Swahili Bible2

4

1MUSA yagarukamu nagamba ati Baitu, dora, tibalinyikiriza, kunu tibalihu’ra iraka lyange: baitu baligamba ngu MUKAMA tatubonekire. 2MUKAMA yamugambira ati Kiki eki ekiri mu mukono gwawe? 3Yagamba ati Omuigo. Yagamba ati gunage hansi. Yagunaga hansi, gwafoka enjoka, Musa yairuka omu maiso gayo. 4MUKAMA yagambira Musa ati Go’ra omukono gwawe, gikwate ha mukira: (yago’ra omukonogwe, yagikwata, yafoka omuigo omu mukonogwe): 5nukwo baikirize ngu MUKAMA Ruhanga wabaisenkurubo, Ruhanga wa Iburahimu, Ruhanga wa Isaka, kandi Ruhanga wa Yakobo akubonekire. 6Kandi MUKAMA yamugambira ati Ta hati omukono gwawe omu kifuba kyawe. Yata omukonogwe omu kifuba: obuyaguihiremu, dora, omukonogwe gukaba gunyina ebigenge, nugwera nkebirika. 7Yagamba ati Ga’ra omukono gwawe omu kifuba kyawe. (Yaga’ra okukonogwe omu kifubakye; obuyaguihire omu kifubakye; dora, gukagaruka okuba nkomubirigwe.) 8Kandi kirihika obubatalikuikiriza, nobukwakuba okuhu’ra iraka eryakuro’ra akokubanza, baliikiriza iraka eryakuro’raho akakabiri. 9Kandi kirihika, obubatalikiriza obwokuro’raho obu bubiri, nobukwakuba okuhu’ra iraka lyawe, nubwo olireta amaizi agekyambu oligasesa ha bwe’re: kandi amaizi agoliiha omu kyambu, galifoka esagama ha bwe’re. 10Musa yagambira MUKAMA ati Ai Mukama, nyowe tindi muntu webigambo, nobuhokuba omu biro byaira, nobuhokuba hati obaire okubaza nomuiru wawe: baitu tingamba bwango, norulimu rwange tirurukwanguha. 11MUKAMA yamugambira ati Noha yakozire akanwa komuntu? Rundi noha afora ekifa munwa, rundi omufu wamatu, rundi arukurora, rundi omufu wamaiso? Tininyowe MUKAMA nukwo hati bunu genda, 12nyowe ndabaga nakanwa kawe. Ndakwesaga ebyoragambaga. 13Yagamba ati Ai mukama, tuma nkwesengerize, omu mukono gwogu oworukugonza okutuma. Ekiniga kya MUKAMA kyayakira 14Musa, yagamba ati Tiharoho Aroni mugenzi wawe Omulevi? Manyire nasobora okugamba kurungi. Kandi dora, naija okukutangi’ra: kandi obwalikurora, alisemererwa omu mutimagwe. 15Kandi olibaza nauwe, kandi olita ebigambo omu kanwake: nanyowe ndabaga nakanwa kawe, na kanwake, kandi ndabegesaga ebimurakoraga. 16Kandi aliba omugambizi wawe hali abantu: kandi kirihika, aliba nka Ruhanga namberali. 17Kandi olitwara omu mukono gwawe omuigo gunu ogwolikoza obwokuro’raho.

18Musa yagenda yagruka hali Yesero isezara, yamugambira ati Leka ngende, nkwesengerize, ngaruke hail bene baitu abali Misiri, ndole obuharaba bakiri bomezi. Yesero yagambira Musa ati Genda nobusinge. 19MUKAMA yagambira Musa Midiani ati Genda ogarukeyo Misiri, baitu abantu bona abakaba nibase’ra obwomezi bwawe bakafa. 20Musa yatwara mukaziwe nabanabe abojo, yabatembesa enkaina, yagaurkayo omu nsi ya Misiri. Musa yakwata omuigo gwa Ruhanga omu mukonogwe. 21MUKAMA yagambira Musa ati Obwaligarukayo Misiri, otalireka okukora omu maiso ga Faraho ebyamahano byona ebinataire omu mukono gwawe baitu ndigumanganiza omu mutimagwe, talireka abantu. 22Kandi oligambira Faraho oti Nukwo agambire MUKAMA ati Isareri nuwe mwna wange, 23omuzigaijo wange: kandi nkugambire ati Leka omwana wange agende, ampereze, naiwe oyangire okumuleka: dora, ndiita omwana wawe omuzigaijo wawe. 24Kandi kyahika, omu muhanda ha kiikaro ekyognyamu, MUKAMA yamuitirana, yase’ra okumuita. 25Nubwo Zipora yakwata ibale, yasara ekisusu ekyomwanawe, yakinaga ha bigerebye, yagamba ati Mananukwo oli muswezi wesagama namberendi. 26Nubwo yamuleka. Omukazi yagamba ati Oli muswezi wesagama habwokusara.

27MUKAMA akagambira Aroni ati Genda omu irungu okutangi’ra Musa. Yagenda yamutangi’ra ha rusozi rwa Ruhanga, yamunywegera. 28Musa yagambira Aroni ebigambo byona ebya MUKAMA ebiyamutumire nabyo, nobwokuro’raho bwona obuyamuragire. 29Musa na Aroni bagenda basoroza hamu abakuru bona abomu bana na Isareri: 30Aroni yagamba ebigambo byona MUKAMA ebiyagambire Musa, yakora obwokuro’raho omu maiso gabantu. 31Abantu baikiriza: kandi obubahulire ngu MUKAMA abungire abana ba Isareri, kandi ngu Aboine omuhito gwabu, bainamya emitwe yabu, baramya.