Swahili Bible2

27

1Kandi kikahika, Isaka obuyamazire okuhwita, namaisoge gahimbaire, atarukurora kurungi, yayeta Esau, omwanawe omuzigagaijo, yamugambira ati Mwana wange: yamugambira ati Dora nyowe. 2Yagamba ati Dora nyowe ndi mugurusi timanyire ekiro ekindiferamu. 3Nukwo hati, nkwesengerize, kwata ebyohingisa, omufuko gwawe nobuta bwawe, ogende omu kisaka ompigire omuhigo 4kandi onsemereze enyama ezirungirwe, nkokundukugonza ogindetere ndye obwomezi bwange bukusabire omugisa ntakafire. 5Rebeka yahu’ra Isaka obuyagambire Esau omwanawe. Esau yagenda omu kisaka okuhiga omuhigo nokuguleta. 6Rebeka yagambira Yakobo omwanawe ati Dora, mpulire so nagambira Esau mugenzi wawe ati. 7Ondetere omuhigo, onsemereze enyama ezirungirwe., ndye nkusabire omugisa omu maiso ga MUKAMA ntakafire. 8Nukwo hati mwana wange, hu’ra iraka lyange, nkokundukuragira binu. 9Genda hati omu mbuzi, ondetere ebyana byembuzi ebirungi bibiri; nyowe ndabusemereza ‘so okuba enyama ezirungirwe nkokwagonza 10naiwe oragitwa’ra ‘so alye nukwo akusabire omugisa atakafire. 11Yakobo yagambira Rebeka nyina ati Dora, Esau mugezi wange musaija webyoya, nanyowe omubiri gwange nugutera 12Rundi isenyowe arankwataho, kandi ndasisana haluwe nkomugobya kandi ndayeretaho okukyenwa, kunu tiguli omugisa. 13Nyina yamugambira ati Okukyenwa kwawe kube hali nyowe mwana wange; kimu kyonka, hu’ra iraka lyange genda obindetere 14Yagenda yabitaba’ra yabiretera nyina:nyina yasemeza enyama ezirungirwe nka ise okuyagonzaga 15Kandi Rebeka yaihayo ebyokujwara ebirungi ebya Esau, omwanawe omuzigaijo ebyakaba anyinabyo omu nju, yabijweka Yakobo omwanawe omuto: 16kandi yata empuzobwana bwembuzi ha nkumuze na ha ngotoye harukule’ra: 17yaha omwanawe Yakobo omungaroze enyama ezirungirwe nebyokulya ebiyasemize. 18Yaija hali ise, yagamba ati Tata yagamba ati Dora nyowe niwoha mwana wange? 19Yakobo yagambira ise ati Ninyowe Esau, omwana wawe omuzigaijo nkozire nkokwondagire imuka nkwesengerize oika’re olye ha muhigo gwange obwomezi bwawe bunsabire omugisa. 20Isaka yagambira omwanawe ati kiki ekikuguboneseze bwango kiti omwana wange? Yagamba ati Baitu MUKAMA Ruhanga wawe ankonyire. 21Isaka yagambira Yakobo ati I’rahaihi, nkwesengerize, nkusisirizeho mwana wange Esau mali mali rundi toli uwe. 22Yakobo yai’ra haihi Isaka ise kandi yamusisizaho, nagamaba ati Iraka niryo iraka kya Yakobo, baitu engaro nizo engaro za Esau. 23Kandi atamukenge baitu enkumuze zikaba zinyina ebyoya, nkenkumu za mugenziwe Esau; nikyo yamusabire omugisa. 24Yagamba ati Niwe mwana wange Esau mali mali 25yagamba ati Ninyowogu. Yagamba ati Gunyirize haihi nanyowe ndalya ha muhigo gwomwana wange, omugisa. Yagumuiriza haihi, yalya. 26ya muletera amarwa yanywa. Isaka ise yamugambira ati I’ra haihi hati bunu onywegeremwana wange. 27Yai’ra haihi yamunywegera: yahu’ra okuboya okwebyokujwarabye, yamusabira omugisa nagamba ati

Dora, okuboya kwomwana wange kuli nkokuboa kwomusiri

MUKAMA ogwanaire omugisa:

28Kandi Ruhanga akuhege ha rume oruruga haiguru

Na ha burungi bwensi,

Nengano nyingi namarwa maingi

29Abantu bakuherezege,

Namahanga gakuinamirege

Olemege bene banyu,

Abana ba nyoko bakuinamirenge

Akyenwege wena anyakukukyena,

Kandi ahebwege omugisa wena akusabira omugisa.

30Kandi kyahika, Isaka obuyamazire okusabira Yakobo omugisa, nauwe obwakaba nakiruga omu maiso ga Isaka ise, Esau mugenziwe, nubwoyaija ararugire okuhiga. 31Kandi nauwe akasemeza enyama ezirungirwe yaziretera ise, yagambira ise ati Isenyowe aimuke, alye ha muhigo gwomwanawe, obwomezi bwawe bunsabire omugisa. 32Isaka ise yamugambira ati Niwoha? Yagamba ati Ninyowe mwana wawe,omuzingaijo wawe Esau. 33Isaka yatukumira muno muno, yagamba ati kandi ogu noha ahigire omuhigo, agundetirege, nanyowe ndire ha byona otakaizire, kandi musabire omugisa? ego, nokuhabwa alihabwa omugisa. 34Esau obuyahulire ebigambo bya ise, ya’ra oku’ra kwingi muno. Okwojubune bwingi, yagambira ise ati Nsabira nyowe, kandi nanyowe, ai bambi Tata. 35Yagamba ati mugenzi wawe aizirege nagobya kandi akuihireho omugisa gwawe. 36Yagamba ati Atarukwe kurungi ibaralye Yakobo? baitu atahire omu byange emirundi enu ebiri: akanyihaho ebyobukuru bwange: kandi na hati dora, anyihireho omugisa gwange. Yagamba ati Tonyahulireho nanyowe omugisa? 37Isaka yagarukamu nagambira Esau ati Dora, muhaire okukulema, na bagenzibe bona mbamuhaire okuba bairube; kandi murisizege engano namarwa: kandi kiki ekindakuko’ra iwe mwana wange? 38Esau yagambira ise ati Onyina omugisa gumu gwonka Tata? Nsabira nyowe, kandi nanyowe ai bambi Tata. Esau yaimukya irakalye ya’ra. 39Isaka ise yagarukamu namugambira ati

Dora, enju yawe erabaga eyoburungi bwensi,

Kandi yorume oruruga omu iguru haiguru;

40Na busitama yawe erakuhaga obwomezi, Kandi oraherezaga mugenzi wawe.

Kandi kirihika obwolyejugumura.

Nubwo olikunkumura ekikoligokye okuruga ha bikya byawe. 41Esau yanoba Yakobo habwomugisa ise oguyamusabire: Esau yagamba omu mumutimagwe ati Ebiro ebyokuliri’ra isenyowe biri haihi okuhika; nubwo ndiita mugenzi wange Yakobo. 42Bagambira Rebeka ebigambo bya Esau omwanawe omuzigaijo; yatuma okweta Yakobo omwanawe omuto, yamugambira ati Dora, mugenzi wawe Esau nayehumuza omu bigambo byawe natekereza okukuita. 43Nukwo hati bunu mwana wange, hu’ra iraka lyange; imuka oyebinge Labani munyanya nyowe ali 44Harani; omaleyo hamu nauwe ebiro ebitali bingi, okuhikya ekiniga kya mugenzi wawe obukirihwaho; 45okuhikya okubihirwa kwa mugenzi wawe obukurihwaho namberoli, kandi alyebwa ekiwamukozire: nubwo ndituma okukuihayo: kiki ekirabanyitira inywembi izoba limu?

46Rebeka yagambira Isaka ati Obwomezi bwange bunjwahisize habwabahara ba Hesi: Yakobo obwaliswera omukazi na bahara ba Hesi, abali nkabo, abahara bensi, obwomezi bwange bulingasira ki?