Swahili Bible2

35

1RUHANGA yagambira Yakobo ati Imuka, otembe Beseri, oikaleyo: oyombeke oku ekyoto hali Ruhanga, ayakubonekire obuwairukire omu maiso ga Esau mugenzi wawe. 2Yakobo yagambira abomu njuye, nabo bona abakaba bali nauwe, ati Muiheho abacwezi abandi abali omulinywe, mweyeze muhingise ebyokujwara byanyu: 3tuimuke tutembe Beseri, kandi ndyombeka oku ekyoto hali Ruhanga, ayangarukiremu ha kiro kyokuganya kwange, yaikaraga nanyowe omu muhanda ogunagendiremu. 4Baha Yakobo abacwezi bona abakaba bali omu mikono yabu, nempeta ezikaba ziri omu matu gabu, Yakobo yabisereka hansi yomuhomozi ogukaba gli Sekemu. 5Bagenda okutina kwingi kwagwa ha mbuga ezabahe’raine, kunu batakuratire abana ba Yakobo. 6Yakobo yahika Luzi, eri omu nsi ya Kanaani (niyo Beseeri) uwe nabantu bona abakaba bali nauwe.

7Yayombeka oku ekyoto, yayeta ekiikaro eki Eri-beseri: baitu nuho Ruhanga yamusukulire, obuyairukire omu maiso ga mugenziwe. 8Kandi Debora, omulezi wa Rebeka yafa, yazikwa ifo ya Beseri hansi yomuhomozi; baguruka ibara Aroni-bakusi.

9Ruhanga yagaruka okubonekera Yakobo, obuyarugire Padanaramu, yamuha omugisa. 10Ruhanga yamugambira ati Ibara lyawe niwe Yakobo: tokyayetwa Yakobo baitu Isareri niryo lirabaga ibara lyawe: yamuruka ibaralye Isareri. 11Ruhanga yamugambira ati Ninyowe Ruhanga Wobusobozi bwona: okanyege ozalege; ihanga kandi ekitebe kyamahanga biriruga omuliwe; nabakama baliruga omu nda yawe; 12kandi ensi eyinahaire Iburahimu na Isaka, ndigikuha iwe, nabaijukuru bawe hanyuma yawe ndibaha ensi. 13Ruhanga yamurugaho omu kiikaro kayagambire nauwe. 14Yakobo yasimba enyomyo omu kiikaro hayagambire nauwe, enyomyo eyamabale: yagisesaho ekihongwa ekyokunywa, yagisesaho amagita. 15Yakobo yaruka ekiikaro Ruhanga hayagambire nauwe ibara lyakyo Beseri. 16Baruga Beseri nibagenda; hakaba hakiroho omwanya okuhika Eferesi: Rakeri yakwatwa yarumwa muno okuzara. 17Kandi kyahika obuyarumirwe muno omusehenyi yamugambira ati Otatina, baitu hati bunu orazara omwana omwojo ondi. 18Kandi kyahika obwomezibwe obubukaba nubugenda, (baitu akafa) yamuruka ibaralye Benoni: Baitu ise yamuruka Benyamini. 19Rakeri yafa, bamuzika omu muhanda ogurukugenda Eferasi (niyo Beterehemu). 20Yakobo yasimba enyomyo yekiturokye: egi niyo Nyomyo yekituro kya Rakeri nokuhikya hati. 21Isareri yaimukya orugendo, yasimba ehemaye ahinguire orukomero orwa Edere. 22Kandi kyahika Isareri obuyaikaraga omu nsi egi, Reubeni yagenda yabyama na Biriha omuzana wa ise: Isareri yakihu’ra.

Lero batabani ba Yakobo bakaba bali ikumi nababiri: 23abana ba Leya; Reubeni, omuzigaijo wa Yakobo, na Simeoni, na Levi na Yuda, na 24Isakara, na Zeburuni; abana ba Rakeri; Yusuf na Benyamini: 25nabana ba Biriha, muzana wa Rakeri; Dani na Nafutali 26nabana ba Ziripa, omuzana wa Leya; Gadi na Asere: abo nibo batabani ba Yakobo ababamuzaliire Padanaramu. 27Yakobo yaija hali Isaka ise Mamire omu Kiryasi-araba (niyo Heburoni) Iburahimu na Isaka nambere baikaraga. 28Kandi ebiro bya Isaka bikaba biri emyaka kikumi mu kinana. 29Isaka yahayo obwomezi, yafa, yatwarwa hali abantube, omugurusi, ahikize ebiro bingi: Esau na Yakobo batabanibe bamuzika.