Swahili Bible2

38

1KANDI akakora ekyoto ekyebihongwa ekyokeze ekyomuti omusisa: okuraiha kwakyo kukaba kuli emikono etano, nokugaliha kwakyo mikono etano, okuraiha nokugaliha bikainganingana; noburaibura bwakyo mikono esatu. 2Yakora amahembe gakyo ha burugu bwakyo buna; amahembe gakyo gakaba gali gomulimo gumu hamu nakyo: yakisweka nemiringa. 3Yakora ebintu byona ebyekyoto, ebinaga, nenfuka, nebibindi, engango zenyama, nebiswa: ebintu byakyo byona akabikora nemiringa. 4Yakora habwekyoto ekisengijo ekyomulinga hansi yekibunu ekyokwehinguliriza hansi, kyahika haiguru hagati yoburibura bwakyo. 5Kandi yakora empeta ina habwensonga ina ezekisengijo ekyomulinga, okuba ebiikaro ebyemigamba. 6Yakora emigamba eyomuti omusisa, yagisweka nemiringa. 7Yata emigamba omu mpeta ha mbaju zekyoto, okukihimbisa, yakikora nembaho ezembaju, yasiga omwanya omunda.

8Yakora orwoho orwomulinga, nekibunu kyarwo kyomulinga, yarukora omu ndo’rwamu ezabakazi abaherezaga ha mulyango ogwehema yokutangatanganiramu.

9Kandi akakora ezigati: habworubaju orwobukizi bwobulyo ebikingyo ebyezigati bikaba biri byengoye zekitani ezarukirwe kurungi, emikono kikumi: 10enyomyo yabyo makumi abiri, nebina byabyo makumi abiri, nebina byayo makumi abiri, ebyemiringa, ebikwaso ebyenyomyo nebikomo byazo ebyefeza. 11Kandi habworubaju rwobukizi bwemoso emikono kikumi, enyomyo zayo amakumi abiri, nebikomo byazo abiri ebyemiringa; ebikwaso byenyomyo nebikomo byazo byefeza. 12Kandi habworubaju orwobugwaizoba hakaba haroho ebikingyo ebyemikono atano, enyomyo ikumi, nebina byazo ikumi; ebikwao ebyenyomyo nebikomo, byazo byefeza. 13Kandi habworubaju orwoburuagaizoba mikono atano. 14Ebikingyo ebyaha rubaju rumu orwirembo bikaba biri byemikono ikumi netano; enyomyo zabyo isatu, nebina byazo bisatu; 15kandi nukwo habworubaju orundi: ha mukono gunu na ha mukono guli ha irembo eryezigati hakaba haroho ebikingyo ebyemikono ikumi netano, enyomyo zabyo isatu nebina byazo bisatu. 16Ebikingyo byona ebyezigati okwehinguliriza bikaba biri byengoye ezekitani ezarukirwe kurungi. 17Nebina ebyenyomyo bikaba biri byemiringa ebikwaso byenyomyo nebikomo byazo byefeza nenyomyo yazo zikasweka efeza; nenyomyo zona ezezigati zikagumibwa nefeza. 18Nekikingyo ekiirembo lyezigati kikaba kiri omulimo gwomudalizi kyengoye za bu’ru nezirukugajuka, nezirukunanata nezekitani ezarukirwe kurungi: kandi okuraiha kwakyo kukaba kuli emikono abiri, kandi oburaibura nokugaliha byombi bikaba biri byemikono etano, okuinganangana nebikingyo byezigati. 19Kandi enyomyo zabyo zikaba ziri ina, nebina byazo zikaba ziri ina, byemiringa ebikwaso byazo byefeza, nemitwe yazo nebikomo byazo bikaswekwa efeza. 20Nenkondo zona ezehema, nezezigati okwehinguliriza, zikaba ziri zemiringa.

21Gunu nugwo muhendo ogwebintu byehema, ehema eyobwakaiso nkokubyabazirwe, nkekiragiro kya Musa okukikaba kiri habwokuhereza kwa Abalevi, omu mukono Itama, mutabani wa Aroni nyakatagara. 22Kandi Bezaleri mutabani wa Uli, mutabani wa Hura, womu ruganda rwa Yuda, akakora byona MUKAMA ebiyaragire Musa. 23Kandi hamu nauwe Oholyabu, mutabani wa Ahisamaki, omusaruzi kandi omukozi wokwetegereza, kandi omudalizi owengoye za bu’ru nezirukugajuka, nezirukunanata, nezekitani enungi.

24Ezabu yona eyibakozele omulimo gwona gwa harukwera, ezabu eyekihongwa yahika taranta abiri mu mwenda, na sekeri rusanju mwasatu, nka sekeri ya harukwera okweri. 25Nefeza yabo ababazirwe omu kitebe yahika taranta kikumi, na sekeri rukumi na musanju mu nsanju na itano, nka sekeri ya harukwera okweri: 26omuntu wena beka emu, nikyo kicweka kya sekeri, nka sekeri ya harukwera okweri, habwomuntu wena ayahinguire hali abo ababazirwe, abahikize emyaka abiri nokukiraho, abasaija busirira mukaga mwenkumi isatu mubitano mwatano. 27Nefeza taranta zikaba ziri zokwagya ebina bya barukwera, nebina ebyekikingyo; ebina kikumi etaranta emu ekina kimu. 28Kandi sekeri rukumi mu rusanju mu nsanju na itano akazikora ebikwaso ebyenyomyo, yasweka emitwe yazo, yakora nebikomo byazo. 29Nemiringa eyekihongwa taranta ensanju na sekeri enkumi ibiri mu bina. 30Kandi egi yakikoza ebina byomulyango gwehema yokutangatanganiramu, nekyoto kyomulinga, nebintu byona ebyekyoto, 31nebina ebyezigati okwehinguririza, nebina ebiirembo lyezigati, nenkondo zona ezezigati okwehinguririza.