Swahili Bible2

9

1NUBWO MUKAMA yagambira Musa ati Genda hali Faraho, omugambire oti Nukwo agambire MUKAMA Ruhanga Wabaheburaniya ati Leka abantu bange bagende, bampereza. 2Baitu obworayanga okubaleka, 3nogaruka okubakwata, dora, omukono gwa MUKAMA guli ha magana gawe agali omu bwe’re, ha mbarasi, na ha nkaina, na hangamira, na ha nte, na ha mbuzi: kisotoka nyingi muno. 4Kandi MUKAMA alisorora amagana ga Isareri omu magana ga Misiri: kunu tihalifa nemu hali zona ezabana ba Isareri. 5MUKAMA yataho akasumi akayaragire, nagamba ati Ijo MUKAMA alikora eki omu nsi. 6MUKAMA yakora eki obukwakire nyenkya, amagana gona aga Misiri gafa: baitu omu magana gabana ba Isareri hatafe nemu. 7Faraho yatuma, kandi dora, omu magana ga Isareri busaho eyafire nobwekuba emu. Baitu omutima gwa Faraho gwagumangana, tiyaleka abantu.

8MUKAMA yagambira Musa na Aroni ati Mweyo’re ebihi biju eryomu kyoto, Musa alimise haiguru omu maiso ga Faraho. 9Kandi lirifoka ecucu hansi yona eya Misiri, liriba kizimba ebikurugamu ebihoya ha bantu na ha bisoro, omu nsi yona eya Misiri. 10Bayora iju eryomu kyoto, bayeme’ra omu maiso ga Faraho; Musa yalimisa haiguru; lyafoka ebizimba ebirukurugamu ebihoya ha bantu na ha bisoro. 11Abafumo batasobole okweme’ra omu maiso ga Musa habwebizimba; baitu ebizimba bikaba biri ha bafumo na ha Bamisiri bona. 12MUKAMA yagumaganiza omutima gwa Faraho, tiyabahu’ra; nka MUKAMA yagambire Musa.

13MUKAMA yagambira Musa ati Imuka nyenkya omu rukyakya, oyeme’re omu maiso ga Faraho, omugambire oti Nukwo agambire MUKAMA Ruhanga Wabaheburaniya ati Leka abantu bange bagende, bampereze. 14Baitu omurundi gunu ndakuletaho emihito yange yona ha mutima gwawe, na ha bairu bawe, na ha bantu bawe; nukwo omanye tiharoho ondi omu nsi yona arukusisana nyowe. 15Baitu hati nakukutire iwe nabantu bawe norufu, 16wakuhwerekerire hansi: baitu mazima mali nikyo nakwemererize okukwoleka amani gange, ibara lyange ligambirwe omu nsi zona. 17Na hati hona noyenyumiriza ha bantu bange, okutabaleka okugenda? 18Dora, ijo omu kasumi kanu ndinaga orubale rwingi muno, orutakabahoga omu Misiri ekaba okubaho nokuhikya hati. 19Nukwo hati bunu, otume oyanguhye okutahya amagana gawe na byona ebyonyinabyo omu bwe’re baitu abantu bona nebisoro byona ebirizoka omu bwe’re ebitaliretwa omu nju orubale rulibitera, kandi barifa. 20Ayatinire ekigambo kya MUKAMA omu bairu ba Faraho, yairukiza abairube namaganage yairukiza abairube namaganabe omu maju: 21nogu atarayenzire ekigambo kay MUKAMA, yaleka abairube namaganage omu bwe’re.

22MUKAMA yagambira Musa ati Go’ra omukono gwawe haiguru, orubale ruije omu nsi yona eya Misiri, ha bantu na ha bisoro, na bunyansi bwomu misiri, omu nsi yona eya Misiri. 23Musa yaimukya omuigogwe haiguru;

MUKAMA yatweka okuhinda norubale, nomu’ro gwasirimuka hansi; MUKAMA yanaga orubale hansi ha Misiri. 24Nukwo habaho orubale nomu’ro nugwaka hagati yorubale rwingi muno, orutakabahoga omu nsi yona ya Misiri, ekaba okuba ihanga. 25Orubale rukatera omu nsi yona eya Misiri byona ebikaba biri omu bwe’re, abantu nebisoro; orubale rwatera obunyansi bwona obwomu Misiri, rwacwa omuti gwona ogwomu Misiri. 26Rundi omu nsi ya Goseni yonka, nambere abana ba Isareri bakaba bali, nuho hatarabaire rubale. 27Faraho yatuma, yayeta Musa na Aroni, yabagambira ati Nsisire omurundi gunu: MUKAMA nuwe ahikirire, kandi nyowe nabantu bange tuli babi. 28Musabe MUKAMA; baitu okuhinda kwamani norubale bi’mazire, nanyowe ndibaleka, mugende, timuliikaraho. 29Musa yamugambira ati Obundakaruga ha rubuga, nubwo ndago’ra emikono yange hali MUKAMA; okuhinda kurahwaho, kunu tahalibaho orubale obundi; nukwo omanye ensi ya MUKAMA. 30Baitu iwe nabairu bawe, manyire nti timukyatina MUKAMA Ruhanga. 31Kandi obugoigo na sayiri bikaretwa: baitu sayiri ekaba etekere, nobugoigo bukaba busasuire. 32Baitu engano nebihimba bitaterwe: baitu bikaba bitakarukire. 33Baitu Musa yaruga ha rubuga hali Faraho, yago’ra emikonoye hali MUKAMA: okuhinda norubale byahwaho, kunu enjura etagwe hansi. 34Faraho obuyaboine enjura norubale nokuhinda bihoireho, yayengera okusisa, yagumanganiza omutimagwe, uwe nabairube. 35Omutima gwa Faraho gwangumangana kunu tiyaleka abana ba Isareri okugenda; nka MUKAMA okuyagambire habwa Musa.