Swahili Bible2

29

1Yakobo yagenda orugendorwe, yaija omu nsi yabana boburugaizoba. 2Yarora kandi dora, iziba omu iswa, kandi dora, amagana asatu agentama ezibyamire haihi nalyo; baitu omu iziba eri numwo bayeseraga amagana: kandi nibale erikaba liri ha munwa gwiziba likoto muno. 3Nuho amagana gona gayesorolezaga: kandi bakumbyaga ibale okuliiha ha munwa gwiziba, bayeseraga entama, baga’rahoga ibale ha munwa gwiziba omu kiikaro kyalyo. 4Yakobo yabagambira ati Bene baitu, nimuruga ha? Bagamba ngu Tuli ba Harani. 5Yabagambira ati Mumanyire Labani omwana wa Nahora? Bagamba ngu Tumumanyire. 6Yabagambira ati Aliyo ayomire? Bagamba ngu Ayomire: kandi dora, Rakeri omuharawe naija nentama. 7Yagamba ati Dora, izoba terikahendekere nakasumi tikakahikire okusoroza ente; mwesere entama, mugende muzirise. 8Bagamba ngu Titurukosobora okuhikya amagana gona obugarasorozebwa, bakumbye ibale okuliiha ha munwa gwiziba; nubwo turayesera entama. 9Obwakaba nakigamba nabo, Rakeri yaija nentama za ise, baitu nuwe yazirisaga. 10Kandi kyahika Yakobo obuyaboine Rakeri omuhara wa Labani nyinarumi, Yakobo yai’ra haihi, yakumbya ibale naliiha ha munwa gwiziba, yayesera igana lya Labani nyinarumi. 11Yakobo yanywegera Rakeri, yaimukya irakalye na’ra. 12Yakobo yagambira Rakeri okwali mwene wabu ise, kandi omwana wa Rebeka: yairuka, yagambira ise. 13Kandi kyahika, Labani obuyahulire ebigambo bya Yakobo omwana wa nyina, yairuka okumutangi’ra, yamugwa omunda, yamunywegera, yamutahya omu njuye. Yagambira Labani ebigambo ebi byona. 14Labani yamugambira ati Mazimakwo iwe oli igufa lyange, kandi omubiri gwange. Yaikara nauwe okwezi kumu. 15Kandi Labani yagambira Yakobo ati Baitu oli mwene waitu, nikyo oramperezaga busa? Ngambira, empere yawe eriba ki? 16Kandi Labani akaba anyina abahara babiri: ibara lyomukuru Leya, nibara lyomuto Rakeri. 17Namaiso ga Leya gakaba gomere; baitu Rakeri akabali murungi kandi wokusemererwa. 18Kandi Yakobo akagonza Rakeri; yagamba ati: ndikuherereza emyaka musanju habwa Rakeri omwana wawe omuto. 19Labani yagamba ati Hakire mukuhe iwe okukira okumuha omusaija ondi: ikara nanyowe. 20Yakobo yahereza emyaka musanju habwa Rakeri; kandi haluwe ekasisana nkebiro bike habwokugonza okuyamugondeze. 21Yakobo yagambira Labani ati Mpa mukazi wange, baitu ebiro byange bihikire, ngende namberali. 22Labani yasoroza abasaija bona abomu kiikaro, yacumba obugenyi. 23Kandi kyahika omu kaikirizi yatwara Leya omuharawe yamumuletera; yagenda namberali. 24Labani yahayo Ziripa omuzanawe okuba omuzana wa Leya omuharawe. 25Kandi kyahika nyenkya, yabona nuwe Leya: kandi yagambira Labani ati Kinu kiki ekyonkozire? Ntakuherereze Rakeri? 26Kandi kiki okumbiha? Labani yagamba ati Tibakora bati omu ruganda rwaitu okusweza omuto okubanza omuzigaijo. 27Omale ebiro musanju ebyogu, nukwo tukuhe nauwe habwokuhereza okworamperezaga emyaka musanju endi. 28Yakobo nukwo yakozire ati yamara ebirobye musanju; yamuha Rakeri omuharawe okumuswera. 29Labani yaha Rakeri omuharawe omuzanawe Bira okuba omuzanawe. 30Kandi yagenda hali Rakeri, kandi yagonza Rakeri okukira Leya, kandi yamuherereza emyaka musanju endi.

31Kandi MUKAMA yarora Leya okuyanoberwe, yasumu’ra endaye: baitu Rakeri akabali engumba. 32Leya yatwara enda, yazara omwana omwojo, yamuruka ibaralye Reubeni: baitu akagamba ati Baitu MUKAMA arolerire okubonabona kwange; baitu hati iba nyowe arangonza. 33Kandi yagaruka yatwara enda, yazara omwana omwojo, yagamba ati Baitu MUKAMA akahu’ra ngu noberwe, nikyo amperire nomwana onu: kandi yamuruka ibaralye Simeoni. 34Kandi yagaruka yatwara enda, yazara omwana omwojo yagamba ati Nukwo omurundi gunu iba nyowe araterana nanyowe, baitu muzalire abana abojo basatu: ibaralye nikyo lyarukirwe Levi. 35Yagaruka yatwara enda, yazara omwana omwojo: yagamba ati omurundi gunu ndakugiza MUKAMA: nikyo yamurukire ibaralye Yuda: yaleka okuzara.