Swahili Bible2

8

1Kandi abantu bona bakesoroza hamu ikute erigalihire erikaba liri omu maiso girembo lya maizi; bagambira Ezera omuhandiki, alete ekitabu ekyebiragiro bya Musa, MUKAMA ebiyaragire Isareri. 2Ezera nyakatagara yaleta ebiragiro omu maiso gekitebe, abasaija nabakazi, na bona abasoboire okuhu’ra nokwetegereza; ha kiro kyokubanza ekyokwezi kwa musanju. 3Kandi yasomamu omu maiso gikute erigalihire erikaba liri omu maiso girembo lyamaizi, okuruga nyenkyakara nokuhikya ihangwe, omu maiso gabasaija nabakazi, na bona abasoboire okwetegereza; abantu bona batega amatu okuhu’ra ekitabu kyebiragiro. 4Kandi Ezera omuhandiki akeme’ra ha rutiti rwembaho, orubakolire omulimo ogu; kandi harubajurwe hayeme’ra Matisiya, na Sema, na Anaya, na Uliya, na Hirikiya, na Maaseya, ha mukonogwe ogwabulyo; kandi ha mukonogwe ogwemoso Pedaya, na Misaheri, na Malikiya, na Hasumu, na Hasibadana, 5Zekaliya, Mesuramu. Ezera yasukuru ekitabu omu maiso gabantu bona; (baitu akabali ha ruguru yabantu); obuyakisukuire, abantu bona baimuka: 6Ezera yasima MUKAMA, Ruhanga omukuru, nabantu bona bagarukamu ngu Amina, Amina, nibaimukya engaro zabu: bainamya emitwe yabu baramya MUKAMA amaiso gabu gali hansi. 7Na Yesuha, na Bani, na Serebiya, Yamini, Akubu, Sabesai, Hodiya, Maaseya, Kerita, Azaliya, Yozabadi, Hanani, Peraya, Nabalevi, bakasobo’ra abantu ebiragiro: nabantu bakeme’ra omu kiikaro kyabu. 8Basoma omu kitabu, omu biragiro bya Ruhanga, nibaduma; Basobo’ra amakuru, kandi bayetegereza ebyasomerwe. 9Kandi Nehemiya, nuwe Tirusasa, na Ezera nyakatagara omuhandiki, Nabalevi abayegesaga abantu, bagambira abantu bona ngu Ekiro kinu nikyo kiro ekirikwera hali MUKAMA Ruhanga wanyu; mutaganya nobukwakuba oku’ra. Baitu abantu bona baka’ra, obubahulire ebigambo byebiragiro. 10Nubwo yabagambira ati Mwegendere, mulye enyama eyebisajwa, munywe ebinuli’ra, mutwekere ebisembo ogu atategekirwe kantu: baitu ekiro kinu nikyo kirukwera hali Mukama waitu: kunu mutatuntuzibwa; baitu okusemererwa kwa MUKAMA nigo mani ganyu. Nukwo 11Abalevi baculize bati abantu bona, nibagamba ngu Muculere, baitu ekiro nikyo kirikwera; kunu mutatuntuzibwa. 12Kandi abantu bona bayegendera okulya, nokunywa, nokutweka ebisembo nokusemerwa muno, baitu baketegereza ebigambo ebibadumirwe. 13Kandi ha kiro kyakabiri hakagoma hamu emitwe yenju zabaisebo abantu bona, banyakatagara, Abalevi, hali Ezera omuhandiki, bategere amatu okuhu’ra ebigambo byebiragiro. 14Kandi babona omu biragiro, MUKAMA okuyaragire omu Musa abana ba Isareri barale omu nkande ha bugenyi obwokwezi kwa musanju: 15Kandi badume bahikye omu mbuga zabu zona, nomu Yerusalemu, nibagamba ngu Muturuke mugende ha rusozi, mutaba’re amatagi gemizeituni, namatagi gemizeituni eyomukisaka, namatagi gemikadasi, ne mikindo, namatagi gemiti emikoto, mukole enkande, nkokukyahandikirwe. 16Nukwo abantu baturuka, babitaba’ra, bayetemera enkande, omuntu wena ha ruguru yenjuye, nomu zigati zabu, nomu zigati ezenju ya Ruhanga, nomu ikute erigalihire eriirembo lyamaizi, nomu ikute erigalihire eriirembo lya Eferaimu. 17Nekitebe kyona ekyabo abarugire omu kusengurwa, batema enkande, baikara omu nkande: baitu okuruga omu biro bya Yesuha mutabani wa Nuni okuhikya ha kiro eki abana ba Isareri batakole bati. Kandi habaho okusemerwa kwingi muno. 18Kandi obukyabukya, okuruga ha kiro kyokubanza nokuhikya ha kiro kyahampero, yasomaga omu kitabu kyebiragiro bya Ruhanga. Bayerinda obugenyi ebiro musanju; kandi ha kiro kya munana habaho okuso’rokana okwokuma’raho, nk’ekiragiro okukiri.