Swahili Bible2

25

1OBUHALIBAHO empaka omu bantu, nibaija okutongana, abacwi bemisango nibacwera; nubwo baliihaho omusango hanyakuhikirire, nibacwera omubi; 2kandi kiriba kti, omuntu omubi obwaliba ahikirire okuterwa, omucwi wemisango aliragira bamute hansi, atererwe omu maisoge, nibabara emiigo nkobubibwe okubuli. 3Alisobora okumutera amakumu ana, baitu talihinguraho: rundi ebwaliba nahinguraho, namutera emiigo okukira egi, mwene wanyu aleke okunugwa namberoli. 4Otaliboha akanwa kente obwehura engano. 5Abaisemu obubaikara hamu, kandi omu halibo afa, atanyina omwana, muka ogu afire ataliswerwa omusaija wa handi: mugenzi waiba aligenda namberali namuswera, namukora eki ekihikirire mugenzi waiba. 6Kandi kiriba kiti, omuzigaijo owolizara aligwetwa omu ibara lyomugenzi ogu ayafire, ibaralye litaragazibwa omu Isareri. 7Kandi omuntu ogu obwataligonza okuswera muka mugenziwe, nubwo muka mugenziwe aligenda omu irembo hali abakuru nagamba ati Mugenzi wa iba nyowe ayangire okuimukiza mugenziwe ibara omu Isareri, ayagire okunkora eki ekihikirire mugenzi wa iba nyowe. 8Nubwo abakuru aborubuga rwowabu balimweta, balibaza nauwe: kandi obwalyeme’ra nagamba ati Tindukwenda okumuswera; 9nubwo muka mugenziwe aliija namberali omu maiso gabakuru, aliihamu enkaitoye omu kigerekye, kandi alimucwera amacwanta omu maisoge; kandi aligarukamu nagamba ati Nukwo kirikorwa kiti omusaija atarukwombeka enju ya mugenziwe. 10Kandi ibaralye lirayetwaga omu Isareri ngu Enju yogu aihirwe enkaitoye.

11Rundi abasaija obubaliba nibarwanisangana hamu bonka na bonka, kandi omukazi womu nai’ra haihi okujuna iba omu mukono gwogu arukumutema, nago’ra omukonogwe namukwata ebyensita: 12nubwo olisaraho omukonogwe, eriso lyawe litaliganyira. 13Otaliba nebintu ebipimisa omu nsahu yawe ebitali bimu, ekikoto kandi nekike. 14Otaliba nebirengo omu nju yawe ebitali bimu, ekikoto kandi nekike. 15Ekipimisa ekihikirire kandi ekyobulyo nikyo orabaga nakyo, ebiro byawe bibe bingi omu nsi MUKAMA Ruhanga wawe eyakuha. 16Baitu bona abarukukora ebigambo nkebi, bona abarukukora ebyokutahiki’ra, bali nkebinugwa hali MUKAMA Ruhanga wawe. 17Ijuka Amaleki ekiyakukozire omu muhanda obumwarugireyo omu Misiri; 18okuyakusangire omu muhanda, yatema abawe abenyuma, bona abakaba bali abaceke hanyuma yawe, obwokaba oruhire kandi ojwahire; atatine Ruhanga. 19Nikyo kirihikira, MUKAMA Ruhanga wawe obwalikuha okuhumura abanyanzigwa bawe bona ha mbaju zona, omu nsi MUKAMA Ruhanga wawe eyakuha okuba obugwetwa okugirya, oliragaza okuijukwa kwa Amaleki ha nsi yiguru; otalyebwa.