Swahili Bible2

8

1KANDI enu niyo emitwe eyenju zabaisebo, kandi ganu nigo mabara gabaisenkurubo abarugire Baburoni hamu nanyowe, omu bukama bwa Atakisakisi omukama. 2Owomu bana ba Finehasi, Geresomu: Owomu bana ba Itama, Danieri: owomu mu bana ba Daudi, Hatusi. 3Owomu bana ba Sekaniya; womu mu bana ba Parosi, Zekariya: kandi hamu nauwe bakabara abasaija kikumi mwatano ababazirwe nkamabara gabaisenkurubo okugali. 4Owomu bana ba Pahasi-moabu, Eryehoenai mutabani wa Zerahiya; kandi hamu nauwe abasaija bikumi bibiri. 5Owomu bana ba Sekaniya, mutabani wa Yahazyeri; kandi hamu nauwe abasaija bikumi bisatu. 6Kandi owomu bana ba Adini, Ebedi mutabani wa Yonasani; kandi hamu nauwe abasaija atano. 7Kandi owomu bana ba Eramu, Yesaya mutabani wa Ataliya; kandi hamu nauwe abasaija ensanju. 8Kandi owomu bana ba Sefatiya, Zebediya mutabani wa Mikaeri; kandi hamu nauwe abasaija kinana. 9Owomu bana ba Yoabu, Obadiya mutabani wa Yehyeri; kandi hamu nauwe abasaija bikumi bibiri mu ikumi mu munana. 10Kandi owomu bana ba Seromisi, mutabani wa Yosifiya; kandi hamu nauwe abasaija kikumi mu mukaga. 11Kandi owomu bana ba Bebai; Zekariya mutabani wa Bebai; kandi hamu nauwe abasaija abiri mu munana. 12Kandi owomu bana ba Azigadi, Yohanani mutabani wa Hakatani; kandi hamu nauwe abasaija kikumi mu ikumi. 13Kandi abomu bana ba Adonikamu, abahempero; namabara gabu nganu, Erefereti, Yeuweri, na Semaya, kandi hamu nabo abasaija nkaga. 14Kandi abomu bana ba Biguvai, Usai na Zabudi; kandi hamu nabo abasaija nsanju.

15Kandi nkabasoroza hamu ha kyambu ekirukugera nikigenda Ahaya; kandi oku tukatema orukande, twaikara ebiro bisatu: narora abantu, na banyakatagara, kandi ntasange nomu ha bana ba Levi. 16Nubwo natuma okweta Eryezere, na Aryeri, na Semaya, na Erinasani na Nasani, na Zekaliya, na Mesuramu, abasaija abakuru; kandi na Yoyalibu, na Erinasani, abakaba bali begesa. 17Nabatuma okugenda hali Ido omukuru owekiikaro Kasifiya; nabagambira ekibalibagambira Ido, na bene babu Abanesini, omu kiikaro Kafiya, batuletere abahereza habwenju ya Ruhanga waitu. 18Kandi habwomukono omurungi ogwa Ruhanga waitu ogukaba guli halitwe bakatuletera omusaija wokwetegereza, owomu bana ba Mahali, mutabani wa Levi, mutabani wa Isareri; na Serebiya, hamu na batabani na bene babu, ikumi na munana; 19na Hasabiya, kandi hamu nauwe Yesaya owomu bana ba Merali, bene babu, na batabani babu, amakumi abiri; nabomu Banesini, 20Daudi nabakuru aabahaireyo habwokuhereza Kwabalevi, Abanesini bikumi bibiri mwabiri: bona bakaturwa amabara gabu. 21Nubwo nadumira oku okusiba, ha kyambu Ahaya, twebundaze omu maiso ga Ruhanga waitu, tuse’re namberali omuhanda oguterekerire habwaitu na habwana baitu abato, na habwebintu byaitu byona. 22Baitu nkakwatwa ensoni okusaba omukama ekihanda kyabaserikale nabahambarasi okutukonyera okurwana nabanyanzigwa omu muhanda: baitu tukaba tugambire omukama ngu Omukono gwa Ruhanga waitu guli ha bona abamuse’ra, habwerungi; baitu obusobozibwe nekinigakye nibirwanisa bona abamufuruka. 23Nukwo twasiba, twayesengereza Ruhanga waitu habweki: kandi yaikiriza okwesengerezebwa. 24Nubwo nabaganizamu ikumi nabiri ha bakuru ba banyakatagara, nibo Serebiya na Hasabiya na bene 25babu ikumi hamu nabo, nabalengera efeza, nezabu, nebintu, baitu nikyo kihongwa habwenju ya Ruhanga waitu, omukama, nabahanuzibe, nabanyorobe, naba Isareri bona abakaba bali oku ebibahongere: 26nibyo nalengire omu mukono gwabu, etaranta zezabu rukaga mwatano, nebintu byefeza taranta kikumi; 27nebyezabu taranta kikumi; nebibibindi byezabu abiri, eza daliki rukumi; nebintu bibiri ebyemiringa emirungi erukwengengeta, ezomuhendo okuingana nezabu. 28Nabagambira nti Inywe muli barukwera hali MUKAMA, nebintu nibyo birukwera; nefeza nezabu nikyo kihongwa ekyokugonza hali MUKAMA, Ruhanga wa baisenkuru inywe. 29Mulorege, mubirindege, okuhikya obumulibihemba omu maiso ga bakuru ba banyakatagara Nabalevi, nabakuru benju zabaisebo aba Isareri, Yerusalemu omu bisika ebyenju ya MUKAMA. 30Nukwo banyakatagara Nabalevi bahabwa obulemezi obwefeza, nezabu, nebibintu, okubireta Yerusalemu hali enju ya Ruhanga waitu.

31Nubwo twaruga ha kyambu Ahaya ha kiro kya ikumi nabibiri okyo kwezi okwokubanza, okugenda Yerusalemu: omukono gwa Ruhanga waitu gukaba guli halitwe, yatujuna hali omukono gwomunyanzigwa nogu arukugwera abantu omu muhanda. 32Twahika Yerusalemu, twaikarayo ebiro bisatu. 33Kandi kiro kyakana, efeza nezabu nebintu byalengwa omu nju ya Ruhanga waitu, byahebwayo omu mukono gwa Meremosi mutabani wa Uliya nyakatagara; kandi hamu nauwe hakaba haroho Eryeza mutabani wa Finehasi; kandi hamu nauwe hakaba haroho Yozabadi mutabani wa Yesuha, na Noadiya mutabani wa Binui, 34Abalevi; byona nkomuhendo gwabyo kandi nkobulemezi bwabyo okubikaba biri: kandi obulemezi bwona bukahindukwa omu kasumi ako. 35Abana bokusengurwa, abarugire oku nambere babingirwe, bahonga ebihongwa ebyokeze hali Ruhangawa Isareri, enimi ikumi naibiri habwa Isareri yona, entama empaya kyenda mu mukaga, ebyana byentama nsanju mu musanju, embuzi empaya ikumi naibiri habwekihongwa kyekibi: ebi byona bikaba biri ekihongwa ekyokeze hali MUKAMA. 36Kandi baha abamasaza abomukama ebiragiro byomukama, nabalema abenseri yekyambu: bakonyera abantu nenju ya Ruhanga.