Swahili Bible2

15

1EMYAKA musanju obwerahwahoga oralekeraga. 2Kandi gunu nugwo mulingo ogwokulekera oku: omuntu wena anyakutonga alirekera eki ekiyayohoire mutahiwe; atalikitonga ahali mutahiwe kandi mugenziwe; baitu okulekera okwa MUKAMA kudumirwe. 3Olisobora okuitonga ahali omunyaihanga: baitu ekintu kyona ekyawe ekiriba kiri na mugenzi wawe, omukono gwawe gulikirekerea. 4Baitu tahlibaho abanaku omulinywe; (baitu mazimakwo MUKAMA alikuha omugisa omu nsi MUKAMA Ruhanga wawe eyakuha okuba obugwetwa mugirye;) 5kimu kyonka obworayekambaga okuhu’ra iraka lya MUKAMA Ruhanga wawe, okwerindaga nokukoraga ekiragiro eki kyona ekimbaragire hati. 6Baitu MUKAMA Ruhanga wawe alikuha omugisa, nkokuyakuraganize: kandi olyohora amahanga maingi,baitu otalyohoza; kandi olirema amahanga maingi, baitu tibalikulema iwe.

7Obuharabahoga omulinywe omuntu wamasege, omu ha bene banyu, omunda yamalembo gawe gona omu nsi yawe, MUKAMA Ruhanga wawe eyakuha, otaligumya omutima gwawe, kunu otalibumbatiza engaro zawe ahali mwena wanyu owamasege: 8baitu mazimakwo olimusasanu’ra engaro zawe, olimwohoza mali eki ekirimumara okutagakwe omweki ekyase’ra. 9Werinde haleko okuba omu mutima gwawe ekitekerezo ekibi nogamba Oti omwaka gwa musanju, omwaka ogwokulekera gumalize okuhika; neriso lyawe likora kubu mwene wanyu owamasege, kandi tomuha kantu; nauwe akunga MUKAMA habwawe, kandi kifoka kibi, namberiwoli. 10Mazimakwo olimuha, kandi omutima gwawe gutalisalirwa obwolimuha: baitu habwekigambo eki MUKAMA Ruhanga wawe alikuha omugisa omu mulimo gwawe gwona, nomu byona ebyotaho omukono gwawe okubikora. 11Baitu abanaku tabalihwaho omu nsi: nikyo nkuragirire ningamba nti Mazimakwo olisasu’ra engaro zawe mwene wanyu, nowamasege wamanyu, momunaku womu nsi yowanyu. 12Rundi mwene wanyu, omusaija Omuheburaniya rundi omukazi Omuheburaniya, obwaliba nagurwa namberoli, nakuko’ra emyaka mukaga; nubwo omu mwaka gwa musanju olimulekera busa namberoli. 13Kandi obwolimulekera busa namberoli, otalimwohereza atanyina kantu: 14olimuha nkomwenda ebyomu magana gawe nebyaha rubuga rwawe orwokuhu’raho, nebyomu ndeba yawe: nka MUKAMA Ruhanga wawe okwaliba akuhaire omugisa, nukwo olimuha ogu. 15Kandi oliijuka naiwe okabali omuiru rubale omu nsi ya Misiri, kandi MUKAMA Ruhanga wawe akakucungura: nikyo nkuragirire ekigambo kinu hati. 16Kandi kirihika obwaliba nakugambira ati Tindigenda okukurugaho; habwokugonza iwe nabenju yawe, baita hamu naiwe aboine omugisa; 17nubwo olikwata empindo, oligifumuza okutukwe ha ruigi, kandi aliba omuiru wawe rubale ebiro byona. Nomuzana wawe nukwo olimukora oti. 18Tikirikusaliza muno, obwolimukekera busa akurugeho; baitu akukolire emirimo emyaka mukaga okuingana omusara ogwomukolereza wempera emirundi ebiri: kandi MUKAMA Ruhanga wawe alikuha omugisa omu byona ebyolikora.

19Emizigaijo yona eyempaya erizarwa ente zawe, rundi embuzi zawe, oligyeza hali MUKAMA Ruhanga wawe: otalikoza omulimo omuzigaijo gwente yawe, kunu otalisara ebyoya ebyomuzigaijo gwembuzi yawe. 20Oligilira omu maiso ga MUKAMA Ruhanga wawe omwaka nomwaka, omu kiikaro MUKAMA ekyalyegomboza, iwe nabenju yawe. 21Kandi obuguliba gunyina kamogo, rundi mulema, rundi mufu wamaiso, rundi akabi kona kona, otaliguhayo nkekyonzira hali MUKAMA Ruhanga wawe. 22Oligulira omunda yamalembo gawe: atasemire nasemire baligulya nibainganaingana, nkenjaza kandi nkesa. 23Kimu kyonka otalirya esagama yagwo; oligisesa ha nsi nkamaizi.