Swahili Bible2

50

1YUSUFU yagwa ha maiso ga ise, yamuli’raho yamunywegera. 2Yusufu yaragira abairube abafumo okwomesereza ise nomubazi: abafumo bayomesereza Isareri. 3Bamara ebiro amakumi ana nibamwomesereza; baitu nukwo ebiro ebyokwomeserezamu bihiki’ra biti: Nabamisiri bamara ebiro ensanju okumuli’ra.

4Kandi ebiro ebyokumuli’ra obubyahoire, Yusufu yagambira enju ya Faraho ati obundaba mboine embabazi omu maiso ganyu, mbesengerize, mugambe omu matu ga Faraho muti ise 5nyowe akandahiza nagamba ati Dora ninfa: omu kituro kyange ekinayrimire omu nsi ya Kanani nuho olinzika. Nukwo hati nkwesengerize, leka ntembe okuzika isenyowe, kandi ndigaruka. 6Faraho yagamba ati Temba, ozike ‘so nkokuyakurahize. 7Yusufu yatemba okuzika ise: hamu nauwe hakagenda abairu bona ba Faraho, abakuru bomu njuye, ebensiya Misiri, 8nenju yona eya Yusufu, nabagenzibe, nenju ya ise: abana babu abato nentama zabu nente zabu ebi byonka bakabisiga omu nsi ya Goseni. 9Kandi hakatemba hamu nauwe amagali nabatembere ha mbarasi: kyaba kitebe kikoto mono. 10Bahika ha rubuga rwokuhu’raho rwa Atadi, oruli enseri ya Yorudani, nuho baterire empamo nyingi, enkoto muno: yamara ebiro musanju nali’ra ise. 11Kandi abo abaikaire omu nsi Abakanani obubaboine nibali’ra omu rubuga rwokuhu’raho orwa Atadi, bagamba ngu Oku’ra kunu okwa Abamisiri kwingi: nikyo ibaralyayo lyayetirwe Aberi-miziraimu, eri nseri ya Yorudani. 12Kandi abanabe bamukora nkokuyabaragire: 13baitu batabanibe bakamuhimba bamutwara omu nsi ya Kanani, bamuzika om buingira obwomu kibanja kya Makapera, Iburahimu obuyaguzire hamu nekibanja okuba obutaka bwokuzikamaga hali Efuroni Omuhiti, omu maiso ga Mamire.

14Yusufu yagarukayo Misiri, uwe nabagenzibe, na bona abatembere nauwe okuzika ise, obuyamazire okuzika ise. 15Bagenzi ba Yusufu obubaboine isebo afire, bagamba ngu Rundi Yusufu naija okutunoba, nokutujunaniza mali obubi bwona obutwamukozire. 16Batumira Yusufu nibagamba ngu ‘so akaragira obwakaba atakafire nagamba ati 17Nukwo muigambira Yusufu muti Ganyira nkwesengerize hati, okusisa okwabagenzi bawe nekibi kyabu, baitu bakakukora kubi: hati bunu tukwesengerize, ganyira okusisa kwabairu ba Ruhanga wa ‘so. Yusufu ya’ra amaizi obubabalize nauwe. 18Nabagenzibe bona bagenda nibamuinamira omu maisoge; nibagamba ngu Dora, tuli bairu bawe. 19Yusufu yabagambira ati Mutatina: baitu nyowe nyowe ndi omu omu kiikaro kya Ruhanga Nainywe mukaba nimugonza okundetaho obubi; 20baitu Ruhanga akaba nagonza okuleta ebirungi, okuhikya ebyabaireho hati, okukiza abantu baingi baleke okufa. 21Nukwo hati bunu mutatina ndabalisga nabana banyu abato. yabahumuza yabagambira ebyembabazi.

22Yusufu yaikara omu Misiri, uwe nenju ya ise: kandi Yusufu akahikya emyaka kikumi mu ikumi. 23Kandi Yusufu yarora abana ba Eferaimu ebenyakasatu: kandi nabana na Makiri mutabani wa Manase bakazarwa ha maju ga Yusufu. 24Yusufu yagambira bagenzibe ati Ninfa: baitu mazimakwo Ruhanga alibaizira, okubaihaho omu nsi enu nabatwara omu nsi eyiyarahirire Iburahimu na Isaka na Yakobo. 25Yusufu yarahiza abana ba Isareri, nagamba ati Ruhanga talireka okubaizira, kandi mulitwara amagufa gange nimugaiha muno. 26Nukwo Yusufu yafa, ahikize emyaka kikumi mu ikumi: bamwomesereza, bamuta omu sanduke eyokuzikamu omu Misiri.