Swahili Bible2

7

1MUKAMA Ruhanga wawe obwalikutahya omu nsi nambere ogenda okugirya, kandi obwalibingamu amahanga maingi omu maiso gawe, Omuhiti, Nomugirigasi, Nomwamoli, Nomukanani, Nomuperezi, Nomuhivi, Nomuyebusi, amahanga musanju agarukukira iwe obwingi namani; 2kandi MUKAMA Ruhanga wawe obwalibahayo omu maiso gawe, kandi olibatema; nubwo olibahwerekereze kimu; otaliragana nabo ekiragano, kunu otalibaganyira: 3kunu otalibaganyira otaliswerana nabo; otalisweza omuhara wawe mutabaniwe, kunu omuharawe otalimuswere’ra mutabani wawe. 4Baitu alihindura mutabani wawe aleke okunkuratira, bako’re abacwezi: nukwo ekiniga kya MUKAMA kiryaka namberemuli, kandi alikuhwerekereza bwango. 5Baitu mulibakora muti; mulisesa ebyoto byabu, kandi mulicwacwana amabale gabu agaraihire, mulitema Aserimu, zabu, kandi mulyokya nomu’ro ebisisani byabu ebisaruirwe. 6Baitu muli ihanga erirukwera hali MUKAMA Ruhanga wawe: MUKAMA Ruhanga wawe akabakomamu okuba ihanga eryobweremera wenka okukira amahanga gona agali ha maiso gensi. 7MUKAMA atabateho okugonzakwe nabakomamu habwokuba baingi okukira amahanga gona; baitu mukaba muli bake okukira amahanga gona: 8Baitu habwa MUKAMA okubagonza, kandi akagonza okulinda ekirahiro ekiyarahirire bainsenkuru inywe, nikyo MUKAMA yabaihireyo nengaro zamani, yabacungura omu nju yobuiru, omu mukono gwa Faraho omukama wa Misiri. 9Nukwo mumanye ngu MUKAMA Ruhanga wokwesiga arukwerinda ekiragiro nokuganyira hamu nabo abarukumugonza nibakwata ebiragirobye okuhikya obuijukuru rukumi; 10kandi nasasura abo abamunoba omu maiso gabu okubahwerekereza: taliba nobugara hali ogu anyakumonoba, alimusasura omu maiso. 11Nikyo olikwatira ekiragiro, nebyatairweho, nebyobulyo ebindukuragira hati, obikolege.

12Kandi kirihika, baitu muhulire ebyobulyo ebi, kandi nimubikwata nimubikora, MUKAMA Ruhanga wawe alirinda namberiwoli ekiragano nokuganyira ebiyarahirire baswenkuru: 13kandi alikugonza, alikuha omugisa, alikukanyisa: kandi aliha omugisa ebyana ebyomubiri gwawe, nebyana biitaka lyawe, engano yawe, namarwa gawe, namagita gawe, nensagi yente zawe, nebyana ebyamagana gawe, omu nsi eyiyarahirire baswenkuru okugikuha. 14Olitunga omugisa okukira amahanga gona; tihaliba omulinywe omusaija nobwakuba omukazi engumba, nobuhokuba omu bisoro byanyu. 15Kandi MUKAMA alikuihaho endwara zona; talikutaho endwara embi eza Misiri nemu ezomanyire, baitu alizita hali abo abakunoba. 16Kandi olimaraho amahanga gona MUKAMA Ruhanga wawe agalihayo namberoli: eriso lyawe tikiribaganyira: kunu otaliko’ra bacwezi babu; baitu balifoka nkekisuli mamberoli. 17Obwoliba nogamba omu mutima gwawe oti Amahanga ganu nigakira nyowe; ndasobora nta okubabinga? otalibatina: 18oliijuka muno MUKAMA Ruhanga wawe ekiyakozire Faraho na Misiri yona; 19emihito emikuru amaiso gawe eyigaboine, nobwokuro’raho, nebyamahano, nengaro zamani, nokukono ogwagoroirwe, nka MUKAMA Ruhanga wawe okuyakuihireyo: nukwo MUKAMA Ruhanga wawe alikora ati amahanga gona agotina. 20Kandi MUKAMA Ruhanga wawe alituma enwa omulibo, okuhikya abo abalisigaraho nibesereka obubalihwereke’ra omu maiso gawe. 21Otalibatina: baitu MUKAMA Ruhanga wawe ali hagati yawe, Ruhanga omukuru kandi wokutinwa. 22Kandi MUKAMA Ruhanga wawe alibingamu amahanga ago omu maiso gawe mpora mpora: otalibahwerekereza ahonaho, rundi enyamaiswa zomu kisaka zireke okukanya namberemuli. 23Baitu MUKAMA Ruhanga wawe alibahayo omu maiso gawe, kandi alibatuntuza nokutuntura kwingi, okuhikya obubalihwereke’ra. 24Kandi alihayo abakama babu omu mukono gwawe, kandi olihwerekereza ibara lyabu hansi yiguru: busaho muntu alisobora okweme’ra omu maiso gawe okuhikya obwolibahwerekereza. 25Ebisaisani ebisaruirwe ebyabacwezi babu mulibyokya nomu’ro otalyegomba efeza nezabu ezebiroho, nobukwakuba okuzetwa’ra wenka, rundi oleke okukwatwa nkekisuli: baitu kiba kinugwa hali MUKAMA Ruhanga wawe: 26kandi otalireta ekinugwa omu kuhwerekerezebwa nkeki: olikinugira kimu, kandi olikinobera kimu; baitu nikyo kintu ekyokuherekerezebwa.