Swahili Bible2

32

1Mutege amatu, inywe iguru, nanyowe ndagamba;

Nensi ehu’re ebigambo byakanwa kange: 2Okwegesa kwange kuragwa nkenjura.

Okugamba kwange kuraija nkorumu;

Nkobutonyatonya ha bunyansi obubisi,

Nkoruhuhi’ro ha kisaka:

3Baitu ndaduma ibara lya MUKAMA:

Muteho obukuru hali Ruhanga waitu.

4Mwandara, omulimogwe guhikire;

Baitu emihandaye yona yobulyo:

Ruhanga wokwesiga hataroho kutahiki’ra,

Nuwe ahikirire, kandi wobulyo.

5Basisire muno mamberendi, tibali banabe, niko kamogo kabu;

Buijukuru obweremere kandi oburamaire.

6Nukwo mugaru’ra muti MUKAMA;

Inywe abantu abadomadoma abatanyina magezi?

Tinuwe ‘so ayakuguzire?

Nuwe yakukozire, kandi yakugumya.

7Ijuka ebiro ebyaira, tekereza emyaka eyobuijukuru bwingi:

Kaguza ‘so, kandi alikwoleka;

Abakuru bawe, kandi balikutebeza.

8Anyakuli haiguru mono obuyagabire amahanga obugwetwa bwabu,

Obuyabaganize abana babantu,

Yacwwera amahanga emitano, Nkomuhendo ogwabana ba Isareri okuguli.

9Baitu omugabo gwa MUKAMA nibo bantube;

Yakobo nugwo mugabo ogwobugwetwabwe.

10Akamusanga omu nsi eri kwonka,

Kandi omu irungu eryebitongo enyamaiswa hazigambira;

Yamwehinguliriza, yamutaho omutima,

Yamulinda nkemboni eyerisolye:

11Nkisamba okulyekambisa ekiju kyalyo,

Eripapi’ra obwana bwalyo,

Yayanjara amapapa, yabatwara,

Yabahimbira ha mapapage:

12MUKAMA wenka nuwe yamwebemberaga,

Hatabeho omuluwe omucwezi omunyaihanga. 13Yamutembya ebiikaro byensi ebiraihire,

Yalya ha nsagi zomusiri;

Akamonkya obwoki omu ibale

Namagita omu mwandara ogugumire muno;

14Amagita gente, namata gembuzi

Nebisajwa ebyebyana byentama,

Nentama empaya nkeziga’rwa Basani, nemburabuzi,

Nengano enungi nkebisajwa byensigo;

Kandi ha sagama yomuzabibu okanyweraho amarwa.

15Baitu Yeseruni akanyeta yasamba:

Onyesere, ogomokere, ohehire:

Nubwo yafuruka Ruhanga ayamukozire,

Yagaya Omwandara ogwokujunakwe.

16Bakamukwasa ihali nabacwezi abanyaihanga,

Bayerema okumubihiza nebinugwa.

17Bakahayo ebyonzira hali basetani, abatali Ruhanga na kake,

Hali abacwezi ababataramanyire,

Hali abacwezi abahakya abaimukire hanyuma,

Baisenkuru inywe ababataratinire.

18Toijukire Omwandara ayakuzaire,

Kandi oyeberwe Ruhanga ayakuzaire. 19MUKAMA yakirora, yabanoba, Habwokwerema okwabatabanibe nabaharabe. 20Yagamba ati Ndibasereka amaiso gange,

Ndirora empero yabu okweriba:

Baitu bali buijukuru obweremere mono,

Abana abatanyina kuikiriza.

21Bakamkwasa ihali habweki ekitali Ruhanga;

Bakerema okumbihiza nebitarumu byabu:

Nanyowe ndibakwasa ihali habwabo abatali ihanga;

Ndibabihiza nihanga eryobudomadoma.

22Baitu omu’ro nugwakira omu kiniga kyange,

Nugwokya okuhikya okuzimu mali,

Nugulya ensi hamu nensagi zayo,

Nugwokya emiganda eyensozi.

23Ndituma omutumo gwobubi;

Ndimaraho engobe zange nimbarasa:

24Balikeha habwenjara, balimirwa ekibabu ekirukwokya

Nokuhwereke’ra okurukusa’ra; Namaino genyamaiswa ndigabatumira,

Nobusegwe obwebintu ebinyakweku’ra omu cucu.

25Aheru busitama eriita, Kandi omu bisika okutina, Erihwerekereza omusigazi nomuisiki,

Omwana arukwonka hamu nomugurusi emezere enju,

26Nkagamba nti Ndibararangya hara,

Ndimaraho okuijukwa kwabu omu bantu;

27Kyonka nkatina okwerema okwomunyanzigwa,

Abanyanzigwa babu baleke okutekereza kubi,

Baleke okugamba ngu Omukono gwaitu gunyumizibwe,

Tali MUKAMA akozire binu byona.

28Baitu bali ihanga eritamanyire okuhanura,

Nomulibo tiharumu okwetegereza.

29Kakuba babaire bamagezi, okwetegereza eki,

Okucumitiriza empero yabu eya hampero!

30Omuntu omu yakusoboire ata okubinga rukumi,

Na babiri okusingura kakumi,

Kakuba Omwandara gwabu atarabanagire

Na MUKAMA atarabahaireyo?

31Baitu omwandara gwabu tiguli Nkomwanda gwatu,

Nabanyanzigwa baitu nobubacwa omusango bonka.

32Baitu omuzibibu gwabu gwa ha muzabibu gwa Sodomu,

Na ha misiri ya Gomora:

Emizabibu yabu mizabibu yendurwe,

Emigamba yabu nesa’ra”

33Amarwa gabu nubwo busegwe bwebijoka,

Kandi obusegwe bwencwera obulya.

34Kinu tikyahuirwe namberendi,

Kiboherwe omu bikwato byange?

35Okuhora enzigu kwange, nokusasura,

Omu kasumi ekigere kyabu obukirite’ra:

Baitu ekiro kyomuhito gwabu kimalize okuhika,

Nebigambo ebigenda okubahikaho biryanguha.

36Baitu MUKAMA alicwera abantube omusango,

Alyeyijukya habwabairube;

Obwalirora amani gabu gahoireho,

Kunu busaho asigaireho, nobwakuba aboherwe nobwakuba alekerwe.

37Kandi aligamba ati Abacwezi babu balinkaha,

Omwandara ogubayesigire;

38Abalyaga ebisajwa ebyebyonzira byabu,

Nibanywa amarwa gekihongwa kyabu ekyokunywa?

Baimuke babakonyere,

39Murole nu Nyowe nyenka ninyowogu,

Kunu busaho Ruhanga, rundi nyowe nyenka:

Nyowe nyita, kandi nyomeza;

Nkakuhutaza, kandi nintamba:

Kunu busaho osobora okujuna omu mukono gwange.

40Baitu nyimukya omukono gwange haiguru,

Ningamba nti Nkokundi omwomezi ebiro byona,

41Obundiba nintekera busitama yange erukwangasana,

Nomukono gwange nugukwata ha musango;

Ndihora enzigu abanyanzigwa bange,

Kandi ndisasura abo abarukunoba.

42Nditamiza engobe zange esagama,

Na busitama yange erirya enyama;

Nesagama yabaisirwe neyabanyagwa,

Okuruga ha mutwe gwabakuru babanyanzigwa.

43Musemererwe, inywe amahanga, nabantube:

Baitu alihora enzigu habwesagama yabairube,

Kandi alisasura ebyenzigu hali omunyanzigwawe,

Alirihi’ra ensiye, habwabantube.

44Musa yaija yagamba ebigambo byona ebyekizina kinu omu matu gabantu, uwe na Hoseha mutabaniwa Nuni. 45Musa yamara okugambira Isareri yona ebigambo ebi byona: 46yabagambira ati Muteho emitima yanyu ha bigambo byona ebindukubamanyisa hati; nibyo muraragiraga abana banyu, bakwatege bakolege ebigambo byona ebindukubamanyisa hati; nibyo muraragiraga abana banyu, bakwatege bakolege ebigambo byona ebyebiragiro binu. 47Baitu tikiri kigambo ekitarumu namberemuli, baitu nubwo bwomezi bwanyu, kandi habwekigambo eki mulikanyisa ebiro byanyu omu nsi, nambere murukwambuka Yorudani okugirya.

48MUKAMA yagambira Musa ha kiro eki kyonyini nagamba ati 49Temba orusozi Nebo, oruli omu nsi ya Moabu erolerire Yeriko; olebe ensi ya Kanani, eyimpa abana ba Isareri okuba obutaka: 50ofere omu rusozi orworatemba, osorozebwe hali abantu bowanyu; nka Aroni mugenzi wawe okuyaferire omu rusozi Horu, yasorozebwa hali abantu bowabu: 51baitu mukansisira hagati yabana ba Isareri ha maizi ga Meriba Kadesi, omu irungu lya Zini; baitu mutanyeze hagati yabana ba Isareri. 52Baitu olirora ensi omu maiso gawe; baitu otalitahayo omu nsi eyimpa abana ba Isareri.