Swahili Bible2

13

1RUNDI nabi obwaliimuka hagati yawe, rundi omurosi webiroto, nakuletera ekyokuro’raho rundi ekyamahano, 2kandi ekyokuro’raho rundi ekyamahano nikihika ekyakugambireho ati Leka tugende tukuratire abacwezi, abotakamanyaga, tubako’re; 3iwe otalihu’ra bigambo bya nabi ogu, rundi omurosi webiroto: baitu MUKAMA Ruhanga wanyu abalengere, okumanya rundi nimugonza MUKAMA Ruhanga wanyu nomutima gwanyu gwona nobwomezi bwanyu bwona. 4Muragendaga nimuhondera MUKAMA Ruhanga wanyu nimumutina, nimuhu’ra irakalye, kandi nimumugumiraho. 5Kandi nabi ogu rundi omurosi ogu owebiroto aliitwa; baitu agamba ebyokwemera MUKAMA Ruhanga wawe oguyakuragire okugugenderamu. Nukwo oliihaho oti akabai hagati yawe.

6Rundi mugenzi wawe, mwana wa nyoko, rundi omwana wawe omwojo, rundi omuhara wawe, rundi mukazi womu kifuba kyawe, rundi enganjani yawe ali nkobwomezi bwawe wenka, obwaliba nokubihabiha omu nsita nagamba ati tugende tuko’re abacwezi, iwe abotaramanyire, nobwakuba iwe nobuhakuba baswenkuru; 7ha bacwezi bamahanga agakuhe’raine, haihi naiwe, rundi hara naiwe, okuruga ha mpero yensi; 8otalimuikiriza, nobukwakuba okumuhu’ra; kunu eriso lyawe tiririmuganyira, kunu otalirekera, kunu otalimusereka: 9baitu olimuita mali; omukono gwawe nugwo gulimubanzaho okumuita, kandi hanyuma omukono gwabantu bona. 10Kandi olimutera amabale afe; baitu aseruire okukucunda nokukuiha ha MUKAMA Ruhanga wawe, ayakuihire omu nsi ya Misiri omu nju yobuiru. 11Kandi na Isareri yona balihu’ra, balitina, kandi tibalyeyongera okukora ekibi ekiingana kiti nkeki okukiri hagati yawe.

12Obwoliba nohu’ra amakuru gorumu orwembuga zawe, MUKAMA Ruhanga wawe ezakuha okuikarayo nibagamba ngu 13Haraho abantu ababi abakurugiremu, nibacunda nibahabisa abomu rubuga rwowabu, nibagamba ngu Leka tugende tuko’re abacwezi, abamutaramanyire; 14nubwo olikaguza nose’ra nokaguliriza muno; kandi dora, obukiriba kiri kyamazima, ekigambo ekigumire ngu Ekinugwa eki nikikorwa hagati yawe; 15olitemera kimu abomu rubuga oru nobwogi bwa busitama, noruhwerekereza kimu na byona ebirumu, nente zamu, nobwogi bwa busitama. 16Kandi olisoroza eminyago yarwo yona omu ikute lyarwo, kandi olyokya orubuga nomu’ro, neminyago yarwo yona yona, hali MUKAMA Ruhanga wawe: kandi ruliba omutumo okuhikya ebiro byona; tirulyombekwa obundi. 17Kandi tihaliguma ha ngaro zawe ekintu nekimu hebi ebyokuhwerekereza: MUKAMA ahinduke aleke ekinigakye ekingi, akwoleke embabazi, akuganyire, akukanyise, nkokuyarahire baswenkuru; 18Obwolihu’ra iraka erya MUKAMA Ruhanga wawe, okukwata ebiragirobye byona ebinkuragire hati, okukora ekirungi omu maiso ga MUKAMA Ruhanga wawe.