Swahili Bible2

26

1KANDI kirihika, obwolitaha omu nsi MUKAMA Ruhanga wawe eyakuha okuba obugwetwa, kandi oligirya noikara omu; 2oliiha ha byana byona ebiitaka lyawe ebirukubanza okwenga, ebyolihunika nibiruga ha nsi yawe MUKAMA Ruhanga wawe eyakuha; kandi olibita omu kigega, kandi oligenda ha kiikaro MUKAMA Ruhanga wawe ekyalyegomboza okuikazayo ibaralye. 3Kandi oliija hali nyakatagara alibaho omu biro biri, olimugambira oti Nyikirize ha kiro kinu hali MUKAMA Ruhanga wawe nti mpikire omu nsi MUKAMA eyiyarahirire baisenkuru itwe okugituha. 4Kandi nyakatagara aliiha ekigega omu mukono gwawe, alikita hansi omu maiso gekyoto kya MUKAMA Ruhanga wawe. 5Naiwe oligarukamu nogamba omu maiso ga MUKAMA Ruhanga wawe oti Isenyowe akabali Omwaramu amalize okuhwereke’ra, yasirimuka Misiri, yagonyayo, abantu bake omuhendo gwabu; yafokerayo ihanga, erikuru, eryamani, kandi eryabantu baingi: 6kandi Abamisiri bakatukora kubi, batubonabonesa, batuletaho obuiru obwobuje: 7twakunga MUKAMA, Ruhanga wa baisenkuru itwe, MUKAMA yahu’ra iraka lyaitu, yarora omuhito gwaitu nokutabana kwaitu, nokwerenge’rwa kwaitu: 8kandi MUKAMA yatuihayo omu Misiri nengaro zamani, nomukono ogwagoroirwe, nokutinisa kwingi muno, nobwokuro’raho, nebyamahano: 9kandi yatuleka omu kiikaro kinu, atuha ensi enu, ensi erukegera amata nobwoki. 10Kandi hati bunu, dora, ndesere omuganuro ogwitaka, iwe MUKAMA ogwompaire. Kandi oliguta hansi omu maiso ga MUKAMA Ruhanga wawe, noramya omu maiso ga MUKAMA Ruhanga wawe: 11kandi olisemererwa omugisa gwona MUKAMA Ruhanga wawe ogwakuhaire, iwe nenju yawe, iwe Nomulevi, nomunyaihanga ali hagati yawe.

12Obwolikamara okuihamu ekicweka kya ikumi kyona ekyensagi zawe omu mwaka gwakasatu, baitu nugwo mwaka gwokuihamu ebicweka bya ikumi, nubwo olikiha Omulevi, omunyaihanga, enfuzi nomufakati, balire omunda yamalembo gawe baigute; 13kandi oligamba omu maiso ga MUKAMA Ruhanga wawe oti Nyihire omu nju yange ebintu ebisoroirwemu, kandi mbihaire Omulevi, nomunyaihanga, nenfuzi, nomufakati, nkekiragiro kyawe kyona okukiri ekiwandagire: tinsisire ebiragiro byawe ne kimu, kunu timbyeberwe: 14ntabiryeho omu kuganya kwange, kunu ntabyehuleho nkebitasemire, nobukwakuba okubihayo habwabafu: nkahu’ra iraka erya MUKAMA Ruhanga wange, nakora byona nkokuwandagire. 15Rora hansi noyema hawawe harukwera omu iguru, obahe omugisa abantu bawe Isarei, nitaka eriwatuhaire, nkokuwarahirire baisenkuru itwe, ensi erukugera amata nobwoki.

16Hati MUKAMA Ruhanga wawe akuragire okukora binu ebitairweho nebyobulyo binu: nikyo orabikwatiraga nobikora nomutima gwawe gwona, nobwomezi bwawe bwona. 17Oikirize hati MUKAMA nuwe Ruhanga wawe, kandi oti kikuhikirire okugenderaga omu mihandaye, nokukwataga omu mihandaye, nokukwataga ebi ebiyataireho nebiragirobye nebyobulyobye, kandi nokuhu’raga irakalye: 18kandi MUKAMA aikirize hati muli ihanga eryobweremera wenka, nkokuyakuraganize, naiwe oyerindege ebiragirobye byona: 19nokukunyumiza haiguru okukira amahanga gona agayahangire, habwokukugizibwa, kandi habwibara, kandi habwekitinisa; kandi obege ihanga erirukwera hali MUKAMA Ruhanga wawe, nkokuyagambire.