Swahili Bible2

45

1YUSUFU yalemwa okugumisiriza omu maiso gabu bona abakaba bemerire haihi nauwe; yagambira haiguru ati Muturukye abantu bona baruge namberendi. Kandi hatabeho muntu ayemerire nauwe, Yusufu obuyayetondire bagenzibe. 2Ya’ra niraka erihango: Abamisiri bahu’ra nebenju ya Faraho bahu’ra. 3Yusufu yagambira bagenzibe ati Ninyowe Yusuf; isenyowe akiri mwomezi? bagenzibe batasobole kumugarukamu; baitu bakatuntura omu maisoge. 4Yusufu yagambira bagenzibe ati Munyi’re haihi mbesengerize. Bai’ra haihi. Yagamba at Ninyowe Yusufu mugenzi wanyu oumwagurize Misiri. 5Kandi hati mutatuntura, kunu mutebihirirwa, baitu mukangura kunu: baitu Ruhanga nuwe yanyebembize inywe okujuna obwomezi. 6Baitu enjara emazire emyaka ebiri omu nsi: kandi hasigaireho emyaka etano eyibatalirimiramu nobubwakuba okugesa. 7Kandi Ruhanga nuwe yanyebembize inywe okubakiriza abamu abalisigara halinywe omu nsi, nokubajuna muleke okufa, nokujunwa okwamahano. 8Nukwo hati tibali inywe mwansindikire kunu, baitu Ruhanga, kandi akanfora ise Faraho, kandi omunyoro wenjuye yona, kandi omulemi wensi yona ya Misiri. 9Mwanguhe mutembe hali isenyowe, mumugambire ngu Nukwo agambire omwana wawe Yusufu ati Ruhanga akanfora omunyoro wa Misiri yona, osirimuke oije 10namberendi, otaikaraho: kandi oraikaraga omu nsi ya Goseni, naiwe oraikaraga haihi nanyowe, iwe nabana bawe, nabana babana bawe, namagana gawe, nente zawe, na byona ebyonyinabyo. 11kandi ndakulisizaga oku; baitu hasigaireho emyaka etano eyenjara; oleke okuba omunaku, iwe nabomu nju yawe, na byona ebyonyinabyo. 12Kandi dora, amaiso ganyu nigarora, kandi namaiso ga mugenzi wange Benyamini ngu akanwa kange niko karukugamba nainywe. 13Kandi muligambira isenyowe ebyekitinisa kyange kyona omu Misiri na byona ebimuboine, kandi mwanguhe musirimule isenyowe mumulete hanu. 14Yagwa mugenziwe Benyamini omubikya, ya’ra: Benyamini yali’ra omu bikyabe. 15Yanywegera bagenzibe bona, yali’ra halibo: hanyuma bagenzibe babaza nauwe.

16Ebigambo ebi bikahuli’rwa omu nju ya Faraho, nibagamba ngu Bagenzi ba Yusufu baizire: kandi bikasemeza muno Faraho nabairube. 17Faraho yagambira Yusufu ati Gambira bagenzi bawe oti Mukole muti: mute ebintu ha nsoro zanyu, mugende musirimuke omu nsi ya 18Kanani; mulete isinywe nabomu maka ganyu, muije owange: nanyowe ndibaha ebirungi ebyomu nsi ya Misiri, kandi muralyaga ebirungi byensi. 19Hati oragirwe, mukole muti; mutwale egali ezomu nsi ya Misiri habwabana banyu abato babakazi banyu, mulete isinywe, muije. 20Kandi mutalitekereza ebintu byanyu; baitu ebirungi ebyomu nsi yona ya Misiri byanyu. 21Abana ba Isareri bakakora bati: Yusufu yabaha egali nka Faraho okuyaragire, yabaha entanda yomumuhanda. 22Yabaha bona omuntu wena ebyokujwara; baitu yaha Benyamini ebicweka byefeza bikumi bisatu, nemijwaro emirundi etano. 23Kandi akatwekera ise ati: enkaina ikumi ezetwekere ebirungi ebya Misiri, nenkaina ebuguma ikumi ezetwekere engano nomugati nebyokulya ise ebyalirira omu muhanda. 24Nobwo yaraga bagenzibe bagenda yabambira ati Mwerinde muleke okukunganira omu muhanda. 25Yatemba okuruga omu Misiri, baija omu nsi ya Kanani hali Yakobo isebo. 26Bamugambira ngu Yusufu akiri omwomezi, kandi nuwe mulemi wensi yona ya Misiri. Omutimagwe gwahwe’ra baitu atabaikirize. 27Bamugambira ebigambo byona ebya Yusufu ebiyagambire: kandi obuyaboine egali Yusufu eziyamutwekire okumuhimba, omwoyo gwa Yakobo isebo gwagarukamu amani: 28Isareri yagamba ati Kiramara Yusufu omwana wange akiri mwomezi; ndigenda okumurora ntakafire mwomezi: ndigenda okumurora ntakafire.