Swahili Bible2

18

1BANYAKATAGARA Abalevi, oruganda rwona orwa Levi, batalitunga omugabo nobubwakuba obugwetwa hamu na Isareri: baralyaga ebihongwa bya MUKAMA ebikorwa nomu’ro, nobugwetwabwe. 2Kunu batalitunga obugwetwa omu bene babu: MUKAMA nubwo bugwetwa bwabu, nkokuyabagambire. 3Kandi ebi banyakatagara ebibaratongaga abantu, abo abahayo ekyonzira, rundi ente rundi entama mbinu, barahaga nyakatagara omukono, nensaya ibiri norugisire. 4Emiganuro eyengano yawe, eyamarwa gawe, neyamagita gawe, nebyoya ebibanza okusarwa ha ntama zawe, nibyo oramuhaga. 5Baitu MUKAMA Ruhanga wawe akamukoma omu nganda zawe zona, ayeme’rege aherezege omu ibara lya MUKAMA, uwe na batabanibe ebiro byona.

6Kandi Omulevi obwaliba naruga omu malembo gawe omu Isareri yona, nambere aikaire, kandi aliija nokugonza kwona okwobwomezibwe hali ekiikaro MUKAMA ekyalyegomboza; 7nubwo alihereza omu ibara lya MUKAMA Ruhangawe, nkabagenzibe bona Abalevi okubakora abarukweme’ra oku omu maiso ga MUKAMA, 8balitunga emigabo eyebyokulya erukuinganaingana, okutabaraho ebi ebiruga omu kugura obugwetwabwe ebi ise ebiyamugwesere.

9Obwolikataha omu nsi MUKAMA Ruhanga wawe eyakuha, otalyega okukora nkebinugwa ebyamahanga ago. 10Hatalizoka naiwe omuntu wena arukurabya omu mu’ro omwanawe omwojo nobwakuba omuisiki, nobwakuba omuntu atera engisa, nobwakuba omuntu aragura ebiriija, nobwakuba owamasano, nobwakuba omufumo, 11nobwakuba arukubandwa omuzimu, nobwekuba embandwa mali, nobwakuba akaguza abafire. 12Baitu omuntu wena anyakukora ebigambo ebi nikyo kinugwa hali MUKAMA: kandi habwebinugwa ebi MUKAMA Ruhanga wawe ababingira aheru omu maiso gawe. 13Oliba ihanga erihikirire ahali MUKAMA Ruhanga wawe. 14Baitu amahanga ago, agolitunga nibahu’ra abo abakora ebyokuragura, nabatera engisa: baitu iwe, MUKAMA Ruhanga wawe takuikirize okukora oti. 15MUKAMA Ruhanga wawe alikuimukizaho nabi hagati yawe, owomu bene banyu, arakusisana nyowe; nuwe murahu’raga; 16nka byona ebiwaseruire hali MUKAMA Ruhanga wawe omu Holebu ha kiro ekyokuso’rokaniraho nogamba oti Ntagaruka okuhu’ra iraka erya MUKAMA Ruhanga wange, kunu ndeke okugaruka okuroa omu’ro gunu omwingi, ntafa. 17MUKAMA yangambira ati Bagambire kurungi eki ekibagambire. 18Ndibaimukiza nabi omu bene babu, nka iwe; kandi ndita ebigambo byange omu kanwake, kandi alibagambira byona ebindimuragira. 19Kandi kirihika, omuntu wena atalihu’ra ebigambo byange ebyaligamba omu ibara lyange, ndikimujunaniza. 20Baitu nabi, aligamba omu bwereme ekigambo omu ibara lyange, ekintamuragire okugamba, rundi aligamba omu ibara lyange, ekintaramuragire okugamba, rundi aligamba omu ibara eryabacwezi abandi, nabi ogu alifa. 21Kandi obwoligamba omu mutima gwawe oti Itwe tulimanya tuta ekigambo MUKAMA ekyatagambire? 22Nabi obwaliba nagamba omu ibara lya MUKAMA, ekigambo obukirirema, okuhika, nobukwakuba okuhiki’ra, nikyo kigambo MUKAMA ekyatangambire: nabi akigambire omu kwetumisiriza, otalimutina.