Swahili Bible2

38

1NUBWO MUKAMA yagarukamu Yobu nayema omu kai’ringwa nagamba ati

2Ogu noha arukusweka okuhanura nomuirima

Nebigambo ebitaroho okumanya?

3Oyetege’nu omunda yawe nkomusaija;

Baitu ndakukaguza, iwe ongambire.

4Okaboli nkaha obunataireho emiganda eyensi?

Gamba, oraba onyina okwetegereza.

5Noha yamalirire okulengwa kwayo, oraba okimanyire?

Rundi noha yagacundire omuguha?

6Emiganda yayo ekagumibwa haki?

Rundi noha yataireho ibale lyayo erya ha karugu;

7Enyunyuzi eza nyenkya ezorukyakya obuzazinire hamu,

Na bana ba Ruhanga bona obubatokere habwokusemererwa?

8Rundi noha ayakingire enyanja nenyigi,

Obuyatarakire, nkokuyarugire omu nda;

9Obunakozire ekicu okuba ekyokujwara kyayo,

Nomuirima kasira okuba erukoba orwokusembya,

10Nagiragira ekiragiro kyange,

Nintaho ebihongozo nenyigi.

11Nagamba nti Orahikaga hanu, baitu otalihinguraho;

Kandi hanu ebigonzi byawe ebyenyehembo nuho biragarukiraga?

12Iwe oraragire nyenkya ebiro bikaba kubaho,

Nomanyisa emamba ekiikaro kyayo;

13Ekwata ha mpero ezensi,

Nababi bagikunkumu’rwamu?

14Ensi ehindurwa nkibumba hansi yemanyikirizo;

Nebintu byona bizoka nkekyokujwara:

15Nababi omusana gwabu gubaihwaho,

Nomukono ogunyumizibwa guhendeka.

16Iwe oratahire omu nsoro ezenyanja?

Rundi oragenzire omu myoyo eyenziha?

17Enyigi ezokufa zirakusukulirwe?

Rundi oraboine amalembo agekituru ekyokufa?

18Orayetegerize okugaliha kwensi?

Gamba, oraba obimanyire byona.

19Omuhanda guli nkaha ogugenda hali enju eyomusana,

Kandi omuirima, ekiikaro kyagwo kirinkaha;

20Iwe ogusendekereze okuhika ha mutano gwagwo,

Kandi okenge emihanda erukugenda omu nju yagwo?

21Omanyire, baitu okaba ozairwe omu biro ebi,

Kandi omuhendo ogwebiro byawe mwingi!

22Iwe oratahire omu mahu’ro agebirika,

Rundi oraboine amahu’ro agorubale,

23Aganayahulire akasumi akobujune,

Ekiro ekyokurwana nekyobulemu?

24Muhanda ki omusana ogugwahukaniramu,

Rundi omuyaga ogwoburugaizoba nambere gurahizibwa hansi?

25Noha yalimire omukura habwebitungezi byamaizi,

Rundi omuhanda habwenkuba eyokuhinda;

26Okunaga enjura ha nsi nambere hatarumu omuntu;

Rundi omu irungu, nambere hataikaramu muntu;

27Okuigusa itaka erya kifuruka neryebitongo;

Nokwarukya obunyansi obuto?

28Enjura eyina ise?

Rundi noha yazaire obutonya bworume?

29Orubale rukaruga omu nda yoha?

Norume orukwasirwe orwa haiguru noha yaruzaire?

30Amaizi gasisana gaserekerwe ibale,

Nobuso obwenziha bukwasirwe.

31Nasobora okuboha enyunyuzi za Kakaga,

Rundi okuboho’ra emiguha Yebisuma?

32Nasobora okuturukya Mazarosi omu kasumi kayo?

Rundi nasobora okuterekereza

Kasebu nobwana bwayo?

33Omanyire ebiragiro ebyahaiguru?

Nosobora okugumya okulema kwalyo ha nsi?

34Nosobora okuimukya iraka lyawe okuhikya omu bicu,

Amaizi amaingi muno gakusweke? 35Nosobora okusindika okumulikya kugende,

Kukugambire ngu Tuli hanu?

36Noha yataire amagezi omu bicweka ebyomunda?

Rundi noha yahaire omutima okwetegereza?

37Noha asobora okubara ebicu namagezige?

Rundi noha asesa ecupa eza haiguru?

38Ecucu obwefoka ebitonge,

Nentaka zikwatana muno?

39Niwe ohigira entale ebuguma omuhigo?

Rundi niwe omara enjara eyentale ensigazi,

40Obuzibundara omu buingira bwazo,

Niziikara omu kiikaro ekyensita habwokutega?

41Niwe oletera ekingora ebyokulya byakyo,

Obwana bwakyo obubukunga Ruhanga,

Nubugendagenda habwokuburwa ebyokulya?