Swahili Bible2

32

1Yakobo yayegendera bamairaika ba Ruhanga bamuitirana. 2Yakobo obuyababoine yagamba ati Linu niryo ihe lya Ruhanga: yaruka ekiikaro eki ibara lyakyo Mahanaimu.

3Yakobo yatuma abakwenda okumwebembera bagenda hali Esau mugenziwe omu nsi ya Seyiri, obwe’re bwa Edomu. 4Yabaragira ati Nukwo muligambira mukama wange Esau muti; Nukwo arukugamba ati omuiru wawe Yakobo ati Naikaraga na Labani,nkaikarayo okuhikya hati: 5kandi nyina ente, nenkaina, namagana, nabairu, nabazana: kandi ntumire okugambira mukana wange, mbone embabazi omu maiso gawe. 6Abakwenda bakagaruka hali Yakobo, nibagamba ngu Tukahika hali mugenzi wawe Esau, kandi naija okukutangi’ra nabasaija bikumi bina hamu nauwe. 7Nubwo Yakobo yatina muno, yatuntura: yabaganizamu abantu abakaba bali hamu nauwe, namagana, nente, nengamira, ebihanda bibiri. 8Yagamba ati Esau obwalibandiza ha kihanda ekimu nakitema, nubwo ekihanda ekirisigaraho kiriiruka. 9Yakobo yagamba ati Ai Ruhanga wa isenyowe Iburahimu, kandi Ruhanga wa isenyowe Isaka, ai MUKAMA, ayangambire oti Garukayo omu nsi yowanyu, kandi hali bene banyu, nanyowe ndakukoraga kurungi: 10tinsemerire na kake okuhabwa ha kuganyira kwawe kwona, namananu gawe gona, ebiwakoraga omuiru wawe; baitu nkambuka ekyambu kinu Yorudani nyina omuigo gwonka: kandi hati nfokere ebihanda bibiri. 11Nkwesengerize onkize omu mukono gwa mugenzi wange, omu mukono gwa Esau, baitu nimutina, aleke okuija okunyita, nyina hamu nabanabe. 12Naiwe okagamba oti mananukwo ndikukora kurungi, kandi ndaforaga abaijukuru bawe nkomusenyi ogwomu nyanja, ogutarukubarwa obwingi. 13Kandi yararaho ekiro eki, yaiha hali ebi ebyakaba anyinabyo okuba ekisembo kya Esau mugenziwe; 14embuzi ebuguma bikumi bibiri, nempaya amakumi abiri, entama 15ebuguma bikumi bibiri, nempaya amakumi abiri, engamira ezirukukamwa amakumi asatu nobwana bwazo, ente ezigija amakumi ana nenimi ikumi enkaina ebuguma amakumi abiri nobwana bwazo ikumi. 16Yabita omu mikono yabairube, igana lyona habwalyo lyonka, yagambira abairube ati Munyebembere mwambuke, muteho omwanya 17hagati yamagana namagana. Yaragira omwebembezi, nagamba ati Esau mugenzi wange obwarakuitirana nakukaguza nagamba ati Oli woha? kandi ati Nogenda ha? nebi ebiri omu maiso gawe byoha? 18Nubwo oragamba oti Byomuiru wawe Yakobo, nikyo kisembo ekitwekirwe mukama wange Esau: kandi dora, nauwe ali enyuma yaitu. 19Kandi yaragira nowakabiri, nowakasatu, na bona abarukufunya amagana, nagamba ati Nukwo muragambira Esau obumuramubona; 20kandi muragamba muti Kandi dora, omuiru wawe Yakobo ali enyuma yaitu. Baitu akagamba ati Ndamuculeza nekisembo ekinyebembire, hanyuma ndarora amaiso, rundi aranyikiriza. 21Nukwo ekisembo kyamwebembera nikyambuka: nauwe wenka yarara ekiro eki nekitebe.

22Yaimuka ekiro eki, yatwara bakazibe babiri nabazanabe babiri, nabanabe ikumi nomu, yayambukira omu lyambukiro lya Yaboki. 23Yabatwara yabambura akambu, yayambura byona ebyakaba anyinabyo. 24Yakobo yasigarayo wenka; kandi omusaija yafukana nauwe okuhikya emamba obuyasazire. 25Kandi obuyaboine tamunage, yakora ha nfumbiye; nenfumbi ya Yakobo yayehinya, akaba nafukana nauwe. 26Yagamba ati Ndeka ngende, baitu emamba esazire.Yagamba ati Tinkuleke, rundi ompaire omugisa. 27Yamugambira ati Ibara lyawe niwoha? Yagamba ati ninyowe Yakobo.

28Yagamba ati Ibara lyawe terikyayetwa Yakobo, baitu Isareri: baitu ohakaine na Ruhanga, kandi nabantu, kandi osinguire. 29Yakobo yamukaguza nagamba ati nkwesengerize ongambire ibara lyawe. Yagamba ati Kiki ekyonkagulirize ibara lyange? Yamuhereza oku omugisa. 30Yakobo yaruka ekiikaro ibara lyakyo Penieri: nagamba ati Baitu mbonangaine na Ruhanga namaiso, nobwomezi bwange bukizire. 31Izoba lyamuturukiraho obuyayambukire Penueri. yacumbagira ekiberokye. 32Nikyo abana ba Isareri balekire okulya ekinywa ekyekibero ekiri omu nfumbi, nokuhikya hati: baitu akakora ha nfumbi ya Yakobo omu kinywa kyekibero.