Swahili Bible2

20

1KANDI hakaba haliyo omusaija wa Beriali, ibaralye nuwe Seba, mutabani wa Bikuli Omubenyamini: yatera engwara nagamba ati Itwe titunyina mugabo omu Daudi, kunu titunyina bugwetwa omu mwana wa Yese: mugarukeyo omuhema zanyu omuntu wena inywe Isareri. 2Nukwo abasaija bona aba Isareri bagarukayo nibaleta okukuratira Daudi, bakuratira Seba mutabani wa Bikuli: baitu abasaija ba Yuda, bakahikya hali omukama wabu, okuruga Yorudani nokukikya Yerusalemu. 3Kandi Daudi akaija omu njuye Yerusalemu; omukama yatwara abakazi ikumi abazanabe abayasigire okulinda enju, yabakwasa abalinzi yabalisaga, baitu atagende halibo. Nukwo balindwaga okuhikya ekiro kyokufa kwabu, baikaireho nkabafakati. 4Kandi omukama yagambira Amasa ati Nyetera abasaija ba Yuda, basoroze ebiro bisatu bitakahinguireho, naiwe oikale hanu. 5Nukwo Amasa yagenda okusoroza abasaija ba Yuda: baitu yaikaraho muno okukira ebiro ebyamuterireho. 6Daudi yagambira Abisai ati Hati bunu Seba mutabani wa Bikuli alikora kubi okukira Abusalomu: twara abairu ba mukama wawe omuiru’re, aleke okwetungira embuga eziroho muhuruzi, nokuiruka nokubura omu maiso gaitu: 7Kandi abasaija ba Yoabu baramaga okumuhondera, Nabakereti Nabapereti, nabasaija bona abamani: baruga omu Yerusalemu okuiruki’ra Seba mutabani wa Bikuli. 8Obubahikire ha ibale erikoto eriri Gibeoni Amasa yaija okutangi’ra. Yoabu akaba ayetegere ebyokurwanisa ebiyajwaire, kandi hakabaho omweko ogurumu busitama agyetegere omunda omu kirweyo kyayo; kandi obuyaturukire yarugamu. 9Kandi Yoabu yagambira Amasa ati Mirembe, mugenzi wange? Yoabu yakwata Amasa ha kireju nomukonogwe ogwobulyo amunywegere. 10Baitu Amasa atateho mutima ha busitama ekaba eri omu mukono gwa Yoabu: nukwo yagimukambuza enda, yasesa amarage hansi, tiyamutera bwakabiri; yafa. Yoabu na Abisai mugenziwe bairuki’ra Seba mutabani wa Bikuli. 11Kandi hakaba hayemerire namberali omu ha basigazi ba Yoabu yagamba ati habwa Daudi bakuratire Yoabu. 12Kandi Amasa akaba agwire hansi nayekulingura omu sagamaye hagati omu ngudo. Omusaija obuyaboine abantu bona nibeme’raho, yahimba Amasa yamutwara omu kisaka, yamunagaho ekyokujwara obuyaboine abantu bona abarabireho bayeme’raho, 13Obubamuihire omu ngudo abantu bona bakakuratira Yoabu, okuiruki’ra 14Seba mutabani wa Bikuli. Yaraba omu nganda zona eza Isaeri okuhikya Aberi na Besireri okuhikya Aberi na Besimaaka hamu nibamukuratira. 15Baija bamugota omu Aberi eya Besimaaka, batumira orubuga omutumo, gwaimuka omu maiso ga muhuruzi: nabantu bona abakaba bali na Yoabu bakatera muhuruzi okuginaga hansi. 16Kandi omukazi wamagezi yayami’ra ayemerire omu rubuga ati Muhu’re muhu’re; mugambire Yoabu, mbesengerize, aije hanu mbaze nauwe. 17Yaira haihi namberali: omukazi yagamba ati Niwe Yoabu? Yagarukamu ati Ninyowe. Yamugambira ati Hu’ra ebigambo byomuzana wawe. 18Yagamba ati Nimpu’ra. Nubwo yagamba ati Omu biro byaira baganikyaga ngu Mazimakwo balisaba amagezi omu Aberi: kandi nuho ekigambo kyahwaga. 19Nyowe ndi womulibo obobusinge abokwesiga omu Isareri: nose’ra okuhwerekereza orubuga kandi nyina omu Isareri: noyendera ki okumira obugwetwa bwa MUKAMA? 20Yoabu yagarukamu nagamba ati Nikikafuhe nikikafuhe, nyowe okumira nobukwakuba okuhwerekereza. 21Ebigambo tibiri biti: baitu omusaija womu nsi yensozi eya Eferaimu, ibaralye nuwe Seba mutabani wa Bikuli, aimukize omukama omukonogwe, nuwe Daudi: muheyo uwe wenka, nyowe ndaruga ha rubuga. Omukazi yagambira Yoabu ati Dora omutwegwe baragukunagira ha muhuruzi. 22Omukazi yagenda namagezige hali abantu bona. Bacwaho omutwe gwa Seba mutabani wa Bikuli, bagunagira Yoabu. Yatera engwara, bararanga okuruga ha rubuga, omuntu wena omu hemaye. Yoabu yagarukayo Yerusalemu hali omukama. 23Kandi Yoabu yalema ihe ryona erya Isareri: na Benaya mutabani wa Yehoyada yalema Abakereti Nabapereti: 24na Adoramu yalema ebyomusoro: na Yehosafati mutabani wa Ahirudi akabali omuijukya: 25na Seva akabali omuhandiki: na Zadoki na Abyasara bakaba bali banyakatagara: na Ira 26Omuyairi akabali muhereza omukuru hali Daudi.