Swahili Bible2

5

1KANDI Musa aketa Isareri yona, yabagambira ati Muhu’re inywe Isareri, ebigambo ebyatairweho nebyobulyo ebindukugamba omu matu ganyu ha kiro kya hati, mubyege, mwerindege okubikora. 2MUKAMA Ruhanga waitu akaragana naitwe ekiragano omu Holebu. 3MUKAMA ataragane ekiragano eki na baisenkuru itwe, baitu naitwe, itwe abali hanu tuli bomezi ha kiro kya hati.

4MUKAMA akabaza nainywe amaiso namaiso omu rusozi hagati yomu’ro, (nyowe nkeme’ra hagati ya MUKAMA: baitu inywe mukatina omu’ro, 5mutatembe omu rusozi;) yagamba ati.

6Ninyowe MUKAMA Ruhanga wawe, ayakuihire omu nsi ya Misiri, omu nju yobuiru.

7Otaliikara nabaruhanga abandi nyowe ndoho.

8Otalyeko’ra ekisisani ekisaruirwe, ekisisani kyekintu kyona ekiri haiguru omu iguru, nobukyakuba ekiri omu nsi ha itaka, nobukyakuba ekiri omu maizi hansi yaitaka: 9otalibiinamira wenka, nobukwakuba okubiko’ra: baitu nyowe MUKAMA Ruhanga wawe ndi Ruhanga wihali, ninjunaniza abana ekibi kyabaisebo, nokuhikya obuijukuru obwakasatu nobwakana obwabo abarukunoba; 10kandi ninyoleka embabazi hali abantu enkumi abarukugonza nibakweta ebiragiro byange.

11Otalirahi’ra busa ibara lya MUKAMA Ruhanga wawe: baitu MUKAMA alimutaho omusango anyakurahi’ra busa ibaralye. 12Olindege ekiro kya Sabiti okukyeza, nka MUKAMA Ruhanga wawe okuyaragire. 13Ebiro mukaga okolege nomara emirimo yawe yona; 14baitu ekiro kya musanju niyo sabiti hali MUKAMA Ruhanga wawe: otalikora’ho mulimo gwona, nobwakuba iwe, nobwakuba mutabani wawe, nobwakuba omuhara wawe, nobwakuba omuiru wawe, nobwakuba omuzana wawe, nobwekuba enimi yawe, nobwekuba enkaina yawe, nobukyakuba ekisoro kyawe kyona, nobwakuba omunyaihanga ali omunda yamalembo gawe; omuiru wawe nomuzana wawe bahumule nka iwe wenka. 15Kandi oraijukaga okwokaba oli omuiru omu nsi ya Misiri, kandi MUKAMA Ruhanga wawe akakuihayo nengaro zamani nomukono ogwagoroirwe: nikyo MUKAMA okulindaga ekiro kya sabiti.

16So na nyoko obatinege, nka MUKAMA Ruhanga wawe okuyakuragire: ebiro byawe bibe bingi, kandi gube mugisa namberoli omu nsi MUKAMA Ruhanga wawe eyakuha. 17Otaliita. 18Kunu otalisihana. 19Kunu otaliiba. 20Kunu otalihangi’ra mutabani wawe.

21Kunu otalyegomba mukazi wa mutahi wawe; kunu otalyegomba enju ya mutahi wawe, omusirigwe nobwakuba omuzanawe, enimiye, nobwekuba enkainawe, nobukyakuba ekintu kyona ekya mutahi wawe.

22Ebigambo ebi MUKAMA akabigambira bona abokuso’rokana omu rusozi hagati yomu’ro, yekicu, kandi yomuirima kasira, niraka erihango, atongereho ebindi. Yabihandika ha bibali byamabale bibiri, yabimpa nyowe. 23Kandi kyahika, obumwahulire iraka niriruga hagati yomuirima, orusozi oburwayokeze nomu’ro, mwai’ra haihi namberendi, emitwe yona eyenganda zanyu, nabakuru banyu; 24mwagamba ngu Dora, MUKAMA Ruhanga waitu atwolekere ekitinisakye nobukurubwe, tuhulire irakalye niriruga hagati yomu’ro: tuboine ha kiro kinu ngu Ruhanga abaza nomuntu, kandi mwomezi. 25Nukwo hati bunu tukuferire ki? baitu omu’ro gunu omwingi guratwokya: obuturayeyongera okuhu’ra iraka erya MUKAMA Ruhanga waitu, nubwo turafa. 26Baitu alinkaha ha bona abanyina ombiri arahulire iraka erya Ruhanga omwomezi nirigamba okuruga hagati yomu’ro, nkaitwe okutuhulire, kandi yaba mwomezi? 27I’ra haihi iwe, ohu’re byona MUKAMA Ruhanga waitu ebyaragamba: ogambire itwe byona MUKAMA Ruhanga waitu ebyaragamba: ogambire itwe byona MUKAMA Ruhanga waitu ebyaragambira iwe; itwe turakihu’ra, turakikora. 28MUKAMA yahu’ra iraka eryebigambo byanyu obumwagambire nyowe; MUKAMA yangambira ati Mpulire iraka eryebigambo byabantu banu, ebibakugambire: bagambire kurungi byona ebibabalize. 29Kuba banyina omutima guti omulibo okuntinaga, nokukwataga obutosa ebiragiro byange bona, 30Genda obagambire oti Mugarukeyo omu hema zanyu. 31Baitu iwe, yeme’ra hanu namberendi, kandi ndakugambira ekiragiro kyona nebitairweho, nebyobulyo, ebyorabegesaga babikolege omu nsi eyimbaha okugirya. 32Nukwo murayerindaga okukora nka MUKAMA Ruhanga wanyu okwabaragire: mutalihunguka ha mukono ogwobulyo nobuhokuba ha gwemoso. 33Muragenderaga omu muhanda gwona MUKAMA Ruhanga wanyu ogwabaragire, mubege abomezi, gubege omugisa nambere muli, kandi mukanyise ebiro byanu omu nsi eyimulirya.