Swahili Bible2

30

1Kandi Rakeri obuyaboine okwataza’ra Yakobo abana, Rakeri yakwatirwa ihali mugenziwe; yagambira Yakobo ati Mpa abana, ntafa. 2Kandi ekiniga kya Yakobo kikamatuka hali Rakeri; yagamba ati Nyowe ndi omu kiikaro kya Ruhanga, ayakuimire ebyana ebyenda? 3Yagamba ati Dora omuzana wange Bira, genda haluwe; aza’re ha maju gange, kandi nanyowe ntuge abana omuluwe. 4Yamuha Bira omuzanawe okuba mukaziwe: Yakobo yagenda haluwe. 5Bira yatwara enda, yaza’ra Yakobo omwana omwojo. 6Rakeri yagamb ati Ruhanga ancwerire omusango, kandi ahulire iraka lyange, kandi ampaire omwana: nikyo yarukire ibaralye Dani. 7Bira omuzana wa Rakeri yagaruka okutwara enda, yaza’ra Yakobo omwana omwojo owakabiri. 8Rakeri yagamba ati Nfukana na mugenzi wange nokufunakana kwamani maingi, kandi nsinguire; yamuruka ibaralye Nafutali. 9Leya obuyaboine ngu alekere okuzara, yatwara Ziripa omuzanawe, yamuha Yakobo okuba mukaziwe. 10Ziripa omuzana wa Leya yaza’ra Yakobo omwana omwojo. 11Leya yagamba ati Mugisa! yamuruka ibaralye Gadi. 12Ziripa omuzana wa Leya yaza’ra Yakobo omwana omwojo owakabiri. 13Leya yagamba ati Mboine omugisa! baitu abaisiki baranyetaga owomugisa: yamuruka ibaralye Asere. 14Kandi Reubeni akagenda omu biro ebyokugesa engano yarora amadudaimu omu musiri, yagaletera nyina Leya. Kandi Rakeri yagambira Leya ati Mpa nkwesengerize ha madudaimu gomwana wawe. 15Yamugambira ati Kigambo kike onyihireho iba nyowe? Kandi nogonza okunyihaho amadudaimu gomwana wange? Rakeri yagamba ati Baitu arabyama naiwe ekiro kinu habwamadudaimu gomwana wawe. 16Yakobo yaruga omu musiri omu kairirizi, Leya yaturuka okumutangi’ra, yagamba ati Kikuhikirire okuija hali nyowe, baitu mazimakwo nkuheirire amadudaimu gomwana wange. Yabyama nauwe ekiro eki. 17Ruhanga yahu’ra Leya, yatwara enda, yaza’ra Yakobo omwana omwojo owakatano. 18Leya yagamba ati Ruhanga ampaire empera yange, baitu nkaha iba nyowe omuzana wange: yamuruka ibaralye Isakara. 19Leya yagaruka okutwara enda, yaza’ra Yakobo omwana omwojo owomukaga. 20Leya yagamba ati Ruhanga ampaire ekisembo ekirungi ekyobugole; hati iba nyowe araikaraga nanyowe, baitu muzarire abana abojo mukaga; yamuruka ibaralye Zeburuni. 21Kandi hanyuma yazara omwana omuisiki, yamuruka ibaralye Dina. 22Ruhanga yaijuka Rakeri kandi Ruhanga yamuhu’ra, yamusumu’ra enda. 23Yatwara enda, yazara omwana omwojo: yagamba ati Ruhanga anyihireho ensoni zange: 24Yamuruka ibaralye Yusufu, nagamba ati MUKAMA anyongereho omwana ondi omwojo.

25Kandi kyahika, Rakeri obuyazaire Yusufu, Yakobo akagambira Labani ati Ndagira, ngende omu kiikaro kyowaitu, kandi omu nsi yowaitu. 26Mpa bakazi bange nabana bange abanakuhererize, ondagire: baitu omanyire okuhereza kwange okunakuherezaga. 27Labani yamugambira ati Hati obundaba mboine omugisa omu maiso gawe, ikara hanu: baitu nyetegerize nti MUKAMA ampaire omugisa habwawe. 28Yagamba ati Nsa’ra empera yawe, nyowe ndagikuhaga. 29Yamugambira ati omanyire obunakuherezaga, kandi amagana gawe okugakaba gali nanyowe. 30Baitu agokaba onyinago ntakaizire make, kandi gakanyire okuba maingi; kandi MUKAMA akuhaire omugisa nambere nahindukiraga hona: na hati nditunga di ebyomu nju yange nyenka? 31Yagamba ati Ndakuha ki? Yakobo yagamba ati Tiharoho ekyorampa: obwolinko’ra kinu ndigaruka okulisa igana lyawe nokulirinda. 32Ndaraba omu igana lyawe lyona hati ninyihamu yona ibamba na mpuga, na yona erukuiragura omu ntamba nezebitanga nezebigondo omu mbuzi nizo iraba empera yange. 33Nukwo okuhiki’ra kwange kulintonganira hanyuma, obwoliija habwempera yange eri omu maiso gawe; yona etali kigondo rundi kitanga omu mbuzi, rundi etarukwiragura omu ntama, obwerizoka nanyowe eribarwa nkibirwe. 34Labani yagamba ati Dora, mbaire ningonza kibe nkekigambo kyawe okukiri. 35Kandi yaihamu ha kiro eki embuzi empaya ezebihuga nezebitanga nembuzi zona eza mabuguma ezebigondo nezebitanga, yona ekaba enyina ibara erirukwera; na zona ezirukwiragura omu ntama, yaziha omu mikono yabanabe: 36yataho orugendo orwebiro bisatu hagatiye na Yakobo: Yakobo yalisa amagana ga Labani agasigaireho. 37Yakobo yatwara obuti bwomulibine omubisi, nobwomusakedi nobwomwaramoni; yabuharaigura, yabusigamu amahuga agarukwera, yayoleka oburukwera obukaba buli habuti. 38Yasimba obuti obuyasusuire omu maiso gamagana ha mato omu manywero, amagana nambere ganyweraga; nago obugaizire okunywa gayema. 39Namagana gayemera omu maiso gobuti, namagana gazara ezebihuga nezebigondo nezebitanga. 40Yakobo yasororamu ebyana byazo, yaroza amaiso gamagana hali egebihuga na hali ezirukwiragura zona omu igana lya Labani: yasororamu ezewenka, ataiteranize hamu nigana lya Lyabani. 41Kandi kyahika ezamani ezomu igana obuzategere Yakobo yataga obuti omu maiso gigana na mato, zemere hali obuti; 42baitu igana obulyabaga libi, tiyabutahoga, nukwo embi zabaga za Labani, nezamani nizo za Yakobo. 43Kandi omusaija yasagya muno, yatunga amagana maingi, nabazana nabairu, negamira nenkaina.