Swahili Bible2

9

1HU’RA iwe Isareri: nogenda okwambuka Yorudani hati, okutahamu nokulya amahanga agakukira obukuru namani, 2embuga enkoto kandi eziroho muhuruzi okuhika haiguru, abantu abahango kandi abaraihire, abana ba Anakimu abomanyire, kandi abawahulireho ngu Noha asobora okweme’ra omu maiso gabana ba Anaki? 3Nukwo omanye hati oti MUKAMA Ruhanga wawe nuwe arukwambuka omu maiso gawe, ali nkomu’ro ogurukwokya; nuwe alibahwerekereza, kandi nuwe alibabundanza omu maiso gawe: nukwo olibabingamu oti nobahwerekereza bwango nka MUKAMA okuyangambire. 4Otagamba omu mutima gwawe, MUKAMA Ruhanga wawe obwalikamara okubacumiriza omu maiso gawe, oti Habwokuhiki’ra kwange MUKAMA akantahyamu okulya ensi enu: baitu habwobubi obwamahanga ago nikyo MUKAMA ababingira aheru omu maiso gawe. 5Tihali habwokuhiki’ra kwawe, nobuhokuba habwokugo’roka okwomutima gwawe, notahamu okulya ensi yabu: baitu habwobubi obwamahanga ago, nikyo MUKAMA Ruhanga wawe ababingira omu maiso gawe, agumye ekigambo MUKAMA ekiyagambire baswenkuru, Iburahimu, Isaka, na Yakobo. 6Nukwo omanye ngu MUKAMA Ruhanga wawe takuhaire ensi egi enungi ogirye habwokuhiki’ra kwawe; baitu muli bantu abengoto egumire. 7Ijuka, otebwa, okuwayeremere okubihiza MUKAMA Ruhanga wawe omu irungu: okuruga ha kiro ekiwarugiremu omu nsi ya Misiri, okuhikya obumwatahire omu kiikaro kinu, mukaba nimweremera MUKAMA. 8Nomu Holebu mukeremere MUKAMA okubihiza, MUKAMA yababihi’rwa nayenda okubahwerekereza. 9Obunamazire okutemba omu rusozi okuhabwa ebibali byamabale, ebibali byekiragano MUKAMA ekyaragaine nainywe, nubwo naikaire omu rusozi ebiro amakumi ana nyamusana nekiro; ntalye ebyokulya nubukwakuba okunywa amaizi. 10Kandi MUKAMA yankwasa ebibali byamabale bibiri, ebyahandikirwe norukumu rwa Ruhanga; kandi halibyo hakaba hahandikirweho nkebigambo byona okubiri MUKAMA ebiyabalize nainywe omu rusozi, okuruga hagati yomu’ro ha kiro kyokuso’rokana. 11Kandi kyahika ebiro amakumi ana nyamusana nekiro obubyahoireho MUKAMA yampa ebibali byamabale bibiri, ebibali byekiragiro. 12MUKAMA yangambira ati Imuka, ruga hanu osirimuke bwango: baitu abantu bawe abawaihireyo omu Misiri besisire bonka; bahabire bwango omu muhanda ogunabaragire; bekolire ekisisani ekyagere. 13Kandi MUKAMA yangambira ati Mboine abantu banu, kandi dora, bantu abengoto egumire; 14obaleke mbahwerekereze, ndagaze ibara lyabu hansi yiguru: kandi ndikufora iwe ihanga eriribakira amani nobukuru. 15Nukwo nahinduka, nasirimuka orusozi, kandi orusozi rwayaka nomu’ro: nebibali bibiri ebyekiragano bikaba biri omu ngaro zanye ibiri. 16Narora kandi dora, inywe mukaba musisire MUKAMA Ruhanga wanyu: mwayeko’ra enimi eyagere: mukaba muhabire bwango omu muhanda MUKAMA oguyabaragire. 17Nakwata ebibali bibiri, nabinaga omu ngaro zange ibiri, nabyatira omu maiso ganyu. 18Nagwa hansi omu maiso ga MUKAMA, nkokubanza, ebiro amakumi ana enyamusana nekiro; ntalye byokulya nobukwakuba okunywa amaizi; habwekibi kyanyu kyona ekimwakozire, nimukora ekibi omu maiso ga MUKAMA, okwerema okumubihiza. 19Baitu nkatina ekiniga nokubihirwa okurukwokya, nka MUKAMA okuyabihirwe inywe okubahwerekereza. Baitu MUKAMA akampu’ra nomu kasumi ako. 20Kandi MUKAMA akabihi’rwa muno Aroni nayenda okumuherekereza: nyowe nasabira na Aroni omu kasumi ako. 21Kandi natwara ekibi kyanyu, enimu eyimwakozire nagyokya nomu’ro, nagisamba nagisasangura muno muno okuhikya obuyacucukire nkecucu: nanaga ecucu yayo omu kambu akarugire omu rosozi. 22Nomu Tabera, nomu Masa, nomu Kiberosi-hatava, mukemera MUKAMA okumubihiza. 23Kandi MUKAMA obuyabatumire okuruga Kadesi-baranea, nagamba ati Mutembe mulye ensi eyimbahaire; nubwo mwayemire ekiragiro kya MUKAMA Ruhanga wanyu, kunu mutamuikirize nobukwakuba okuhu’ra irakalye. 24Mukaba nimwemera MUKAMA okuruga ha kior ekinabamanyiremu.

25Nubwo nagwa hansi omu maiso ga MUKAMA ebiro ebi amakumi ana nyamusana nekiro obunagwire hansi; baitu MUKAMA akaba agambire ati alibahwerekereza. 26Nasaba MUKAMA nagamba nti Ai Mukama RUHANGA otahwerekereza abantu bawe, nobugwetwa bwawe obuwacunguire habwobukuru bwawe abawaihireyo omu Misiri nengaro zamani. 27Ijuka abairu bawe, Iburahimu, na Isaka na Yakobo; leka okurora ha kugumangana ha bubi bwabu, nobuhokuba ha kibi kyabu; 28rundi ensi eyiwatuihiremu ereke okugamba eti Baitu MUKAMA atasobole okubatahya omu nsi eyiyabaraganize, kandi baitu obwokubanoba, nikyo yabaihireyo abaitire omu irungu. 29Baitu bali bantu bawe nobugwetwa bwawe abawaihireyo habwobusobozi bwawe obwingi, nomukono gwawe ogwagoroirwe.