Swahili Bible2

12

1MUKAMA akagambira Musa na Aroni omunsi ya Misiri 2nagamba ati Okwezi kunu kurabaga namberemuli okwokubanza omu mezi gona: kurabaga okwezi kwokubanza omu mwaka halinywe. 3Mugambire ekitebe kyona ekya Isareri muti Ha kiro kya ikumi ekyokwezi kunu balyatwa’ra ekyana kyentama omuntu wena, nkamajuga baisenkuru okugali, 4ekyana kyentama habwenju emu: kandi enju obweriba enke etarukumaraho ekyana kyentama, nubwo uwe na mutahiwe ahe’raine nenjuye balitwara kimu nkomuhendo gwabantu okuguli; nkomuntu wena okwalya nukwo mulibarwa ha kyana kyentama. 5Ekyana kyentama kyanyu tikiribaho kamogo, ekihaya ekitakahikize omwaka gumu: mulihiika omu ntama, rundi omu mburabuzi; 6kandi mulikyahura okuhikya ekiro kya ikumi na bina ekyokwezi kunu: okuso’rokana kwona okwekitebe kya Isareri balikiita orwebagyo. 7Kandi baliiha ha sagam, baligita ha mikumi’ro yombi na ha kisasi omu maju habalikirira. 8Kandi balirya enyama ha kiro kiri eyokeze omu’ro, nomugati ogutatumbisibwe; baligirya nemikubi erukusa’ra. 9Mutaligilyaho mbisi, nobwekuba ecumbirwe namaizi, baitu eyokeze omu’ro omutwe gwayo namaguru gayo nebyomu nda yayo. 10Nainywe mutaligisigaho okuhikya nyenkya; baitu erisigaraho okuhikya nyenkya; baitu erisigaraho okuhikya nyenkya muligyokya nomu’ro. 11Kandi nukwo muligirya muti; mwetegere omunda, nenkaito zaanyu ziri omu bigere byanyu, nomuigo gwanyu guli omu mukono gwanyu: muligirya bwango: nukwo Kuhingurwaho kwa MUKAMA. 12Baitu ndiraba omu nsi ya Misiri, abantu nebisoro; kandi abacwezi bona aba Misiri ndibacwera omusango ninyowe MUKAMA. 13Kandi esagama eriba namberemuli akokuro’raho ha maju namberemuli: kandi obundirora esagama, ndibahinguraho, kandi tahaliba orufu halinywe okubahwerekereza, obunditera ensi ya Misiri. 14Kandi ekiro kinu kiriba halinywe ekyokubaijukya, nainywe murakyerindaga obugenyi bwa MUKAMA: omubusinge bwanyu bwona murakyerindaga obugenyi habwekiragiro ekitahwaho. 15Ebiro musanju muralyaga omugati ogutatumbisibwe; kandi ha kiro ekyokubanza muraihamuga ekitumbisa omu maju ganyu: baitu wena alirya omugati ogutatumbisibwe okuruga ha kiro kyokubanza okuhikya ha kiro kya musanju, omuntu ogu aliihwa omu Isareri. 16Kandi ha kiro kyokubanza halibaho okuso’rokana okurukwera, kandi ha kiro kya musanju halibaho okuso’rokana okurukwera; emirimo yona etalikorwa omu biro ebi, rundi ebyokulya, nibyo byonka musobora okukora. 17Kandi murayerindaga obugenyi obwemigati atatumbisibwe; baitu ha kiro kinu kyonyini buli nyihiremu ebitebe byanyu omu nsi ya Misiri: nikyo murayerindiraga ekiro eki omu businge bwanyu bwona habwekiragiro ekitalihwaho. 18Omu kwezi okwokubanza, ha kiro kya ikumi na bina ekyokwezi orwebagyo, muralyaga emigati etatumbisibwe,okuhikya ekiro ekyokwezi ekyamakumi abiri mu kimu orwebagyo. 19Ebiro musanju hatalizoka ekitumbisa omu maju ganyu: baitu wena alirya ekitumbisibwe, omuntu ogu aliihwa omu kitebe kya Isareri, obwalibali omunyaihanga, rundi enzarwa. 20Mutalirya ekitumbisibwe; omu biikaro byanyu byona muralyaga emigati etatumbisibwe.

21Nubwo Musa yayeta abakaikuru bona ba Isareri, yabagambira ati Mukome, mwetwa’re ebyana byentama nkenganda zanyu okuziri, muite Okuhingurwaho. 22Kandi mulitwara ekikwato kya hezobu, mukiibike omu sagama eyomu kibindi, mumise ha kisasi na ha mikumiro yombi nesagama eyomu kibindi kandi busaho omuliinywe alituruka omu mulyango gwenju kuhikya nyenkya. 23Baitu MUKAMA alihingura okutera Abamisiri; kandi obwalibona esagama ha bisasi na ha mikumiro yombi, MUKAMA alihingura ha mulyango, kunutaliikiriza omuhwerekereza okutaha omu maju ganyu okubatera. 24Kandi murayerindaga ekigambo kinu kuba ekiragiro namberoli na hali abana bawe ekitalihwaho. 25Kandi kirihika, obumuliba mutahire omu nsi MUKAMA eyalibaha nkokuyaragaine, murayerindaga okuhereza kunu. 26Kandi kirihika, abana banyu obubalibagambira ngu Okuhereza kwanyu kunu amakuru gakwo niki? 27nubo muligamba ngu Nikyo kyonzira Ekyokuhingurwaho kwa MUKAMA, ayahanguire ha maju gabana ba Isareri omu Misiri, obuyatire Abamisiri, nakiza amaju gaitu. Abantu nainamya baramya. 28Abana na Isareri bagenda bakora bati; nka MUKAMA okuyaragire Musa na Aroni, nukwo bakozire bati.

29Kandi kyahika omu itumbi, MUKAMA yatera emizigaijo yona eyebisoro. 30Faraho yaimuka ekiro, uwe nabairube bona, Nabamisiri bona, habaho oku’ra kwingi omu Misiri; baitu hakaba hataroho enju etarafirwemu muntu. 31Yayeta Musa na Aroni ekiro, yagamba ati Muimuke, muruge omu bantu bange, inywe nabana ba Isareri; mugende, muhereze MUKAMA, nkokumwagambire. 32Mutwale embuzi zanyu nente zanyu, nkokumwagambire, mugende kandi munsabire omugisa nanyowe. 33Abamisiri bayekambisa abantu, okubanguhiriza okuruga omu nsi; baitu bakagamba ngu Tufire itwena. 34Abantu batwara ensano yabu ekaba etakatumbisibwe, encuba zabu ezokutugiramu zikaba ziboherwe omu ngoye zabu ha mabega gabu. 35Abana ba Isareri bakakora nkekigambo kya Musa okukikaba kiri; basaba Abamisiri ebintu byefeza, nebintu 36byezabu, nengoye: MUKAMA yabaha abantu okugonzebwa omu maiso Gabamisiri, babaha ebibasabire. Banyaga Abamisiri.

37Abana ba Isareri bakaimukya orugendo okuruga Ramesesi, bagenda Sukosi, abasaija nka busirira mukaga abagendaga nebigere, kandi nabana. 38Nekitebe ekyabanyaihanga bakatemba hamu nabo; nentama, nente, ebisoro bingi muno. 39Bayokya emigati etatumbisibwe eyensano etungirwe eyibaihire omu Misiri, baitu ekaba etatumbisibwe; baitu bakabingwa omu Misiri, batasobole okuikaraho, kunu bakaba batetekanirize ebyokulya. 40Lero okuikara kwabana ba Isareri okubaire omu Misiri, ekaberi emyaka bikumi bina mwesatu. 41Kandi kyahika emyaka bikumi bina mwasatu obuyahoireho, ha kiro eki kyonyini kyahika, amahe gona aga MUKAMA garuga omu Misiri. 42Nikyo kiro ekihikire okulindwa muno hali MUKAMA habwokubaiha omu nsi ya Misiri: nikyo kiro eki ekya MUKAMA,ekihikirire abana bona aba Isareri okwerindaga muno omu buijukuru bwabu bona.

43MUKAMA yagambira Musa na Aroni ati Kinu nikyo kiragiro Ekyokuhingurwaho: omunyaihanga wena atalikulyaho: 44baitu omuiru wena owomuntu ayaguzirwe nebintu obwolimara okumusara, nubwo aliryaho. 45Omugenyi, kandi anyakukolereza empera bataliryaho. 46Omu nju emu numwo kuralirwaga; otalitwara aheru yenju enyama na kake; kunu mutalihenda igufa na limu. 47Ekitebe kyona ekya Isareri balikora bati. 48Kandi omunyaihanga obwaraikaraga owanyu, obwaliba nagonza okwerinda okuhingurwaho hali MUKAMA, abasaijabe basarwe, nubwo alii’ra haihi akwerinde, kandi alifoka nkenzarwa: baitu omuntu wena atasazirwe atalilyaho. 49Ekiragiro kiriba kimu kyonka hali nzarwa, na hali omunyaihanga arukuikara omulinywe. 50Nukwo abana ba Isareri bona bakozire bati; nka MUKAMA okuyaragire Musa na Aroni, nukwo bakozire bati. 51Kandi kikahika ha kiro eki kyonyini, MUKAMA akaihamu abana ba Isareri omu nsi ya Misiri nkamahe gabu okugakaba gali.