Swahili Bible2

2

1HANYUMA yebi, ekiniga kyomukama Ahasuero obukyaculire, yaijuka Vasiti, neki ekiyakozire, neki ekyamuragirweho. 2Nubwo abahereza bomukama abamuherezaga bagamba ngu Leka baseru’re omukama abaisiki abato abarungi” 3kandi omukama ateho abaduma omu masaza gona agobukamabwe, basoroze hamu abaisiki ababto bona abarungi omu Susani ekikali, omu nju yabakazi, balindwe Hegai omukonwa womukama, omulinzi wabakazi; kandi bahabwe ebintu byabu ebyokwesemeza: 4kandi omuisiki arukusimwa omukama abe omugo omu kiikaro kya Vasiti. Ekigambo kyasimwa omukama, yakora ati. 5Kandi hakaba haroho omu Susani ekikali Omuyudaya omu, ibaralye nuwe Morodekai, mutabani wa Yaira, mutabani wa Simei, mutabani wa Kisi, Omubenyamini; 6ogu akaihwa Yerusalemu, yasengurwa hamu nabanyagwa abasenguirwe na Yekoniya omukama wa Yuda, Nebukadeneza omukama wa Baburoni abayasenguire. 7Kandi akalera Hadasa, nuwe Esiteri, omuisiki wa isento: baitu akaba atanyina ise nobwakuba nyina, kandi omuisiki akabali omurungi muno; kandi ise na nyina obubafire,. Morodekai yamutwara aba nkomuharawe wenka. 8Nukwo kyahika, ekiragiro kyomukama nekigambokye obukyahulirwe, kandi abaisiki baingi obubasorozibwe hamu omu Susani omu kikali, balindwe Hegai, Esiteri yatwarwa omu nju yomukama, alindirwe Hegai, omulinzi wabakazi. 9Omuisiki yasimwa uwe, yagirirwa uwe embabazi; yamuha bwango ebintubye ebyokwesemeza, nemigaboye, nabaisiki musanju, abayasemerirwe okuba nabo, abomu nju yomukama: yamuihayo hamu nabaisikibe yamutahya omu kiikaro ekirukukira oburungi ekyomu nju yabakazi. 10Esiteri akaba atayolekere ihangalye, nobubakuba abantu bowabu: baitu Morodekai akamutere’ra aleke okubyoleka. 11Kandi Morodekai yagendagenda omu maiso gezigati yenju yabakazi, amanyege Esiteri okwali, kandi ebirimubaho. 12Kandi orubu orwomuisiki wena oburwaijaga okugenda hali omukama Ahasuero, amazire okukorwa nkekiragiro ekyabakazi okukiri, amezi ikumi nabiri (baitu nukwo ebiro ebyokusemezebwa kwabu byahikirizibwe biti, nukwo kugamba ngu amezi mukaga namagita agomugaju, namezi mukaga nebirukuboya ebirungi, nebintu ebyokwesemeza kwabakazi), 13nukwo omuisiki yaizire ati hali omukama, kyona kyona ekiyayenzire kyamuhabwa kigende nauwe okuruga omu nju yabakazi agende omu nju yomukama. 14Akagenda akairirizi, nyenkya yagaruka yataha omu nju yabakazi eyakabiri, alindwe Saasigazi, omukonwa womukama, ayalindaga abazana: atagaruke okugenda hali omukama, rundi omukama obuyamazire, kandi yamweta ibaralye. 15Kandi oburwahikire orubu rwa Esiteri, omuhara wa Abihairi, isento Morodekai, ayamutwaire abe nkomuharawe wenka, atahe hali omukama, atabase kintu kyona, rundi ebi byonka Hegai omukonwa womukama, omulinzi wabakazi, ebiyaragire. Kandi Esiteri yabona embabazi omu maiso gabo bona abamurozire. 16Nukwo Esiteri yatwarwa hali omukama Ahasuero omu njuye eyomukama, omu kwezi kwa ikumi, nukwo kwezi Tebesi, omu mwaka gwobusingebwe ogwa musanju. 17Kandi omukama akagonza Esiteri okukira abakazi bona, yabona embabazi nomugisa omu maisoge okukira abaisiki bona; nukwo yata na ha mutwegwe ekondo eyobukama, yamufora omugo omu kiikaro kya Vasiti. 18Nubwo omukama yacumbira obugenyi abakurube bona nabairube, nubwo bugenyi bwa Esiteri; kandi yalekera amasaza, yaha ebisembo nkokugaba kwo mukama okukukaba kuli. 19Kandi abaisiki obubasorozibwe omurundi ogwakabiri, Morodekai yaika’ra omu irembo lyomukama. 20Esiteri akaba atakolekere ihangalye, nobubakuba abantu bowabu; baitu Esiteri akakora ekiraragiro kya Morodekai, nkobuyamulezere, 21Omu biro ebi, Morodekai obuyaikara’ga omu irembo lyomukama, abakonwa babiri abomukama, Bigusani na Teresi, hali abo abalindaga irembo babihirwa, base’ra okuzinda omukama Ahasuero. 22Ekigambo kyamanywa Morodekai, yakyoleka Esiteri omugo; Esiteri yakitebeza omukama, kandi nibara lya Morodekai. 23Kandi obubakagulirize ekigambo kandi kyazoka kiti, abo bombi bakahanikwa ha miti, kyahandikwa omu kitabu ekyebyomubusinge omu maiso gomukama.