Swahili Bible2

4

1KANDI Isibosesi mutabani wa Saulo obuyahulire Abuneri aferire Heburoni emikonoye ekaburwa amani, Nabaisareri bona bakatuntura. 2Kandi Isibosesi mutabani wa Saulo akabayina abasaija babiri abakaba bali engabwa zebihanda: ibara eryomu nuwe Baana, nibara eryondi nuwe Rekabu, batabani ba Romoni Omubeerosi, owomu bana ba Benyamini: (baitu Beerosi nayo ebazirwe nka ya Benyamini: 3kandi Ababeerosi bakairukira Gitaimu, kandi nuho bagonyaga na hati hona). 4Kandi Yonasani mutabani wa Saulo akabayina mutabani omulema webigere. Akaba ahikize emyaka etano ebigambo ebya Saulo na Yonasani obubyarugire Yezereri, omuleziwe yamuhimba yairuka: kandi yahika obuyarahukire okuiruka, omwana akagwa, yafoka omulema. Nibaralye nuwe Mefibosesi. 5Kandi batabani ba Rimoni Omubeerosi, Rekabu na Baana, bakagenda, bahika ha nju ya Isobosesi omusana gusalire muno, uwe abyamire omu ihangwe. 6Batahamu omu nju nibefora batabalire engano, bamucumita enda: Rekabu na Baana omugenziwe bakira. 7Kandi obubatahire omu nju, uwe akaba abyamire ha kitabukye omu kisika ekyokuraramu, bamutema, bamuita, bamucwaho omutwe, batwara omutwegwe, bagenda omu muhanda ogwa Araba, bakisa obuire. 8Baleta omutwe gwa Isibosesi hali Daudi Heburoni nibagambira omukama ngu Dora omutwe gwa Isibosesi mutabani wa Saulo omunyanzigwa wawe, ayaseruire obwomezi bwawe; kandi MUKAMA ahoire hati enzigu ya mukama wange omukama, ha Saulo na ha ruzarorwe. 9Daudi yagarukamu Rekabu na Baana mugenziwe batabani ba Rimoni Omubeerosi, nabagambira ati Nka MUKAMA okwali omwomezi,, ayanunuire obwomezi bwange omu bujune bwona, 10omuntu obuyantebize nagamba ati Dora Saulo afire, natekereza alesere ebigambo ebirungi, nyowe nkamukwata namuitira Zikiragi, kandi niyo empera eyinamuhaire habwebigambobye. 11Kirisura ki abasaija ababi obubaisire omuntu ahikirire omunjuye wenka, kandi ha kitabukye, tinjunanize hati bunu esagamaye hali omukono gwanyu nimbaiha hansi? 12Daudi yaragira abasigazibe, babaita, basaraho emikono yabu nebigere byabu, babahanika haihi nekijongo ekyomu Heburoni. Baitu bakatwara omutwe gwa Isibosesi, baguzika omu kituro kya Abuneri omu Heburoni.