Swahili Bible2

19

1MUKAMA Ruhanga wawe obwalimaraho amahanga, ensi yabu MUKAMA Ruhanga wawe eyalikuha, kandi iwe olibagwetwa, noikara omu mbuga zabu, nomu nju zabu; 2olyebaganira embuga isatu omu nsi yawe hagati, MUKAMA Ruhanga wawe eyakuha okugirya. 3Olyetekaniriza omuhanda, kandi olisaramu emitano yensi yawe, MUKAMA Ruhanga wawe eyakugweta, omu bicweka bisatu, omuisi wena airukireyo. 4Kandi kinu nikyo kigambo ekyomuisi womuntu aliirukirayo okuba omwomezi: omuntu wena aliita mutahiwe atagenderire, atamunobere omu biro byaira; 5rundi nkomuntu obwagenda omu kibira hamu na mutahiwe okutema enku, kandi okukonogwe gutemesa endyamiti okutema omuti, kandi ekyoma kikuka omu muhini, nikihika ha mutahiwe, nokufa nafa; aliirukira omu rubuga orumu omwezi, aliba mwomezi: 6omuhozi wenzigu eyesagama aleke okukuratira omuisi womuntu omutimagwe nugwokya muno, nokumukwata, baitu rugendo rwa hara, nokumutema afe; baitu tasemerire okufa, baitu atamunobe ira. 7Nikyo nkuragirire nti Olyebaganira embuga isatu. 8Kandi MUKAMA Ruhanga wawe obwaligalihya omutano gwawe, nkokuyarahire baswenkuru, kandi elikuha ensi yona eyiyaraganize baswenkuru okugibaha; 9obworakwataga ekiragiro eki kyona okukikora, ekinkuragire hati okugonza MUKAMA Ruhanga wawe, nokugenderaga omu mihandaye; nubwo olyeyongeraho embuga isatu ezindi, okutabaho ezi isatu: 10esagama etarhoho musango ereke okuseswa omu nsi yawe hagati, MUKAMA Ruhanga wawe eyakuha okugigwetwa, kandi esagama ereke okukuhikaho. 11Baitu omuntu wena obwaliba nanoba mutahiwe, kandi alimugwera, namuimukiraho, namutema nokufa nafa; kandi obwaliirukira omu rubuga orumu hali ezi: 12nubwo abakuru abomurubuga rwowabu balituma balimuihayo, kandi balimuhayo omu mukono gwomuhozi wenzigu yesagama, afe. 13Eriso lyawe litalimuganyira baitu oliihaho ha Isareri esagama etaloho musango, gube mugisa namberoli.

14Otaliihaho akokuro’raho akomutano gwomutahi wawe, abantu abaira akabataireho, omu bugwetwa, omu nsi MUKAMA Ruhanga wawe eyakuha okugirya.

15Kaiso omu ataliimukira omuntu habwokutahiki’ra kwona, nobuhokuba habwekibi kyona, omu kibi kyona ekyakora: habwakanwa kabakaiso basatu, nukwo ekigambo kirigumibwa kiti. 16Kaiso wokutahiki’ra obwaliimukira omuntu wena, okumuhambiriza ekibi; 17abantu bombi abanyina empaka ezi, balyeme’ra omu maiso ga MUKAMA, omu maiso ga banyakatagara nom maiso gabacwi bemisango abalibaho omu biro ebi; 18kandi abacwi bemisango balikaguliriza mono: kandi dora, kaiso obwalibali kaiso webisuba, 19kandi ahambirize ebyebisuba hali megenziwe; nokuyatekerize okukora mugenziwe: nukwo muliihaho ekibi hagati yawe. 20Nabo abasigaraho balihu’ra, balitina, kandi okuruga aho tibaligaruka okukora eki ekiingana aho hagati yawe. 21Kandi eriso lyawe litaliganyira; obwomezi buliba habwobwomezi, eriso habweriso, erino habwerino, omukono habwomukono, ekigere habwekigere.