Swahili Bible2

31

1Kandi akahu’ra ebigambo byabana ba Labani nibagamba ngu Yakobo atwaire byona ebikaba biri bya isitwe; kandi omwebi ebikaba biri bya isitwe numwo yatungire ekitinisa kinu kyona. 2Yakobo yarora amaiso ga Labani, kandi dora, gakaba gatali haluwe nkokubanza. 3MUKAMA yagambira Yakobo ati Garukayo omu nsi yabaswenkuru na hali bene banyu; nanyowe ndaikaraga naiwe. 4Yakobo yatuma yayeta Rakeri na Leya baije omu iswa hali iganalye, yabagambira ati

5Mboine amaiso ga isinywe tigali hali nyowe nkokubanza; baitu Ruhanga owa isenyowe nuwe yaikaraga nanyowe. 6Kandi mumanyire nkokunaherize isinywe namani gange gona. 7Na isinywe yambihabiha yahindura empera yange emirundi ikumi, baitu Ruhanga atamuikirize okunkora kubi,. 8Obuyagambaga ati Ezebitanga irabaga empera yawe; nubwo igana lyona lyazaraga ezebitanga: kandi obuyagambaga ati Ezebihuga irabaga empera yawe, nubwo igana lyona lyazaraga ezebihuga. 9Nukwo Ruhanga yaihireho ati ebisoro bya isinywe, abimpaire nyowe. 10Kandi obukyahikire ha kasumi igana akalyayemiremu, nkaimukya amaiso gange narora omu kiroto, kandi dora, embuzi empaya ezayemeze igana zikaba ziri ezebihuga, nezebitanga, nezebigondo. 11Maraika wa Ruhanga yangambira omu kiroto ati Yakobo: nagamba nti Dora, nyowe. 12Yagamba ati Imukya hati bunu amaiso gawe, kandi dora, embuzi empaya zona ezirukwemya igana zebihuga nezebitanga nezebigondo: baitu mboine byona Labani ebiyakukozire. 13Ninyowe Ruhanga wa Beseri, nambere wasesire amagita ha nyomyo, nambere wayeragire okweraga hali nyowe; imuka hati, oruge omu nsi enu, ogarukeyo omu nsi hawazairwe. 14Rakeri na Leya bagarukamu nibamugambira ngu Itwe tukinyina itungo rundi obugwetwa bwaitu omu nju ya isitwe? 15Titurukubarwa haluwe nkabagenyi? Baitu akatugura kandi yalira kimu omuhendo gwaitu. 16Baitu itungo lyona Ruhanga eriyaihire hali isitwe lyaitu neryabana baitu: nukwo hati Ruhanga kyona ekyakugambire, nikyo okole. 17Yakobo yaimuka yata abanabe nabakazibe ha ngamira; 18yatwara nauwe ebisorobye byona nitungolye lyona eriyasoroize, ebisoro ebyakaba atungire, ebiyasoroize Padanaramu, agende hali Isaka ise omu nsi ya Kanani. 19Kandi Labani akaba agenzire okusara ebyoya byentamaze: kandi Rakeri yaiba terafimu ezikaba ziri za ise. 20Yakobo yagenda omu nsita, Labani Omwaramu atamanyire, baitu atamugambire okwarukuiruka. 21Nukwo yairukire ati na byona ebyakaba anyinabyo; yaimuka yayambuka Ekyambu; yagumya amaisoge okugenda ha rusozi rwa Gireadi.

22Kandi bakagambira Labani ha kiro kyakasatu Yakobo okuyairukire. 23Yatwara bagenzibe nauwe, yamuiruki’ra orugendo rwebiro musanju, yamuhika omu rusozi rwa Gireadi. 24Ruhanga yaizira Labani Omwaramu omu kiroto ekyekiro, yamugambira ati Oyerinde oleke okugambira Yakobo nobubyakuba ebirungi nobubyakuba ebibi. 25Labani yahika hali Yakobo. Yakobo akaba asimbire ehemaye ha rusozi: na Labani hamu na bagenzibe basimba ha rusozi rwa Gireadi. 26Labani yagambira Yakobo ati Okozire ki okunyiruka omu nsita nyowe ntakimanyire, notwa’ra kimu abahara bange nkabanyagwa omu bulemu? 27Kiki ekyakuirukize omu nsita, noruga hali nyowe; kunu otangambire nkurage nokusemererwa, nebizina, nenjogera, nenanga; 28kunu otanyikirize okunywegera abana bange nabahara bange? Hati okozire ekyobudomadoma. 29Kiri omu busobozi obwomukono gwange okukukora kubi: baitu Ruhanga owa ‘so angambire ekiro ati Oyerinde oleke okugambira Yakobo nobubyakuba ebirungi nobubyakuba ebibi. 30Na hati nogonza muno okugenda, baitu osalirwe muno enju ya ‘so, baitu okaibira ki abacwezi bange? 31Yakobo yagarukamu nagambira Labani ati Baitu nkakutina: baitu nagamba nti Oleke okunyihaho abahara bawe namani. 32Wena oworasangaho abacwezi bawe, ogu taikale mwomezi: omu maiso ga bagenzi baitu, okomemu ebyawe ebiri nanyowe obyetwa’re. Baitu Yakobo akaba atamanyire Rakeri okuyaziibire. 33Labani yataha omu hema ya Yakobo, nomu hema ya Leya nomu hema yabazana babiri; baitu atabisangemu. Yaruga omu hema ya Leya, yataha omu hema ya Rakeri. 34Rakeri akaba atwaire terafimu, yazita omu matandiko gengamira, yaikaraho. Labani yakwatakwata hona omu hema, kunu atazisangemu. 35Rakeri yagambira ise ati Mukama wange aleke okubihirwa, baitu tindukusobora okuimuka omu maiso gawe; baitu ndi omu maiso gawe; baitu ndi omungeso zabakazi. Yase’ra, baitu atalore terafimu. 36Yakobo yabihirwa, yakungana na Labani: Yakobo yagarukamu yagambira Labani ati Okusisa kwange kuraha? ekibi kyange kiraha, iwe okunyiruki’ra bwango? 37Baitu otinduire ebintu byange byona, kiraha ekyoboine omu bintu byomu nju yawe? Kite hanu omumaiso gabagenzi bange nabagenzi bawe batucwere omusango itwembi. 38Emyaka egi amakumi abiri nkaikara naiwe; entama zawe nembuzi zawe ebuguma tizikatorogaga, nempaya ezomu igana lyawe tinkaziryaga. 39Eyaitwaga ekisoro ntagirete namberoli; ninyowe nagiferwaga; wagijunanaga, omu mukono gwange, rundi obuyaibwaga nyamusana, rundi obuyaibwaga ekiro. 40Nukwo nabaga nti, nyamusana izoba lyangwerahoga, nekiro embeho, noturo twamburaga omu maiso gange. 41Emyaka egi amakumi abiri nkaikara omu nju yawe; nakuherezaga emyaka ikumi nena habwabahara bawe babiri, nemyaka mukaga habwigana lyawe naiwe wahinduraga empera yange emirundi ikumi. 42Kuba Ruhanga wa isenyowe, Ruhanga wa Iburahimu, kandi Okutinisa kwa Isaka ataraikaire nanyowe, hati bunu mazimakwo wakumbingire busa. Ruhanga aboine okubonabonesebwa kwange nemirimo eyemikono yange, kandi yakuhana ekiro. 43Labani yagarukamu yagambira Yakobo ati Abaisiki bahara bange, nabana bana bange, namagana magana gange, na byona ebyorukurora byange, hati bunu ndasobora okubakora ki abahara bange banu, rundi abana babu ababazaire. 44Kandi hati bunu turagane ekiragano nyowe naiwe; kiikalege kaiso hali nyowe naiwe. 45Yakobo yakwata ibale, yalisimba okuba nkenyomyo. 46Yakobo yagambira bene babu ati Musoroze amabale, basoroza amabale, bagatuma omutumo: balira haihi nomutumo. 47Labani yaguruka ibara Yegarasahadusa: baitu Yakobo yaguruka Galeedi. 48Labani yagamba nti Omutumo gunu kaiso hali nyowe naiwe hati. Nikyo ibara lyagwo lyayetirwe Galeedi: 49kandi Mizipa, baitu akagamba ati MUKAMA arolege hagati yange naiwe, obutuliba tutakibonangana. 50Obwolibonabonesa abahara bange, kandi obwoliswera abakazi abandi hamu nabahara bange, tihaloho muntu halitwe, dora, Ruhanga nuwe kaiso hagati yange naiwe. 51Labani yagambira Yakobo ati Dora, omutumo gunu, kandi dora, enyomyo enu, eyinsimbire hagati yange naiwe. 52Omutumo gunu guikalege kaiso, nenyomyo ikalege kaiso, ngu nyowe tindihingura ha mutumo gunu okugenda namberoli, kandi ngu iwe torihingura ha mutumo gunu nenyomyo emu okuija namberendi, okunkora kubi. 53Ruhanga wa Iburahimu, Ruhanga wa Nahora, Ruhanga wa isebo, aramule hagati yaitu. Yakobo yarahira Okutinisa kwa Isaka ise. 54Yakobo yasa’ra ekyonzira ha rusozi, yayeta bene babu okulya ebyokulya: balya ebyokulya baikara ha rusozi okukiisa obuire. 55Kandi nyenkya omu rukyakya Labani yaimuka, yangwegera abanabe nabaharabe; yabasabira omugisa, Labani yagenda yagarukayo omu kiikarokye.