Swahili Bible2

9

1KANDI ha kiro ekyabiri mu bina okyokwezi oku abana ba Isareri bakagoma ahamu nokusiba, nokujwara ebitengo, nitaka liri ha mitwe yabu. 2Abaijukuru aba Isareri bayebaganiza omu banyaihanga bona, baimuka bagamba ebibi byabu, nebyokutahiki’ra byabaisenkurubo. 3Baimu omu kiikaro kyabu, basoma omu kitabu kyebiragiro bya MUKAMA Ruhanga wabu, ekicweka ekyakana ekyanyamusana; nekicweka ekindi ekyakana bakagamba emisango, nibaramya MUKAMA Ruhanga wabu. 4Nubwo hayeme’ra ha matembero Gabalevi, Sebaniya, Bunu, Serebiya, Bani, na Kenani, bakunga MUKAMA Ruhanga wabu niraka erihango. 5Nubwo Abalevi, Yesuha na Kadimyeri, Bani, Hasabuni ya Serebiya, Hodiya, Sebaniya, na Pesahiya, bagamba ngu Muimuke musime MUKAMA Ruhanga wanyu, okuruga ebiro nebiro nokuhikya ebiro nebiro: nibara lyawe eryekitinisa lisimwe, erinyumizibwe haiguru okukira okusima kwona nokukugiza kwona. 6Niwe MUKAMA, niwe wenka; niwe wakozire iguru, iguru erya haiguru, hamu nihe lyalyo lyona, ensi nebintu byona ebigiroho, enyanja na byona ebirumu, kandi niwe oikazaho byona; nihe erya haiguru nirikuramya. 7Niwe MUKAMA Ruhanga, ayakomeremu Aburamu, wamuiha omu Uli Eyabakalidaya wamuha ibara Iburahimu; 8wabona omutimagwe guli gwokwesiga omu maiso gawe, waragana nauwe ekiragano okuha ensi Yomukanani, Omuhiti, Omwamoli, Nomuperizi, Nomuyebusi, Nomugirugasi, okugiha oruzarorwe, kandi wahikiriza ebigambo byawe; baitu niwe ohikirire. 9Kandi okabona omuhito gwabaisenkuru itwe omu Misiri, wahu’ra okukunga kwabu ha Nyanja Erukutukura; 10wayoleka ha Faraho obwokuro’raho nebyamahano, na ha bairube bona, na ha Bantu bona abensiye; baitu akamanya okubabakozire nemyehembo; kandi wayetungira ibara, nkokukiri hati. 11Kandi wabaganizamu enyanja omu maiso gabu, nukwo baraba hagati yenyanja ha itaka eryomere; nabo ababahondire wabanaga omu nziha, nkibale omu maizi gamani. 12Kandi wabebembeza enyomyo yekicu nyamusana; nenyomyo yomu’ro ekiro, okubaha omusana omu muhanda ogubahikirire okugendamu. 13Kandi wasirimuka ha rusozi Sinai, wabaza nabo noyema omu iguru, wabaha ebigambo ebyobulyo, nebiragiro byamazima, nebyatairweho ebirungi nebyokutere’ra: 14wabamanyisa esabiti yawe erukwera, wabaragira ebiragiro, nebyatairweho, nebyokutere’ra, omu mukono gwa Musa omuiru wawe; 15wabaha ebyokulya ebyarugire haiguru ha bwenjara yabu, wabaihira amaizi omu ibale habwiroho lyabu, wabaragira batahemu okulya ensi eyiwarahire okubaha. 16Baitu abo nabaisenkuru itwe bagira emyehembo, bagumya engoto zabu, batahu’re ebiragiro 17byawe, bayanga okuhu’ra, kunu batateho omutima ha byamahano byawe, ebiwakozire omulibo; baitu bakagumya engoto yabu, kandi omu bwereme bwabu, bataho engabwa bagaruke omu buiru bwabu: baitu niwe Ruhanga arukwanguha okulekera ebibi, arukwanguha okulekera ebibi, wembabazi, kandi oijure okuganyira, torahuka okubihirwa, kandi oijuire ebyokuganyira, kunu tobasiga. 18Ego, obubayekolire enimi eyagibwe, nibagamba ngu Onu nuwe Ruhanga wawe ayakuihireyo omu Misiri, kandi bakerema muno; 19baitu iwe, omu kuganyira kwawe okwingi otabasige omu irungu: enyomyo yekicu etaruge haruguru yabu nyamusana, okubebembera omu muhanda; nobwekuba enyomyo yomu’ro etaleke okubamulikira ekiro, nomuhanda ogwabahikirire okugendamu. 20Kandi okabaha omwoyo gwawe omurungi okubegesaga, otaima akanwa kabu emanu yawe, wabaha amaizi habwiroho lyabu. 21Ego, okabalisiza omu irungu emyaka amakumi ana, batasege kintu; ebyokujwara byabu bitakule, nebigere byabu bitazimbe. 22Kandi wabaha obukama namahanga, ebiwabagabire emigabo: nukwo balya ensi ya Sihoni, ensi eyomukama wa Hesiboni, ensi ya Ogi omukama wa Basani. 23Nabana babu okabakanyisa nkenyunyuzi za haiguru, wabatahya omu nsi, e, eyiwagambire baisenkurubo oti Balitahamu okugirya. 24Nukwo abana batahamu balya ensi, waculeza omu maiso gabu abantu bomu nsi, Abakanani, wabahayo omu mikono yabu, hamu nabakama babu, nabantu abensi, 25babakole nkokubagondeze. Banyaga embuga eziroho muhuruzi, nensi yomweru, batunga enju ezaijuire ebintu byona ebirungi, amaziba agalimirwe, engonjo zemizabibu, nengonjo zemizeituni, nemiti erukwana ebyana mingi muno: nukwo balya baiguta, bagomoka, basemererwa oburungi bwawe obwingi. 26Baitu batahu’re, bakwemera, banaga ebiragiro byawe enyuma yabu, baitu banabi bawe ababagambirire okubaga’ra namberiwoli, kandi bakagira obwereme bwingi. 27Nikyo wabaherireyo omu mukono gwabanyanzigwa babu, babatuntuza: kandi omu kasumi komuhito gwabu, obubakukungire, wahu’ra noyema omu iguru; kandi nkebyokuganyira byawe ebingi okubiri, wabaha abajuni ababajunire omu mukono gwabanyanzigwa babu. 28Baitu obubatungire okuhumura, bagaruka okusisa omu maiso gawe: nikyo wabasigire omu mukono gwabanyanzigwa babu, kandi babatunga: baitu obubagarukaga, nibakunga iwe wahu’raga noyema omu iguru; kandi emirundi mingi okabajuna nkebyokuganyira byawe okubiri; 29wabagambi’ra nukwo obaga’re hali ebiragiro byawe: baitu bakagira emyehembo, batahu’re ebiragiro byawe, baitu bakasisira ebyobulyo byawe, (ebi omuntu obwalibikora, alyome’ra omu byo,) kandi bakatera amabega, bagumya engoto yabu, banyanga okuhu’ra. 30Baitu okabagumisiriza emyaka mingi, wabagambi’ra habwomwoyo gwawe omu banabi bawe: baitu batatege amatu: nikyo wabaherireyo omu mukono gwamahanga agensi ezi. 31Baitu omu byokuganyira byawe ebingi, otabama’reho kimu, nobukwakuba okubasiga, baitu oli Ruhanga wembabazi, kandi wokuganyira. 32Nukwo hati bunu, Ruhanga waitu, Ruhanga omukuru, owobusobozi, kandi owokutinwa, arukulinda ekiragano nokuganyira, okutalibana kwona kutasisane kuke omu maiso gawe, okunyaizire halitwe, na ha batama baitu, ha bakuru baitu, na ha banabi baitu, na ha baisenkuru itwe, na ha Bantu bawe bona, okuruga ba kasumi kabakama ba Asura nokuhikya hati. 33Baitu iwe ohikirire omu byona ebyatuizireho; baitu itwe tukozire kubi: 34kunu abakama baitu nabakuru baitu, banyakatagara baitu, na baisenkuru itwe, batakwate ebiragiro byawe, nobukwakuba okuhu’ra ebiragiro byawe nebi ebiwamanyisize, ebiwabagambirire. 35Baitu batakuko’re omu bukama bwabu, nomu burungi bwawe obwingi obuwabahaire, nomu nsi enkoto kandi eyomweru eyiwahaire omu maiso gabu, kunu batahinduke okuleka engeso zabu embi. 36Dora, itwe tuli bairu hati, kandi ensi eyiwahaire baiasenkuru itwe, balyege ebyana byamu, nomweru gwamu, dora tuli bairu omuyo. 37Kandi eretera ensagi nyingi abakama abawataireho okutulema habwebibi byaitu: kandi banyina obusobozi ha mibiri yaitu, na ha nte zaitu, nkokubagonza, kandi tutuntuire muno. 38Baitu nebi byona obubiroho, turagana ekiragano ekyokwesiga, ntukihandika; kandi abakuru baitu, Nabalevi baitu, na banyakatagara baitu nibakitaho emanyikirizo zabu.