Swahili Bible2

5

1KANDI kikahika ha kiro kyakasatu, Esiteri yajwara ebyokujwarabye ebyobukama, yayeme’ra omu zigati yomunda eyenju yomukama, erolerire enju yomukama: omukama yaika’ra ha kitebekye ekyobukama omu nju yobukama, haihi nomulyango ogwenju. 2Kandi kyahika, omukama obuyabine Esiteri omugo ayemerire omu zigati, yamukwatirwa embabazi: omukama yagoro’ra Esiteri omuigo gwezabu ogukaba guli omu ngaroze. Nukwo Esiteri yai’ra haihi, yakora ha ntuli yomuigo. 3Omukama yamugambira ati Nogonza ki Esiteri omugo? kandi nosaba ki? orakihabwa nokuhikya ekicweka kyobukama. 4Esiteri yagamba ati Obukiraba kisemire hali omukama, omukama na Hamani batahe hati ha bugenyi obumutekanirize. 5Omukama yagamba ati Yanguhya Hamani, kikorwe nka Esiteri okwagambire. Nukwo omukama na Hamani bataha ha bugenyi Esiteri obuyatekanize. 6Omukama yagambira Esiteri ha bugenyi bwamarwa ati Kiki ekyorukusaba? orakihabwa: Kandi kiki ekyorukugonza, nokuhikya ekicweka kyobukama kirikorwa. 7Esiteri yagarukamu yagamba ati Ekindukusaba kandi ekindukugonza nkinu; 8obundaba mboine embabazi omu maiso gomukama, kandi omukama obwaraba nasima okumpa ekindukusaba, nokukora ekindukugonza, omukama na Hamani baije ha bugenyi obundibatekaniriza, kandi ijo ndikora nkomukama okwagambire. 9Nubwo Hamani yaturuka ha kiro eki asemerirwe, kandi ahirirwe omutima: baitu Hamani obuyaboine Morodekai ali omu irembo lyomukama, kandi taimukire nobukwakuba okumuhigiza, yaijura ekiniga hali Morodekai. 10Baitu Hamani akeyigaliriza, yataha omukaye; yatuma okweta enganjanize na Zerosi mukaziwe. 11Hamani yabagambira ekitinisa kyobugudabwe, nabanabe okubali haingi, nebigambo byona omukama ebiyamukulizemu, kandi okuyamunyumize okukira abakuru nabairu bomukama. 12Kandi Hamani yagambaa ati Ego, Esiteri omugo ataikirize omuntu wena okutaha hali omukama ha bugenyi obuyatekanize, rundi nyowe nyenka; na ijo anyesere hamu nomukama. 13Baitu ebi byona tibingasira na kake, obundukurora Morodekai Omuyudaya aikalire omu irembo lyomukama. 14Nubwo Zeresi mukaziwe nenganjanize zona bamugambira ngu Leka bakole omuti ogwemikono atano okuraiha kwagwo, kandi nyenkya ogambire omukama Morodekai ahanikwe haligo: nubwo otahe nokusemererwa hamu nomukama ha bugenyi. Ekigambo eki kyasemeza Hamani; yakoza omuti ogu.