Swahili Bible2

24

1OMUSAIJA obwaliba naswera omukazi, nubwo kiriba kiti, obwatalibona embabazi omu maisoge, baitu asangire ekigambo ekitasemire omuluwe, alimuhandikira ebaruha eyokumubinga, aligita omu mukonogwe, alimubinga omu njuye. 2Kandi obwalikamara okuruga omu njuye alisobora okugenda nokuswerwa omusaija ondi. 3Kandi iba owakabiri obwalimunoba namuhandikira ebaruha eyokumubinga, nagimukwasa omu ngaroze, namubinga omu njuye; rundi iba owakabiri obwalifa ayamuswire; 4iba owokubanza ayamubingire atalimutwara obwakabiri okuba mukaziwe, amazire okusisikara; baitu eki nikinugwa hali MUKAMA: kandi otalisisisa ensi MUKAMA Ruhanga wawe eyakuha okuba obugwetwa. 5Omusaija obwaliba naswera omukazi omuhyaka, ataliramaga nihe, kunu batalimujwahya nomulimo gwona; aliikara omuka omwaka gumu, nasemeza mukaziwe owaswire. 6Omuntu wena atalikwatira ebihinga orubengo, nobwekuba ensiso: baitu buli akwasire obwomezi bwomuntu. 7Omuntu obwalisangwa naiba ha bene babu abomu bana ba Isareri, namukora nkokwakora muiru rubale, rundi namugura; omusuma ogu alifa: nukwo oliihaho oti ekibi hagati yawe.

8Werinde omu rufu rwebigenge, oyekambege okukwata nokukora byona banyakatagara Abalevi ebibarabegesaga: nkokunabaragire, nukwo murakwataga muti okubikora. 9Ijuka MUKAMA Ruhanga wawe ekiyakozire Miryamu, omu muhanda obumwarugireyo Misiri.

10Obworayohoraga omutahi wawe ekintu kyona kyona, otalitaha omu njuye okutaba’ra omukwatirizogwe. 11Orayeme’raga aheru, kandi omuntu owoyohora nuwe arakurukyaga omukwatirizo aheru namberiwoli. 12Kandi obwaba ali omunaku, omukwatirizogwe gutalirara naiwe: 13mananukwo olimuga’ra omukwatirizo izoba obuligwa, nukwo arale nekyokujwarakye, akusabire omugisa: kandi eki kiriba nkokuhiki’ra namberoli omu maiso ga MUKAMA Ruhanga wawe. 14Otalyerenge’ra omuiru akolereza empera anyakuli omunaku kandi owamasege, nobwaliba ali womu banyaihanga abali omu nsi yawe omunda yamalembo gawe: 15ha kirokye olimuha emperaye, kandi izoba litaligwa emperaye ikaire; baitu munaku, kandi agitaireho omutimagwe: rundi aleke okukunga MUKAMA habwawe, kandi eki okufoka ekibi haliwe. 16Baisebo bataliitwa habwabana, kunu abana bataliitwa habwabaisebo: omuntu wena aliitwa habwekibikye wenka. 17Otalicwere’ra omusango gwomunyaihanga nobugwakuba ogwenfuzi; nobukwakuba okukwatira ebihinga ebyokujwara ebyomufakati: 18baitu oraijukaga okwokaboli omuiru rubale omu Misiri, kandi MUKAMA Ruhanga wawe yakucungurayo: nikyo nkuragire okukora ekigambo eki. 19Obwoliba nogesa amagesa gawe omu musiri gwawe, kandi oyeberwe ekiba omu musiri, otaligarukayo okukitaba’ra: kiriba kyomunyaihanga, rundi kyenfuzi, rundi kyomufakati: nukwo MUKAMA Ruhanga wawe akuhege omugisa omu mulimo gwona ogwengaro zawe.

20Obwoliba notera omuti gwawe ogwomuzeituni, otaligaruka okutera amatagi obwakabiri: kiriba habwomunyaihanga, habwenfuzi kandi habwomufakati. 21Obwoliba nonoga ebyomu rugonjo rwawe orwemizabibu, otaligaruka okukoma hanyuma: kiriba habwomunyaihanga, habwenfuzi, kandi habwomufakati. 22Kandi oraijukaga okwokaboli omuiru rubale omu nsi ya Misiri: nikyo nkuragire okukora ekigambo eki.