ekyakana ekya ikumi emu eyamagita: 5namarwa okuba ekihongwa kyokunywa, ekicweka ekyana ekya hini emu, oligitekaniza hamu nekihongwa ekyokeze rundi okuba ekyonzira habwentama yona. 6Rundi habwentama empaya olitekaniza okuba ekihongwa kyebyokulya ebikweka bya ikumi bibiri ebya efa emu eyensano enungi etugirwe, nekicweka kyakasatu ekya hini emu eyamagita: 7kandi okuba ekihongwa kyokunywa, olihonga ekicweka kyakasatu ekya hini emu eyamarwa agarukuboya kurungi hali MUKAMA. 8Kandi obwaliba notekaniza enimi okuba ekihongwa ekyokeze, rundi okuba ekyonzira, okuhikiriza okweraga, rundi okuba ebihongwa byobusinge hali MUKAMA. 9nubwo alihonga hamu nenimi ekihongwa kyebyokulya, ebicweka bya ikumi bisatu ebya efa emu eyensano enungi etugirwe, nekihindi kya hini yamagita. 10Kandi olihonga okuba ekihongwa kyokunywa ekihindi kya hini yamarwa, okuba ekihongwa ekikorwa nomu’ro, ekirukuboya kurungi hali MUKAMA. 11Nukwo kirikorwa kiti habwenimi yona, rundi habwentama empaya yona, rundi habwekyana kyentama ekihaya kyona, rundi habwebyana byembuzi. 12Nkomuhendo okuguli ogwezi ezimulitekaniza, nukwo mulikora zona nkomuhendo gwazo okuguli. 13Bona enzarwa balikora ebi nkomulingo ogu okuguli nibahonga ekihongwa ekikorwa nomu’ro ekyekisorokoko ekirungu hali MUKAMA. 14Kandi omunyaihanga obwaliba nagonya omulinywe, rundi omuntu wena aliba omulinywe omu businge bwanyu bwona, kandi aligonza okuhonga ekihongwa ekikorwa nomu’ro, ekyekisorokoko ekirungi hali MUKAMA: nka inywe okumukora, nukwo alikora ati. 15Habwabokuso’rokana, halibaho ekigambo kimu ekyatairweho habwanyu, na habwomunyaihanga anyakugonya omulinywe, ekigambo eyatairweho bwona: nka inywe okumuli, nukwo omunyaihanga aliba ati omu maiso ga MUKAMA. 16Ekiragiro kimu kandi ekigambo kimu kirabaga habwanyu, kandi habwomunyaihanga arukugonya omulinywe.

17Kandi MUKAMA yagambira 18Musa ati Baza na bana ba Isareri obagambire oti Obumulikataha omu nsi nambere ndukubaleta, 19nubwo kirihika, obumulirya ha byokulya byensi, mulihongera MUKAMA ekihongwa ekihibwa. 20Ha nsano yanyu erukubanza muliiha okuhonga omugati okuba ekihongwa ekihimbwa: nkokumukora ekihongwa ekyorubuga rwokuhu’raho nukwo mulikihimba muti. 21Ha nsano yanyu erukubanza muliiha okuha MUKAMA ekihongwa ekihimbwa okuhikya obusinge bwanyu bwona. 22Kandi obumuliba nimusobya, mutarukulinda ebiragiro binu byona, MUKAMA ebiyagambire 23Musa, byona MUKAMA ebiyagambire habwomukono gwa Musa, okuruga ha kiro eki MUKAMA ekiyarugiremu ebiragiro kandi nokuhikya obusinge bwanyu bwona; 24nubwo kiriba, obumuliba mukikozire mutagenderire, nekitebe kitanyire, ekitebe kyona balihonga enimi ento emu okuba ekihongwa ekyokeze, okuba ekisororokoko ekirungi hali MUKAMA, hamu nekihongwa kyayo ekyebyokulya, nekihongwa kyayo ekyebyokunywa, nkekiragiro okukiri, nembuzi empaya emu okuba ekihongwa kyekibi. 25Kandi nyakatagara alirihi’ra ekitebe kyona ekyabana ba Isareri, kandi baliganyirwa; baitu kikaba kyokusobya, kandi balesere ekisembo kyabu, ekihonngwa ekikorwa nomu’ro hali MUKAMA, nekihongwa kyabu ekyekibi omu maiso ga MUKAMA, habwokusobya kwabu; 26kandi ekitebe kyona ekyabana ba Isareri baliganyirwa, nomunyaihanga arukugonya omulibo; baitu kikakorwa abantu bona batakakimanyire. 27Kandi omuntu omu obwaliba nasisa atakigenderire, nubwo alihonga embuzi ebugama etakahikize omwaka gumu okuba ekihongwa kyekibi. 28Kandi nyakatagara alirihi’ra obwomezi oburukusisa, obwaliba nasisa atakigenerire omu maiso ga MUKAMA okulihi’ra; kandi aliganyirwa. 29Murabaga nekiragiro kimu kyona habwogu arukukora ekigambo atakigenderire, habwogu enzarwa omu bana ba Isareri, nogu omunyaihanga arukugonya omulibo. 30Baitu obwomezi bwona oburkukora ekigambo bukigenderire, nobwalibali enzarwa rundi omunyaihanga, ogu najumisa MUKAMA: obwomezi obu buliihwa omu bantu bowabu. 31Baitu agayire ekigambo kya MUKAMA, kandi acwire ekiragirokye; obwomezi obu aliihirwaho kimu, okutahiki’rakwe kulimubaho.

32Abana ba Isareri obubakaba bali omu irungu, bakasanga omuntu nasenya enku ha kiro kya Sabiti. 33Abo abamusangire nasenya enku bamuleta hali Musa na Aroni nekitebe kyona. 34Bamuta om nkomo, baitu kikaba kitamanyisibwe ekibalimukora. 35MUKAMA yagambira Musa ati Omusaija ogu aliitwa mazima: ekitebe kyona balimutera amabale aheru yorukande. 36Ekitebe kyona bamuturukya aheru yorukande, bamutera amabale yafa; nka MUKAMA okuyaragire Musa.

37Kandi MUKAMA yagambira 38Musa ati Gambira abana ba Isareri, obaragire beko’re emiyondo omu ntegi akaguha ka bu’ru: 39Kandi kirabaga namberemuli emiyondo, mugirolege, muijukege ebiragiro byona ebya MUKAMA mubikolege: muleke okugendagenda nimukuratira emitima yanyu inywenka namaiso ganyu inywenka, ebimwahonderaga nobusihani: 40muijukege kandi mukolege ebiragiro byange byona, mubege abarukwera hali Ruhanga wanyu. 41Ninyowe MUKAMA Ruhanga wanyu, ayabaihire omu nsi ya Misiri okuba Ruhanga wanyu: ninyowe MUKAMA Ruhanga wanyu.