Swahili Bible2

13

1HA kiro eki bakasoma omu kitabu kya Musa omu matu gabantu; basanga hahandikirwemu ngu Omwamoni Nomumoabu batalitaha omu kuso’rokana kwa Ruhanga ebiro byona; 2baitu batatangi’re abana ba Isareri nebyokulya namaizi, baitu bakaguli’ra Baramu abakyene: baitu Ruhanga waitu akahindura omukyeno yagufora omugisa. 3Kandi kyahika, obubahulire ebiragiro, baiha omu Isareri ekitebe kyona ekyajwangaine. 4Lero ebigambo ebi bitakabaireho, Eryasibu nyakatagara, ayatairweho okurole’ra ebisika byenju ya Ruhanga waitu, habwokuswe’rana na Tobiya, akaba amutekanirize ekisika ekikoto. 5nambere bataga ira ebihongwa ebyebyokulya, enkwasi, nebintu, nebicweka bya ikumi ebyengano, ebyamarwa nebyamagita ebyahebwaga habwekiragiro ha Balevi, nabazini nabakumirizi; nebihongwa ebihiimbwa hali banyakatagara. 6Baitu akasumi ako kona nkaba ntali Yerusalemu: baitu omu mwaka gwa Atakisakisi omukama wa Baburoni ogwasatu mwebiri nkagenda hali omukama, kandi ebiro ebimu obubyahinguireho nkasaba omywanya hali omukama: 7naija Yerusalemu, nayetegereza ha bubi Eryasibu obuyakozire habwa Tobiya, obuyamutekanirize ekisika omu zigati ezenju ya Ruhanga. 8Kyansaliza muno: nikyo nabingire heru ebintu byona ebya Tobiya omu kisika. 9Nubwo naragira, basemeza ekisika: kani nuho nagaruka okuleta ebintu ebyenju ya Ruhang, hamu nebihongwa byebyokulya nenkwasi. 10Kandi narora nti emigabu Yabalevi batabibahe; nikyo Abalevi nabazini abakoraga emirimo bairukire, omuntu wena nagenda hali omusirigwe. 11Nubwo nahakana nabalemi ningamba nti Kiki ekyalekeseze enju ya Ruhanga? Nabasoroza hamu nabata omu biikaro byabu. 12Nubwo Yuda yona baleta ekicweka kya ikumi ekyengano nekyamarwa nekyamagita omu mahu’ro. 13Nataho abokulinda amahu’ro, Seremiya nyakatagara, na Zadoki omuhandiki, nowomu Balevi, Pedaya: kandi okuhondera abo hakaba haroho Hanani mutabani wa Zakura, mutabani wa Mataniya: baitu bobakatekerezebwa okuba bokwesiga, kandi omulimo gwabu kugabira bene babu. 14Onyijuke, ai Ruhanga wange, habwebi, kandi otaragaza engeso zanbge enungi ezinakolire enju ya Ruhanga wange, nebi ebyerindirwa omu. 15Omu biro ebi nkarora omu Yuda abamu abajumingire omu ndeba ha sabiti, nibatahya ebiba, nibabitweka enkaina; kandi namarwa nemizabibu namatini, nenketo zona, ezibatahize Yerusalemu ha kiro kya Sabiti: nibagambi’ra ha kiro eki ekibaguliremu ebyokulya. 16Kandi hakaikaramu nabasaija ba Turo, abaletaga encu, nebintu ebyemiringo yona, baguza abana ba Yuda ha kiro kya sabiti, nomu Yerusalemu. 17Nubwo nahakana nabanyoro ba Yuda nabagambira nti Kigambo ki kinu ekibi ekimukora, nimujumisa ekiro kya sabiti? 18Tinukwo baisenkuru inywe bakozire bati, na Ruhanga waitu yatuletera akabi ako kona, itwe norubuga runu? Baitu inywe nimweyongera okuletera Isareri ekiniga nimujumisa sabiti. 19Kandi kyahika, amalembo ga Yerusalemu obugabandize okuiririrwa sabiti etakahikire, naragira bakinge enyingi, kandi naragira baleke okuzikingura okuhikya sabiti obwerihwaho: kandi nataho abairu bange abamu okurole’ra amalembo, enketo yona etatahibwe ha kiro kya sabiti nemu. 20Nukwo abasubuzi nabaguzi abebintu byemiringo yona bagonya aheru ya Yerusalemu, omurundi gumu rundi ebiri. 21Nubwo nabagambi’ra, nabagambira nti Kiki ekibagonyesa omu maiso ga muhuruzi? Obumuligaruka okukora muti ndibakwata. Okuruga aho batagaruke okuija ha sabiti. 22Naragira Abalevi basemeze bonka, baije balinde amalembo, okweza ekiro kya sabiti. Ijuka namberendi, ai Ruhanga wange, ekigambo eki nakyo, kandi onganyire nkokuhanyira kwawe okwingi okukuli. 23Kandi omu biro ebi nkarora Abayudaya abaswire abak azi ba Asidodi, aba Amoni, naba Moabu: 24kandi abana babu babaza ebimu omu ngambo ya Asidodi, kunu batasobole okubaza orulimi Rwabayudaya, baitu nkegambo zamahanga limu limu. 25Nahakana nabo, nabakyena, natera abamu, namenya isoke lyabu, nabarahiza Ruhanga ningamba nti Mutalisweza abahara banyu batabani babu, nobukwakuba okuswere’ra batabani banyu abahara babu, nobukwakuba okubaswera inywenka. 26Sulemani omukama wa Isareri atasise habwebi? Baitu omu mahanga maingi batabeho omukama ondi okusisana nauwe, kandi akagonzebwa Ruhangawe, Ruhanga yamufora omukama okulema Isareri yona: baitu nauwe wenka abakazi abanyaihanga bakamusisisa. 27Kandi itwe tulisobora okuhu’ra inywe okukora ekibi kinu kyona ekikoto, okusisira Ruhanga waitu, ntuswera abakazi abanyaihanga? 28Kandi omu hali batabani ba Yoyada mutabani wa Eryasibu nyakatagara omukuru wabu, akabali muko wa Sanibarati Omuhoroni: nikyo namubingire namberendi. 29Obaijuke, ai Ruhanga wange, baitu bakasisa obunyakatagara, nekiragano kyobunyakatagara nelya Abalevi. 30Nukwo nabase, ezamu abanyaihanga bona, naragira omulimo gwokulinda habwa banyakatagara na habwa Abalevi, omuntu wena omu mulimogwe; 31kandi habwekihongwa kyenku, omu busumi obwatairweho, kandi habwemiganuro. Onyijuke, ai Ruhanga wange, habwebirungi.