Swahili Bible2

8

1MUKAMA yagambira Musa ati Taha hali Faraho, omugambire oti Nukwo MUKAMA agambire ati Leka abantu bange bagende, banko’re. 2Kandi obworayanga okubaleka, dora, nditera emitano yawe yona nebikere, 3nekyambu kiriijura ebikere, kandi biritemba nibitaha omu nju yawe, nomu kisika kyawe ekyoraramu, na ha kitabu kyawe, nomu nju yabairu bawe, na ha bantu bawe, nomu byoto byawe, nomu ncuba zawe ezokugiramu: 4kandi ebikere biritemba haliwe, na hali abantu bawe, na ha bairu bawe bona. 5MUKAMA yagambira Musa ati Gambira Aroni oti

Go’ra omukono gwawe nomuigo gwawe ha byambu, ha mikura, na ha ntunga, otembye ebikere omu nsi ya Misiri. 6Aroni yago’ra omukonogwe ha maizi gomu Misiri; ebikere byatemba, byaswekera ensi ya Misiri. 7Nabarogo bakakora bati noburogo bwabu, batembya ebikere omu nsi ya Misiri. 8Nubwo Faraho yayeta Musa na Aroni, yagamba ati Mwesengereze MUKAMA, anyiheho ebikere, nyowe nabantu bange; nanyowe ndireka abantu bagende basa’re MUKAMA ebyonzira. 9Musa yagambira Faraho ati Ba nekitinisa kinu namberendi; nsabe kasumi ki habwawe, na habwabairu bawe, na habwabantu bawe, ebikere bihwerekerezebwe namberoli nomu maju gawe, biikale omu kyambu honka? 10Yagamba ati Ijo. Yagamba ati kikorwe nkekigambo kyawe okukiri, nukwo omanye tiharoho arukusisana nka MUKAMA Ruhanga waitu. 11Ebikere birikurugaho, iwe, namaju gawe, nabairu bawe, nabantu bawe; biriikara omu kyambu honka. 12Musa na Aroni baruga hali Faraho:

Musa yakunga MUKAMA habwebikere ebyakaba aletire Faraho. 13MUKAMA yakora nkekigambo kya Musa okukikaba kiri; ebikere byafa omu maju, nomu zigati, nomu misiri. 14Babisoroza emitumo nemitumo: ensi yanunka. 15Baitu Faraho obuyaboine atungire omwanya,

yagumanganiza omutimagwe, tiyabahu’ra; nka MUKAMA okuyagambire.

16MUKAMA yagambira Musa ati Gambira Aroni oti Go’ra omuigo gwawe, otere ecucu yensi, efoke enda omu nsi yona eya Misiri. 17Bakora bati; Aroni yago’ra omukonogwe nomuigogwe, yatera ecucu yensi, habaho enda ha bantu na ha bisoro; ecucu yona yensi yafoka enda omu nsi yona eya Misiri. 18Nabarogo nukwo bakozire bati noburogo bwabu okuhindura enda, baitu batasobole: hakabaho enda ha bantu na ha bisoro. 19Nubwo abarogo bagambira Faraho ngu Nurwo rukumu rwa Ruhanga: omutima gwa Faraho gwamugangana, tiyabahu’ra; nka MUKAMA okuyagambire.

20MUKAMA yagambira Musa ati Imuka nyenkya omu rukyakya, oyeme’re omu maiso ga Faraho; dora, naturuka okugenda ha maizi; omugambire oti Nukwo agambire MUKAMA ati Leka abantu bange bagende, banko’re. 21Baitu obwotalireka abantu bange okugenda, dora, ndikuletera emizinga yensohera, iwe, nabairu bawe, nabantu bawe, nomu maju gawe: namaju Gabamisiri galiijura emizinga yensohera, nebibanja nambere gali. 22Kandi ndibaganizaho ha kiro kiri ensi ya Goseni, abantu bange ha barukuikara, emizinga yensohera etagendamu; nukwo omanye Ninyowe MUKAMA hagati yensi. 23Kandi nditaho okucungura hagati yabantu bange babantu bawe: ijo halibaho akokuro’raho ako. 24MUKAMA yakora ati; hakaija emizinga emibi eyensohera omu nju ya Faraho nomu maju gabairube: nomu nsi yona ya Misiri, ensi ekafa habwemizinga yensohera. 25Faraho yayeta Musa na Aroni yagamba ati Mugende, musa’re ebyonzira Ruhanga wanyu omu nsi emu. 26Musa yagamba ati Tikiri kirungi okukora tuti; baitu tulisara ekyomuziro Ekyabamisiri hali MUKAMA Ruhanga waitu: dora, tuliherayo ekyomuziro Ekyabamisiri omu maiso gabu, kunu tibalitutera amabale? 27Tuligenda orugendo orwebiro bisatu omu irungu, tulisa’ra ebyonzira MUKAMA Ruhanga waitu, nkokwaturagira. 28Faraho yagamba ati Ndibaleka mugende musa’re ebyonzira MUKAMA Ruhanga wanyu omu irungu; kimu kyonka mutaligenda hara muno, kandi munsabire. 29Musa yagamba ati Dora, ninduga omu maiso gawe, ndyayesengereza MUKAMA emizinga yensohera eruge ha Faraho, na ha bairube, na ha bantube, ijo: kimu kyonka Faraho atagaruka okugobya okutaleka abantu, bagende basa’re MUKAMA ebyonzira. 30Musa yaruga omu maiso ga Faraho, yayesengereza MUKAMA. 31MUKAMA yakora nkekigambo kya Musa; yaihaho emizinga yensohera hali Faraho, na ha bairube,na ha bantube; hatasigaleho nemu. 32Faraho yagumanganiza omutimagwe nomurundi ogu, tiyaleka abantu.